ເກົາຫຼີເໜືອ ຍິງຂີປະນາວຸດຕ້ອນຮັບຜູ້ແທນ ສ.ອາເມຣິກາ ທີ່ເດີນທາງມາເກົາຫຼີໃຕ້

ສຳນັກຂ່າວຕ່າງປະເທດລາຍງານ 9 ພຶດສະພາ 2019 ວ່າ: ຖະແຫຼງການຂອງຄະນະເສນາທິການຮ່ວມເກົາຫຼີໃຕ້ກ່າວວ່າ ເກົາຫຼີເໜືອຍິງຂີປະນາວຸດພິໄສໃກ້ ເມື່ອເວລາປະມານ 16:30 ນາທີ ຕາມເວລາທ້ອງຖິ່ນ ຈາກຖານໃນເມືອງຊິໂນ-ຣີ ທາງພາກຕາເວັນຕົກສຽງເໜືອ ໂດຍຍິງໄປທາງທິດຕາເວັນອອກ ຂີປະນາວຸດລູກທຳອິດຍິງໄປໄກ 420 ກິໂລແມັດ, ສ່ວນລູກທີ 2 ໄປໄກ 270 ກິໂລແມັດ.

ການເຄື່ອນໄຫວດັ່ງກ່າວຂອງເກົາຫຼີເໜືອ ເກີດຂຶ້ນພາຍຫຼັງທີ່ທ່ານ ສະຕີເຟນ ບີກັນ ຜູ້ແທນພິເສດວຽກງານເກົາຫຼີເໜືອຂອງລັດຖະບານສະຫະລັດ ອາເມຣິກາ ເດີນທາງເຖິງນະຄອນຫຼວງໂຊ ເກົາຫຼີໃຕ້ ເມື່ອວັນພຸດທີ່ຜ່ານມາ ເພື່ອປຶກສາຫາລືກັບຄະນະນຳເກົາຫຼີໃຕ້ ກ່ຽວກັບແນວທາງເຈລະຈາກັບເກົາຫຼີເໜືອ.

ນອກຈາກນີ້, ເມື່ອວັນທີ 4 ພຶດສະພາທີ່ຜ່ານມາ ເກົາຫຼີເໜືອຍັງໄດ້ມີການເຝິກຊ້ອມທາງທະຫານ ແລະ ຍິງອາວຸດຫຼາຍລູກ, ໂດຍຢ່າງໜ້ອຍ 1 ລູກເປັນຂີປະນາວຸດພິໄສໄກ ທີ່ຍິງໄປໄກປະມານ 500 ກິໂລແມັດ.

ການມາຂອງທ່ານ ສະຕີເຟນ ບີກັນ ຖືເປັນການເດີນທາງຢ້ຽມຢາມເກົາຫຼີໃຕ້ເປັນຄັ້ງທຳອິດນັບຕັ້ງແຕ່ກອງປະຊຸມສຸດຍອດທີ່ນະຄອນຫຼວງຮ່າໂນ້ຍ ປະເທດຫວຽດນາມ ລະຫວ່າງທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ກັບ ທ່ານ ຄິມ ຈອງ-ອຶຶນ ຜູ້ນຳສູງສຸດເກົາຫຼີເໜືອ ເມື່ອທ້າຍເດືອນກຸມພາທີ່ຜ່ານມາ ທີ່ຈົບລົງໂດຍບໍ່ມີຂໍ້ຕົກລົງໃດໆໃນການຢຸດຕິໂຄງການນິວເຄຼຍຂອງເກົາຫຼີເໜືອ ເພື່ອແລກກັບການຜ່ອນຄາຍມາດຕະການຂວໍ້າບາດ.

ຖານປະຕິບັດການຂີປະນາວຸດຊິໂນ-ຣີ ຫ່າງຈາກນະຄອນຫຼວງປຽງຢາງໄປທາງທິດຕາເວັນຕົກສຽງເໜືອປະມານ 75 ກິໂລແມັດ ເປັນໜຶ່ງໃນຖານຍິງຂີປະນາວຸດທີ່ເກົ່າແກ່ທີ່ສຸດຂອງເກົາຫຼີເໜືອ ແລະ ເປັນບ່ອນເກັບມ້ຽນຂີປະນາວຸດພິໄສກາງ ໂນດອງ-1 ອີກດ້ວຍ.