ສົງຄາມການຄ້າດຸເດືອດ ສ.ອາເມຣິກາ ປະກາດຂຶ້ນພາສີສິນຄ້າຈາກຈີນອີກຄັ້ງ

ສຳນັກຂ່າວຕ່າງປະເທດລາຍງານ 9 ພຶດສະພາ 2019 ວ່າ: ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ກ່າວເມື່ອວັນພຸດທີ່ຜ່ານມາ ກ່ຽວກັບການກຽມເພີ່ມອັດຕາພາສີ 10% ສຳລັບສິນຄ້າອື່ນໆເປັນ 25% ໃນວັນສຸກ ທີ 10​ ພຶດສະພານີ້ ແລະ ທ່ານກຳລັງພິຈາລະນາຕັ້ງກຳແພງພາສີອັດຕາ 25% ຕໍ່ສິນຄ້າອື່ນໆຂອງຈີນອີກມູນຄ່າ 325,000 ລ້ານໂດລາສະຫະລັດ ພາຍໃນອະນາຄົດອັນໃກ້ນີ້ ໂດຍກ່າວວ່າການຂຶ້ນພາສີດັ່ງກ່າວເປັນເພາະລັດຖະບານຈີນເປັນຝ່າຍຜິດສັນຍາ ແຕ່ປະຕິເສດໃຫ້ຂໍ້ມູນເພີ່ມເຕີມວ່າແມ່ນສັນຍາອັນໃດ.

ຂະນະທີ່ທ່ານ ໂຣເບິດ ໄລທິເຊີ ຫົວໜ້າຄະນະຜູ້ແທນເຈລະຈາການຄ້າຂອງລັດຖະບານສະຫະລັດ ອາເມຣິກາ ກ່າວວ່າການເຈລະຈາກັບຈີນຍັງຈະດຳເນີນຕໍ່ໄປ ແຕ່ໃນຂະນະດຽວກັນລັດຖະບານສະຫະລັດ ອາເມຣິກາ ມີຄວາມຈຳເປັນຕ້ອງເພີ່ມອັດຕາພາສີຕາມການປະກາດຂອງຜູ້ນຳ ເພື່ອເປັນການເພີ່ມແຮງກະຕຸ້ນຝ່າຍຈີນ. ໂດຍທ່ານ ໂດໂນ ທຣຳ ກ່າວເມື່ອຕົ້ນອາທິດນີ້ວ່າ ຕະຫຼອດໄລຍະເວລາ 10 ເດືອນຜ່ານມານັ້ນ ຈີນຈ່າຍພາສີໃນອັດຕາ 25% ສຳລັບສິນຄ້າເຕັກໂນໂລຊີມູນຄ່າ 50,000 ລ້ານໂດລາສະຫະລັດ ແລະ ອີກ 10% ສຳລັບມູນຄ່າການນຳເຂົ້າສິນຄ້າປະເທດອື່ນໆລວມ 200,000 ລ້ານໂດລາສະຫະລັດ.

ໃນດ້ານຂອງກະຊວງການຄ້າຂອງຈີນ ອອກຖະແຫຼງການວ່າ ລັດຖະບານຈີນຈະມີມາດຕະການຕອບໂຕ້ໃນລະດັບດຽວກັນ ຫາກທ່ານ ໂດໂນ ທຣຳ ຍັງບໍ່ຍອມຖອຍ ແລະ ເຕືອນວ່າທ່າທີຂອງສະຫະລັດ ອາເມຣິກາມີແຕ່ຈະຍິ່ງເພີ່ມຄວາມເດືອດຮ້ອນໃຫ້ແກ່ປະຊາຊົນຂອງທັງສອງປະເທດ.

ເຊິ່ງຈາກຂໍ້ມູນສຳນັກງານສະຖິຕິແຫ່ງຊາດສະຫະລັດ ອາເມຣິກາລະບຸວ່າ ເມື່ອປີທີ່ຜ່ານມາສະຫະລັດ ອາເມຣິການຳເຂົ້າສິນຄ້າຈາກຈີນລວມມູນຄ່າ 539,500 ລ້ານໂດລາສະຫະລັດ ແຕ່ມູນຄ່າການສົ່ງອອກມີ 120,300 ລ້ານໂດລາສະຫະລັດ ໝາຍຄວາມວ່າສະຫະລັດ ອາເມຣິກາຂາດດຸນການຄ້າໃຫ້ຈີນຫຼາຍເຖິງ 419,200 ລ້ານໂດລາສະຫະລັດ ຖືເປັນສະຖິຕິການຂາດດຸນການຄ້າທີ່ສູງສຸດໃນປະຫວັດສາດ.