ລາວເວີນຖະແຫຼງສາເຫດການເກີດໄຟໄໝ້ ລາວ-ໄອເຕັກ ໃນເບື້ອງຕົ້ນ

ລາຍງານ 10 ພຶດສະພາ 2019, ສູນການຄ້າລາວ-ໄອເຕັກ ຖະແຫຼງຜ່ານທາງ facebook ວ່າ: ໃນນາມ ບໍລິສັດ ລາວເວີນ ມະຫາຊົນ ຂໍແຈ້ງກ່ຽວກັບເຫດທີ່ເກີດຂື້ນໃນຕອນເຊົ້າ ຂອງວັນທີ 10 ພຶດສະພາ 2019 ຢູ່ສູນງານວາງສະແດງສິນຄ້າລາວ-ໄອເຕັກ ດັ່ງນີ້:

ຕອນເຊົ້າ ເວລາ 8:34 ໄດ້ມີໄຟເກີດຂື້ນທີ່ບູດງານວາງສະແດງຈຸດ 1 ເຊິ່ງເປັນຈຸດທີ່ມີສິນຄ້າໄວໄຟຈິ່ງເຮັດເພີງຂະຫຍາຍໄປສູ່ຮ້ານອື່ນຢ່າງໄວ, ຕໍ່ສະພາບການດັ່ງກ່າວພະນັກງານຂອງບໍລິສັດລາວເວີນຈຶ່ງໄດ້ພ້ອມກັນຮີບດັບໄຟດ້ວຍບັ້ງດັບເພີງຈໍານວນຫຼາຍ ແຕ່ຍັງບໍ່ສາມາດຢັບຢັ້ງເພີງດັ່ງກ່າວໄດ້. ຕໍ່ມາຈົນເຈົ້າໜ້າທີ່ດັບເພີງຂອງກະຊວງປ້ອງກັນຄວາມສະຫງົບ, ນະຄອນຫຼວງ ແລະ ເມືອງໄຊຖານີ ລວມຈໍານວນ 7 ຄັນ ໄດ້ເຂົ້າມາຊ່ວຍດັບເພີງທັນເວລາ ພາຍໃນ 45 ນາທີກໍ່ສາມາດດັບໄຟທັງໝົດໄດ້.

ສ່ວນສາຍເຫດທີ່ພາໃຫ້ເກີດໄຟໄໝ້ນັ້ນ ເຈົ້າໜ້າທີ່ຍັງຢູ່ໃນຂັ້ນຕອນກວດສອບ, ຕາມການສັນນິຖານເບື້ອງຕົ້ນຈາກເຈົ້າໜ້າທີ່ ແມ່ນອາດເກີດຈາກໄຟຟ້າລັດວົງຈອນ

ຜ່ານການກວດກາສະພາບຄວາມເສຍຫາຍໃນເບື້ອງຕົ້ນ ມີ 24 ຮ້ານຄ້າໄດ້ຮັບຄວາມເສຍຫາຍ ເຊິ່ງຄິດເປັນເປີເຊັນເທົ່າກັບ 6% ຂອງຈໍານວນຮ້ານທັງໝົດ 382 ຮ້ານ. ສ່ວນການປະເມີນຄວາມເສຍຫາຍຕົວຈິງແມ່ນຢູ່ໃນຂັ້ນຕອນການກວດສອບ.

ດັ່ງນັ້ນຈິ່ງແຈ້ງມາຍັງທຸກພາກສ່ວນເພື່ອຊາບຕໍ່ກັບເຫດການທີ່ເກີດຂື້ນຕົວຈິງດັ່ງກ່າວ.