ການເຈລະຈາສົງຄາມການຄ້າ ສ.ອາເມຣິກາ-ຈີນ ບໍ່ມີຜົນຫຍັງ, ປ.ທຣຳ ສັ່ງຂຶ້ນພາສີຈີນເພີ່ມ 300 ຕື້ໂດລາ

ສຳນັກຂ່າວຕ່າງປະເທດລາຍງານເມື່ອວັນທີ 10 ພຶດສະພາ 2019 ທີ່ຜ່ານມາວ່າ: ສຳນັກງານຄະນະຜູ້ແທນເຈລະຈາການຄ້າຂອງສະຫະລັດ ອາເມຣິກາ (USTR) ອອກຖະແຫຼງການວ່າ ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ໄດ້ລົງນາມໃນຄຳສັ່ງ ໃຫ້ໜ່ວຍງານທີ່ກ່ຽວຂ້ອງຂຶ້ນພາສີສິນຄ້ານຳເຂົ້າຈາກຈີນເກືອບທຸກລາຍການທີ່ເຫຼືອ ຕົກເປັນມູນຄ່າປະມານ 300,000 ລ້ານໂດລາສະຫະລັດ ໂດຍຄຳສັ່ງດັ່ງກ່າວອອກມາພາຍໃນໄລຍະເວລາຍັງບໍ່ເຖິງ 24 ຊົ່ວໂມງ ຫຼັງຈາກທີ່ລັດຖະບານສະຫະລັດ ອາເມຣິກາເພີ່ມກຳແພງພາສີມູນຄ່າສິນຄ້ານຳເຂົ້າຈາກຈີນ 200,000 ລ້ານໂດລາສະຫະລັດ ຈາກເດີມ 10% ຂຶ້ນເປັນ 25% ແລະ ມີຜົນບັງຄັບໃຊ້ຕັ້ງແຕ່ວັນສຸກທີ່ຜ່ານມາ.

ສຳລັບການເຈລະຈາລະຫວ່າງຜູ້ແທນລະດັບສູງດ້ານນະໂຍບາຍການຄ້າຂອງສະຫະລັດ ອາເມຣິກາ ແລະ ຈີນທີ່ນະຄອນຫຼວງວໍຊິງຕັນໃນຄັ້ງນີ້ ເປັນການພົບປະຫາລືຄັ້ງທີ 11 ແລ້ວ ແລະ ຄັ້ງນີ້ເປັນການປະຊຸມທີ່ບໍ່ໄດ້ຂໍ້ສະຫຼຸບໃດໆ ເນື່ອງຈາກການເຈລະຈາເກີດຂຶ້ນໃນໄລຍະດຽວກັນກັບທີ່ທ່ານ ໂດໂນ ທຣຳສັ່ງໃຫ້ຂຶ້ນພາສີຕໍ່ສິນຄ້າຈີນ.

ໃນດ້ານກະຊວງການຕ່າງປະເທດຂອງຈີນ ອອກຖະແຫຼງການພຽງວ່າ ຈະມີມາດຕະການຕອບໂຕ້ຢ່າງເໝາະສົມໃນລະດັບດຽວກັນ.

ເຖິງຢ່າງໃດກໍ່ຕາມ, ສະຫະລັດ ອາເມຣິກາ ແລະ ຈີນເຫັນດີຮ່ວມກັນໃນຫຼັກການ ໃຫ້ມີການເຈລະຈາຄັ້ງຕໍ່ໄປທີ່ນະຄອນຫຼວງປັກກິ່ງ, ຂະນະທີ່ທ່ານ ໂດໂນ ທຣຳ ລົງຂໍ້ຄວາມໃນ Twitter ກ່ຽວກັບການພົບປະຫາລືໃນນະຄອນຫຼວງວໍຊິງຕັນລະຫວ່າງທ່ານ ຫຼິວ ເຮີ ຮອງນາຍົກລັດຖະມົນຕີຈີນ ແລະ ທີ່ປຶກສາດ້ານນະໂຍບາຍເສດຖະກິດຂອງທ່ານ ສີ ຈິ້ນຜິງ ປະທານປະເທດຈີນ ກັບ ຄະນະຜູ້ແທນຂອງສະຫະລັດ ອາເມຣິກາທີ່ນຳໂດຍທ່ານ ໂຣເບິດ ໄລທິເຊີ ຜູ້ອຳນວຍການ USTR ແລະ ທ່ານ ສະຕີບ ມະນູຊິນ ລັດຖະມົນຕີກະຊວງການເງິນສະຫະລັດ ອາເມຣິກາ ເປັນໄປຢ່າງສ້າງສັນ ແລະ ຕົນບໍ່ຮີບຮ້ອນ.