ກິມຈິ ສົ້ມຜັກເກົາຫຼີ ສີມືຄົນລາວ ຈາກຊາວກະສິກອນໄວໜຸ່ມ ບ້ານຫອຍ

ກຸ່ມໄວໜຸ່ມ ບ້ານຫອຍ ເມືອງຄູນ ແຂວງຊຽງຂວາງ ໄດ້ສ້າງຕັ້ງຂຶ້ນເມື່ອວັນທີ 28 ມັງກອນ 2018, ມີສະມາຊິກທັງໝົດ 10 ຄົນ, ສ້າງຕັ້ງຂຶ້ນພາຍໃຕ້ກຸ່ມສະຫະກອນກະສິກຳບ້ານຫອຍ, ຈຸດປະສົງແມ່ນເພື່ອສ້າງລາຍໄດ້ເສີມໃຫ້ແກ່ໄວໜຸ່ມໃນເວລາຫວ່າງ, ກິດຈະກຳທຳອິດແມ່ນການແປຮູບຜັກກາດຂາວເຮັດກິມຈິ ຜ່ານມາບໍ່ເຄີຍເຮັດແປຮູບມາກ່ອນ ມີແຕ່ຂາຍຜັກສົດ, ຫຼັງຈາກນັ້ນ ເຄື່ອຂ່າຍກະສິກອນລາວ ໄດ້ມາຈັດເຝິກອົບຮົມໃຫ້ກຸ່ມໄວໜຸ່ມ ເພື່ອເພີ່ມມູນຄ່າຜົນຜະລິດກະສິກຳ.

ກິມຈິ ຖືເປັນອາຫານເກົ່າແກ່ທີ່ມາຈາກພູມປັນຍາຂອງຊາວເກົາຫຼີ ດ້ວຍການໝັກໝາກເຜັດແດງ ກັບ ຜັກຕ່າງໆ ໂດຍທົ່ວໄປຈະເປັນຜັກກາດຂາວ, ຄົນເກົາຫຼີນິຍົມຮັບປະທານກິມຈິເກືອບທຸກມື້ ແລະ ຍັງນຳໄປເປັນສ່ວນປະກອບອາຫານອື່ນໆອີກຫຼາກຫຼາຍເຊັ່ນ: ເຂົ້າປຽກ, ແກງ, ເຂົ້າຜັດ, ໃສ່ຕົ້ມໝີ່, ກິນຄູ່ກັບຊີ້ນດາດ ແລະ ອື່ນໆ, ໂດຍຈະມີລົດຊາດເຜັດ, ສົ້ມ ແລະ ມີກິ່ນແຮງ.

ຈາກອິດທິພົນຂອງອາຫານເກົາຫຼີ ທີ່ແຜ່ຫຼາຍໄປທົ່ວໂລກ ກິມຈິກໍ່ເປັນໜຶ່ງໃນນັ້ນທີ່ໄດ້ຮັບຄວາມນິຍົມໄປຕາມໆກັນ ດັ່ງນັ້ນ, ຊາວໜຸ່ມບ້ານຫອຍ ຈຶ່ງເຫັນໂອກາດດັ່ງກ່າວ ທີ່ຈະເພີ່ມມູນຄ່າໃຫ້ກັບຜົນຜະລິດທາງກະສິກຳ ທີ່ປູກຢູ່ໃນບ້ານຂອງຕົນຢູ່ແລ້ວ ນັ້ນກໍ່ຄື ຜັກກາດຂາວ ໃຫ້ເກີດມູນຄ່າເພີ່ມ ດ້ວຍການແປຮູບເປັນກິມຈິ, ສຳລັບທ່ານໃດທີ່ສົນໃຈ ຫຼື ຕ້ອງການສະໜັບສະໜູນຜະລິດຕະພັນດັ່ງກ່າວຂອງກຸ່ມໄວໜຸ່ມບ້ານຫອຍ ສາມາດຕິດຕໍ່ໄດ້ທີ່ເບີໂທ: 020 5616 1619.