ຝຣັ່ງສູນເສຍທະຫານກ້າ 2 ຄົນ ໃນການບຸກຊ່ວຍເຫຼືອຕົວປະກັນທີ່ບູກິນາຟາໂຊ

ສຳນັກຂ່າວຕ່າງປະເທດລາຍງານ 12 ພຶດສະພາ 2019 ວ່າ: ທ່ານ ເອມມານູເອວ ມາຄຼອງ ປະທານປະເທດຝຣັ່ງ ພ້ອມດ້ວຍຄະນະລັດຖະມົນຕີ ທ່ານ ນາງ ຟລໍເຣນ ປາລີ (Florence Parly) ລັດຖະມົນຕີກະຊວງປ້ອງກັນປະເທດ, ທ່ານ Jean-Yves Le Drian ລັດຖະມົນຕີກະຊວງການຕ່າງປະເທດ ແລະ ທ່ານ ພົນເອກ Francois Lecointre ປະທານຄະນະເສນາທິການທະຫານຮ່ວມຝຣັ່ງ ຮ່ວມໃຫ້ການຕ້ອນຮັບຕົວປະກັນ 3 ຈາກ 4 ຄົນ ທີ່ໜ່ວຍຮົບພິເສດຂອງຝຣັ່ງ ໄດ້ບຸກເຂົ້າຊ່ວຍເຫຼືອຢູ່ບູກິນາຟາໂຊ ແລະ ເດີນທາງກັບດ້ວຍຖ້ຽວບິນພິເສດຂອງລັດຖະບານຝຣັ່ງ ລົງທີ່ຈອດສະໜາມບິນວິນລາຄູແບ ນະຄອນຫຼວງປາຣີສ ເມື່ອວັນເສົາ ທີ່ຜ່ານມາ.

ທ່ານ ໂລຣອງ ລາສຊິມຸຍລາສ ໜຶ່ງໃນຕົວປະກັນທີ່ເປັນຊາວຝຣັ່ງ ເປັນຕົວແທນກ່າວຂອບໃຈລັດຖະບານ ແລະ ເຈົ້າໜ້າທີ່ທຸກຄົນທີ່ໄດ້ສ່ຽງຊີວິດຊ່ວຍເຫຼືອ, ໂດຍສະເພາະເຈົ້າໜ້າທີ່ 2 ຄົນທີ່ຕ້ອງເສຍຊີວິດຈາກປະຕິບັດການສ່ຽງອັນຕະລາຍຄັ້ງນີ້ ທີ່ຕໍ່ມາກອງທັບຝຣັ່ງເປີດເຜີຍວ່າຄື ທ່ານ ເຊດຣິກ ດີ ປິແອປອງ ແລະ ທ່ານ ອາແລັງ ເບີຕອງເຊວໂລ ເຊິ່ງທ່ານ ເອມມານູເອວ ມາຄຼອງ ກ່າວວ່າລັດຖະບານ ແລະ ກອງທັບຈະຈັດພິທີສົບຢ່າງສົມກຽດໃຫ້ກັບທະຫານທັງສອງຄົນນັ້ນ.

ຂະນະດຽວກັນ, ທ່ານ ໂລຣອງ ລາສຊິມຸຍລາສ ຍັງກ່າວຍ້ອງຍໍຊົມເຊີຍຜູ້ນຳທາງ ແລະ ຄົນຂັບລົດຊາວເບນິນ ທີ່ຖືກກຸ່ມຄົນຮ້າຍຂ້າໃນລະຫວ່າງເຫດຄວາມວຸ້ນວາຍ ເມື່ອເຈົ້າໜ້າທີ່ບຸກເຂົ້າຊ່ວຍເຫຼືອ, ໃນດ້ານຂອງລັດຖະມົນຕີກະຊວງປ້ອງກັນປະເທດຝຣັ່ງກ່າວວ່າ ໃນສ່ວນຂອງຕົວປະກັນຍິງຊາວເກົາຫຼີໃຕ້ ແມ່ນຍອມປາກົດຕົວຕໍ່ສື່, ສ່ວນຕົວປະກັນຍິງຊາວອາເມຣິກາບໍ່ຂໍປາກົດຕົວ ແລະ ຂໍຄວາມເປັນສ່ວນຕົນນັ້ນ ລັດຖະບານຝຣັ່ງໄດ້ສະຫງວນຊື່ຂອງທັງສອງຄົນ ແລະ ຈະອຳນວຍຄວາມສະດວກໃຫ້ແກ່ທັງສອງຄົນໃນການເດີນທາງກັບປະເທດຕໍ່ໄປ ແລະ ເປີດເຜີຍວ່າ ສະຫະລັດ ອາເມຣິກາ ແລະ ເກົາຫຼີໃຕ້ຍອມຮັບວ່າບໍ່ເຄີຍໄດ້ຮັບແຈ້ງຈາກຝ່າຍໃດວ່າມີພົນລະເມືອງຖືກຄວບຄຸມຕົວຢູ່ໃນບູກິນາຟາໂຊ.

ເຊິ່ງກຸ່ມຄົນຮ້າຍໄດ້ລັກພາຕົວ 4 ຕົວປະກັນທີ່ປະກອບດ້ວຍຊາວຝຣັ່ງ 2 ຄົນ, ແມ່ຍິງຊາວອາເມຣິກາ 1​ ຄົນ ແລະ ແມ່ຍິງເກົາຫຼີໃຕ້ 1 ຄົນ ໄປຈາກເຂດອຸດທະຍານແຫ່ງຊາດໃນເບນິນ ເມື່ອວັນທີ 1 ພຶດສະພາ 2019 ເຊິ່ງພື້ນທີ່ດັ່ງກ່າວຝຣັ່ງປະກາດໃຫ້ເປັນພື້ນທີ່ສີແດງ  ແລະ ຄົນຮ້າຍໄດ້ນຳຕົວປະກັນຂ້າມຊາຍແດນໄປຍັງບູກິນາຟາໂຊ ແລະ ກອງທັບໄດ້ນຳຕິດຕາມ ຈົນຕັດສິນໃຈປະຕິບັດການບຸກເຂົ້າຊ່ວຍເຫຼືອໃນວັນທີ 7 ພຶດສະພາ ຖ້າບໍ່ດັ່ງນັ້ນຕົວປະກັນທັງໝົດອາດຖືກສົ່ງໄປຍັງມາລີ ເຊິ່ງຈະຍິ່ງຍາກແກ່ການເຂົ້າເຖິງ, ໂດຍເຈົ້າໜ້າທີ່ຝຣັ່ງຂ້າຄົນຮ້າຍໄດ້ 4 ຄົນ ຈາກທັງໝົດ 6 ຄົນ ແລະ ພາຍຫຼັງເກີດເຫດຍັງບໍ່ມີກຸ່ມໃດອອກມາຮັບອ້າງ ແຕ່ລັດຖະບາບຝຣັ່ງເຊື່ອວ່າເປັນຜົນງານຂອງເຄືອຂ່າຍອັນ-ກໍອິດະ ໃນອາຟຣິກາ.