ເຫຼິນ ເຈິ້ງເຟີຍ ຜູ້ສ້າງຕັ້ງ “ຫົວເຫວີ່ຍ“ ດ້ວຍເງິນພຽງ 21 ພັນຢວນ

ເມື່ອ 32 ປີກ່ອນ ທ່ານ ເຫຼິນ ເຈິ້ງເຟີຍສ້າງຕັ້ງບໍລິສັດຫົວເຫວີ່ຍດ້ວຍເງິນທຶນພຽງ 21,000 ຢວນ ອີງຕາມລາຍງານການເງິນຂອງຫົວເຫວີ່ຍ ປີ 2018 ມີລາຍໄດ້ກວ່າ 721.2 ຕື້ຢວນ (ປະມານ 105 ຕື້ໂດລາສະຫະລັດ) ມີກຳໄລກວ່າ 59.3 ຕື້ຢວນ (ປະມານ 8.6 ຕື້ໂດລາສະຫະລັດ) ຈຸດເລີ່ມຕົ້ນຂອງຫົວເຫວີ່ຍເປັນມາແນວໃດ ມາອ່ານນຳກັນ.

Huawei ຖືເປັນແບຣນສະມາດໂຟນທີ່ມາແຮງໃນລະດັບທີ່ສັ່ນສະເທືອນວົງການມືຖືໄປທົ່ວໂລກ ປັດຈຸບັນມີຍອດຈຳໜ່າຍແຊງ iPhone ຂຶ້ນມາເປັນອັນດັບ 2 ຮອງຈາກ Samsung ແລະ ມີທ່າແຮງທີ່ຈະກ້າວຂຶ້ນໄປອີກ ຈົນເຮັດໃຫ້ຄູ່ແຂ່ງຕ່າງກໍ່ອົກສັ່ນຂວັນເສຍ ອັນເນື່ອງມາຈາກການພັດທະນາເຕັກໂນໂລຊີທີ່ຕອບສະໜອງຕໍ່ຄວາມຕ້ອງການຂອງລູກຄ້າໄດ້ຢ່າງແມ້ນຢຳ ລວມທັງການໃຊ້ຍຸດທະສາດດ້ານລາຄາເຂົ້າສະໜັບສະໜູນ ເຮັດໃຫ້ບໍລິສັດທີ່ເລີ່ມຕົ້ນຈາກຫ້ອງນ້ອຍໆ ກ້າວຈະໂດດຂຶ້ນມາເປັນພະຍາຍັກ ແລະ ປະກາດວ່າຈະເປັນຂຶ້ນເບີ 1 ຂອງໂລກໃຫ້ໄດ້.

Huawei ສ້າງຕັ້ງໂດຍທ່ານ ເຫຼິນ ເຈິ້ງເຟີຍ ໃນປີ 1987 ພາຍຫຼັງທີ່ທ່ານໄດ້ລາອອກຈາກກອງທັບ, ແຕ່ກວ່າຈະມາເຖິງວັນນີ້ໄດ້ ທ່ານ ເຫຼິນ ເຈິ້ງເຟີຍ ກັບທີມງານກໍ່ຕ້ອງລອງຜິດລອງຖືກຫຼາຍຄັ້ງ ໂດຍເຄີຍຂາຍເຄື່ອງສົ່ງສັນຍານເຕືອນໄຟໄໝ້ ແລະ ຂາຍຮອດຢາຫຼຸດຄວາມອ້ວນ ກ່ອນທີ່ທ່ານຈະເຫັນໂອກາດໃນທຸລະກິດດ້ານໂທລະຄົມມະນາຄົມ ແລະ ຕໍ່ຍອດດ້ວຍການພັດທະນາ ກ້າທຸ້ມທຶນມະຫາສານໃຫ້ກັບການຄົ້ນຄວ້າວິໄຈ ເຮັດໃຫ້ບໍລິສັດເຕີບໃຫຍ່ຂະຫຍາຍຕົບແບບກ້າວກະໂດດ ແລະ ກ້າວໄປຂ້າງໜ້າຢ່າງບໍ່ຢຸດຢັ້ງ ໂດຍໃນປີ 2017 ຫົວເຫວີ່ຍ ທຸ້ມງົບໃນການວິໄຈ ແລະ ພັດທະນາກວ່າ 89.6 ຕື້ຢວນ ແລະ ໃນປີ 2018 ໄດ້ເພີ່ມງົບການວິໄຈ ແລະ ພັດທະນາຂຶ້ນຕື່ມອີກ 13.2% ເປັນມູນຄ່າກວ່າ 101.5 ຕື້ຢວນ ເທົ່າກັບ 14.1% ຂອງລາຍຮັບທັງໝົດ.

ທ່ານ ເຫຼິນ ເຈິ້ງເຟີຍ ເກີດໃນປີ 1944 ໃນມົນທົນກຸ້ຍໂຈວ ເຊິ່ງເປັນເຂດທຸລະກັນດານຂອງຈີນ ທ່ານເປັນລູກຊາຍກົກໃນຈຳນວນລູກທັງໝົດ 7 ຄົນ ພໍ່ແມ່ເປັນຄູໃນໂຮງຮຽນຊົນນະບົດ ມີຖານະທຸກຍາກ ແຕ່ພໍ່ແມ່ເຫັນຄວາມສຳຄັນຂອງການສຶກສາ ຈຶ່ງພະຍາຍາມກັດແຂ້ວສູ້ສົ່ງໃຫ້ລູກຮຽນຢ່າງເຕັມທີ່ ຈົນຈົບມະຫາວິທະຍາໄລ ແລະ ເຂົ້າເຮັດວຽກດ້ານວິສະວະກຳໃນກອງທັບຈີນໄດ້ໃນທີ່ສຸດ.

ເມື່ອຈີນປ່ຽນນະໂຍບາຍທາງດ້ານເສດຖະກິດ ສະໜັບສະໜູນໃຫ້ປະຊາຊົນສ້າງກິດຈະການຂອງຕົວເອງ ທ່ານ ເຫຼິນ ເຈິ້ງເຟີຍ ກໍ່ຕັດສິນໃຈລາອອກຈາກກອງທັບ ກັບມາໃຊ້ຫ້ອງນ້ອຍໆເປັນຫ້ອງການ ສຳລັບທີມງານທັງໝົດ 6 ຄົນ ດ້ວຍເງິນທຶນພຽງ 21,000 ຢວນ ບໍລິສັດເລີ່ມຕົ້ນບໍ່ຄ່ອຍດີປານໃດ ເຮັດໃຫ້ເງິນທຶນທີ່ມີໜ້ອຍຢູ່ແລ້ວ ຍິ່ງເຫຼືອໜ້ອຍກວ່າເກົ່າ.

ແຕ່ດ້ວຍສະພາບຈິດໃຈທີ່ເຂັ້ມແຂງ ອັນເຄີຍຜ່ານຮ້ອນຜ່ານໜາວແຫ່ງຄວາມທຸກຍາກມາຕະຫຼອດຊ່ວງຊີວິດທີ່ຜ່ານມາ ເຮັດໃຫ້ທ່ານ ເຫຼິນ ເຈິ້ງເຟຍຢືນສູ້ກັບຄວາມຜິດພາດ ແລ້ວນຳເອົາຄວາມຜິດພາດມາເປັນບົດຮຽນ ພ້ອມຫາໂອກາດໃໝ່ໆຢູ່ສະເໝີ, ຈົນໃນທີ່ສຸດທຸລະກິດກໍ່ເຂົ້າທີ່ເຂົ້າທາງ ເມື່ອບໍລິສັດໄດ້ເປັນຕົວແທນຈຳນວນຕູ້ສາຂາໂທລະສັບຈາກຮົງກົງ ທີ່ນຳເຂົ້າມາຂາຍໃນຈີນ ດ້ວຍຄຸນນະພາບທີ່ດີຂອງສິນຄ້າ, ລາຄາຖືກ ແລະ ບໍລິການຫຼັງການຂາຍໃນລະດັບທີ່ໜ້າເພິ່ງພໍໃຈ ໄດ້ເຮັດໃຫ້ Huawei ເລີ່ມມີຈຸດຢືນຢ່າງໝັ້ນຄົງ ແລະ ໄດ້ເປີດສາຍການຜະລິດຕູ້ສາຂາໂທລະສັບ ທີ່ຄວບຄຸມດ້ວຍໂປຣແກຣມຂຶ້ນມາ ອັນໄດ້ສ້າງກຳໄລໃຫ້ບໍລິສັດເປັນເມັດເປັນໜ່ວຍເຂົ້າບໍລິສັດ.

Huawei ເປັນບໍລິສັດທີ່ມີຄວາມເປັນຊາດນິຍົມສູງ ທ່ານ ເຫຼິນ ເຈິ້ງເຟີຍ ມີຄວາມເຄົາລົບສັດທາໃນຕົວປະທານ ເໝົາເຈີຕຸງ ຢ່າງສຸດອົກສຸດໃຈ ໂດຍໄດ້ນຳສຸດຍອດຍຸດທະສາດຂອງປະທານເໝົາ ນັ້ນກໍ່ຄື ”ປາລ້ອມເມືອງ” ທີ່ເຮັດໃຫ້ພັກຄອມມູນິດຈີນໄດ້ຮັບໄຊຊະນະ ມາປະຍຸກໃຊ້ກັບທຸລະກິດຂອງຕົນ ໂດຍເລີ່ມຕົ້ນຈາກເມືອງນ້ອຍໆ ເຂົ້າສູ່ເມືອງໃຫຍ່ ພ້ອມຕໍ່ຍອດຈົນກາຍເປັນປາລ້ອມໂລກ ເມື່ອທ່ານ ເຫຼິນ ນຳ Huawei ບຸກຕະຫຼາດທຸລະກິດດ້ານໂທລະຄົມມະນາຄົມໃນປະເທດຕ່າງໆ ໂດຍໃຊ້ລາຄາທີ່ຖືກກວ່າບໍລິສັດອື່ນໆເປັນໃບເບີກທາງ ເຮັດໃຫ້ກິດຈະການຂອງຫົວເຫວີຍເຕີບໃຫຍ່ຢ່າງໄວວາ ເຊິ່ງການແຈ້ງເກີດສະມາດໂຟນຂອງບໍລິສັດ ກໍ່ເປັນອີກໜຶ່ງກໍລະນີສຶກສາທີ່ໜ້າສົນໃຈຢ່າງຍິ່ງ.

ຕອນທີ່ຫົວເຫວີ່ຍ ເຂົ້າສູ່ທຸລະກິດສະມາດໂຟນ ຖືວ່າເປັນຕະຫຼາດທີ່ສຸດທໍລະຫົດ ເພາະມີເຈົ້າຕະຫຼາດທີ່ເຂັ້ມແຂງຢູ່ແລ້ວ 2 ລາຍໃຫຍ່ ນັ້ນກໍ່ຄື iPhone ຂອງ ບໍລິສັດ Apple ທີ່ຄອງສ່ວນແບ່ງຕະຫຼາດຖານເທິງ ກັບ Samsung ທີ່ເຈາະຕະຫຼາດກຸ່ມລູກຄ້າໃນທຸກລະດັບ ການເຂົ້າມາຂອງຫົວເຫວີ່ຍ ຈຶ່ງບໍ່ຕ່າງຫຍັງກັບມ້ານອກສາຍຕາ.

ແຕ່ເມື່ອສະໜາມຮົບປ່ຽນໄປ ວິທີການກໍ່ຕ້ອງປ່ຽນຕາມ ນອກຈາກຈະໃຊ້ຍຸດທະສາດດ້ານລາຄາເປັນໃບເບີກທາງແລ້ວ ຫົວເຫວີຍຍັງພະຍາຍາມສ້າງຈຸດເດັ່ນທີ່ຕອບສະໜອງຄວາມຕ້ອງການຂອງລູກຄ້າໄດ້ຢ່າງແມ້ນຢຳ ດ້ວຍການນຳເລນຂອງ Leica ທີ່ຖືວ່າເປັນບໍລິສັດຜະລິດເລນທີ່ດີທີ່ສຸດໃນໂລກ ມາເປັນສ່ວນປະກອບຂອງສະມາດໂຟນ ເຮັດໃຫ້ຫົວເຫວີຍມີຈຸດຂາຍໃນດ້ານການຖ່າຍພາບ ຈົນສາມາດແຈ້ງເກີດເປັນທີ່ຮູ້ຈັກຂຶ້ນມາໄດ້ໃນເວລາອັນສັ້ນ.

ປະກອບກັບມີການພັດທະນາຢ່າງແຂ່ງຂັນ ດ້ວຍການລົງທຶນຢ່າງມະຫາສານດ້ານການຄົ້ນຄວ້າວິໄຈ ເພື່ອສ້າງສຸດຍອດນະວັດຕະກຳ ຈົນໃນປັດຈຸບັນນີ້ສະມາດໂຟນຂອງຫົວເຫວີຍມີຄວາມລ້ຳສະໄໝດ້ານເຕັກໂນໂລຊີ ບໍ່ດ້ອຍໜ້າໄປກວ່າ iPhone ຫຼື Samsung ເລີຍ.

ປັດຈຸບັນຫົວເຫວີ່ຍ ພາຍໃຕ້ການບໍລິຫານຂອງທ່ານ ເຫຼິນ ເຈິ້ງເຟີຍ ໃນໄວອາຍຸ 75 ປີ ກາຍເປັນບໍລິສັດທີ່ສ້າງຄວາມພາກພູມໃຈໃຫ້ກັບຄົນຈີນເປັນຢ່າງຍິ່ງ ຈາກບໍລິສັດທ້ອງຖິ່ນທີ່ເລີ່ມຕົ້ນດ້ວຍເງິນ 21,000 ຢວນ ກາຍມາເປັນບໍລິສັດທີ່ມີມູນຄ່າສູງຕິດອັບດັບ Top 100 ຂອງໂລກ ແລະ ດຳເນີນທຸລະກິດໃນກວ່າ 170 ປະເທດ ມີພະນັກງານເກືອບ 188,000 ຄົນ.