ຍີ່ປຸ່ນ ມອບການຊ່ວຍເຫຼືອດ້ານການພັດທະນາຊັບພະຍາກອນມະນຸດແກ່ ສປປ.ລາວ

ໃນວັນທີ 30 ພຶດສະພາ 2019, ທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ ໄດ້ພົບປະກັບທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ.ລາວ ທີ່ນະຄອນຫຼວງໂຕກຽວ ປະເທດຍີ່ປຸ່ນ.

ໃນໂອກາດນີ້ຜູ້ນຳທັງສອງໄດ້ເປັນສັກຂີພິຍານໃນການເຊັນສັນຍາການຮ່ວມມືຊ່ວຍເຫຼືອລະຫວ່າງສອງປະເທດໂດຍສະເພາະ ໂຄງການພັດທະນາຊັບພະຍາກອນມະນຸດໃຫ້ແກ່ ສປປ.ລາ ແລະ ເອກະສານແລກປ່ຽນອີກຈຳນວນໜຶ່ງ.

ເຊິ່ງການຢ້ຽມຢາມຍີ່ປຸ່ນຄັ້ງນີ້ຂອງທ່ານນາຍົກລັດຖະມົນຕີ ແລະ ຄະນະ ແມ່ນເພື່ອເຂົ້າຮ່ວມກອງປະຊຸມສາກົນກ່ຽວກັບ ອະນາຄົດຂອງອາຊີ ຄັ້ງທີ 25, ເຊິ່ງຈະຈັດຂຶ້ນໃນລະຫວ່າງວັນທີ 30-31 ພຶດສະພາ 2019 ທີ່ ໂຕກຽວ.

ກອງປະຊຸມສາກົນ ກ່ຽວກັບ ອະນາຄົດຂອງອາຊີ ແມ່ນຈັດຂຶ້ນທຸກໆປີ ໂດຍສໍານັກຂ່າວໜັງສືພິມນິກເກ ຂອງຍີ່ປຸ່ນ ນັບແຕ່ປີ 1995 ເປັນຕົ້ນມາ, ເຊິ່ງໄດ້ເຊື້ອເຊີນບັນດາຜູ້ນໍາ ແລະ ຜູ້ບໍລິຫານຂັ້ນສູງ ຂອງພາກລັດ ແລະ ພາກເອກະຊົນ ລວມທັງ​ອະດີດການນໍາ, ຜູ້ຊົງຄຸນນະວຸດທິ, ປະທານອົງການ, ສະຖາບັນຕ່າງໆ ທັງພາກພື້ນ ແລະ ສາກົນຂອງອາຊີ ແລະ ພາກພື້ນອື່ນເຂົ້າຮ່ວມ ເພື່ອແລກປ່ຽນທັດສະນະ ແລະ ວິໄສທັດຕໍ່​ບັນ​ຫາ​ພົ້ນ​ເດັ່ນ​ທີ່​ເກີດ​ຂຶ້ນ ​ໃນ​ພາກ​ພື້ນ ແລະ ໃນ​ໂລກ ຮ່ວມກັນ. ກອງປະຊຸມຄັ້ງນີ້ ແມ່ນຈະດໍາເນີນໄປພາຍໃຕ້ຫົວຂໍ້: “ຄົ້ນຫາລະບຽບຂອງໂລກແບບໃໝ່ ເພື່ອແກ້ໄຂຄວາມວຸ້ນວາຍໃນໂລກ (Seeking a new global order-overcoming the chaos)”.

ໃນໂອກາດເຄື່ອນໄຫວຢູ່ປະເທດຍີ່ປຸ່ນຄັ້ງນີ້, ທ່ານ ທອງລຸນ ສີສຸລິດ ຈະຂຶ້ນກ່າວບົດປາໄສ ເພື່ອສະແດງທັດສະນະຂອງ ສປປ.ລາວ ທີ່ປິ່ນອ້ອມຫົວຂໍ້ກອງປະຊຸມ.