ຈີນ ເລັ່ງສອນວິທະຍາສາດໃຫ້ຊາວກະສິກອນໃນຊົນນະບົດ ເພື່ອຄວາມກ້າວໜ້າຢ່າງທັດທຽບ

ສຳນັກຂ່າວຊິນຫົວຂອງທາງການຈີນລາຍງານ ເມື່ອວັນທີ 30 ພຶດສະພາ 2019 ທີ່ຜ່ານມາວ່າ: ສະມາຄົມວິທະຍາສາດ ແລະ ເຕັກໂນໂລຊີແຫ່ງປະເທດຈີນ  (CAST) ຮ່ວມກັບກະຊວງກະສິກຳ ແລະ ຊົນນະບົດຂອງຈີນ ໄດ້ປະກາດເປີດຕົວໂຄງການພັດທະນາຄວາມສາມາດໃນການອ່ານອອກ-ຂຽນໄດ້ ແລະ ໃຫ້ຄວາມຮູ້ທາງວິທະຍາສາດແກ່ປະຊາຊົນໃນຊົນນະບົດ ພາຍໃນກອບໄລຍະເວລາ 3 ປີ.

ໂດຍໃນໄລຍະເວລາ 3 ປີ ຈີນຈະເຝິກອົບຮົມຊາວກະສິກອນກວ່າ 4 ລ້ານຄົນໃຫ້ຮູ້ໜັງສື, ອ່ານອອກ-ຂຽນໄດ້, ເຂົ້າໃຈວິທະຍາສາດ, ຊ່ຽວຊານດ້ານເຕັກໂນໂລຊີກະສິກຳສະໄໝໃໝ່ ແລະ ມີຄວາມສາມາດໃນການບໍລິຫານທຸລະກິດ.

ໃນປັດຈຸບັນອັດຕາສ່ວນຂອງປະຊາກອນຈີນໃນຊົນນະບົນທີ່ມີຄວາມຮູ້ທາງວິທະຍາສາດມີພຽງ 4.93% ເຊິ່ງຕ່ຳກວ່າຄ່າສະເລ່ຍທົ່ວປະເທດຈີນທີ່ມີ 8.47%.

ທ່ານ ຫວຍ ຈິ້ນເຜິງ ຮອງປະທານສະມາຄົມວິທະຍາສາດ ແລະ ເຕັກໂນໂລຊີແຫ່ງປະເທດຈີນກ່າວວ່າ: ການພັດທະນາຄວາມຮູ້ດ້ານວິທະຍາສາດໃຫ້ຄົນໃນຊົນນະບົດ ຖືເປັນກຸນແຈສຳຄັນໃນການຟື້ນຟູຊົນນະບົດຂອງຈີນ ແລະ ຈີນຈະເດີນໜ້າຄວາມຮູ້ວິທະຍາສາດໃຫ້ກາຍເປັນຄວາມຮູ້ຂອງສາທາລະນະຊົນຕໍ່ໄປ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube