ພູໄຟຊິນາບຸງ ອິນໂດເນເຊຍລະເບີດຢ່າງຮຸນແຮງ ທາງການເຕືອນປະຊາຊົນໃຫ້ມີສະຕິລະວັງຕົວທຸກເວລາ

ສຳນັກຂ່າວຕ່າງປະເທດລາຍງານ 10​ ມິຖຸນາ 2019 ວ່າ: ພູໄຟຊິນາບຸງ ທີ່ເກາະສຸມາຕຣາ ປະເທດອິນໂດເນເຊຍ ໄດ້ກັບມາລະເບີດຢ່າງຮຸນແຮງອີກຄັ້ງ ເມື່ອວັນອາທິດທີ່ຜ່ານມາ ເຮັດໃຫ້ຄວັນເຖົ່າລອຍສູງຂຶ້ນຟ້າເຖິງ 7 ກິໂລແມັດ ອັນໄດ້ສ້າງຄວາມແຕກຕື່ນໃຫ້ກັບປະຊາຊົນທີ່ອາໄສຢູ່ໃກ້ຄຽງ ເຖິງແມ່ນວ່າຈະຍັງບໍ່ມີລາຍງານຜູ້ເສຍຊີວິດ ຫຼື ໄດ້ຮັບບາດເຈັບ ແຕ່ເຈົ້າໜ້າທີ່ໄດ້ເຕືອນໃຫ້ລະມັດວະວັງເພາະອາດມີການລະເບີດຂຶ້ນມາອີກ, ໂດຍສຳນັກງານເຝົ້າລະວັງພູໄພຊິນາບຸງກ່າວວ່າ ພາຍຫຼັງການລະເບີດເມື່ອວັນອາທິດທີ່ຜ່ານມາ ເຈົ້າໜ້າທີ່ໄດ້ຕິດຕາມສະຖານະການຢ່າງໃກ້ຊິດ ໂດຍພົບວ່າຕັ້ງແຕ່ທ່ຽງຄືນວັນອາທິດຈົນເຖິງຕອນເຊົ້າວັນຈັນ ເວລາ 06:00 ໂມງ ໄດ້ມີການສັ່ນສະເທືອນຮຸນແຮງ ພ້ອມຮຽກຮ້ອງໃຫ້ປະຊາຊົນໃສ່ໜ້າກາກອະນາໄມ ແລະ ອາໄສຢູ່ແຕ່ພາຍໃນທີ່ພັກອາໄສ.

ພູໄຟຊິນາບຸງ ສູງ 2,460 ແມັດ ຢູ່ໃນກຸ່ມພູໄພທີ່ພ້ອມລະເບີດທຸກເມື່ອ ແຕ່ກໍ່ບໍ່ໄດ້ລະເບີດມາດົນເຖິງ 400 ປີ ແລະ ກັບມາລະເບີດໃນປີ 2010, ໂດຍອິນໂດເນເຊຍ ມີພູໄພເກືອບ 130 ໜ່ວຍ ຖືເປັນປະເທດທີ່ພູໄຟຫຼາຍທີ່ສຸດໃນໂລກ.