ວິດີໂອນາທີ ອີຣານຍິງໂດຣນ ສ.ອາເມຣິກາຕົກ, ປ.ທຣຳ ກ່າວວ່າ ເປັນຄວາມຜິດພາດຄັ້ງໃຫຍ່ຫຼວງຂອງອີຣານ

ສຳນັກຂ່າວຕ່າງປະເທດລາຍງານເມື່ອວັນທີ 20 ມິຖຸນາ 2019 ທີ່ຜ່ານມາວ່າ: ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາກ່າວວ່າ: ການທີ່ກອງກຳລັງປະຕິບັດອີຣານ (IRGC) ຍິງໂດຣນສອດແນມລຸ້ນ RQ-4 Global Hawk ຂອງກອງທັບສະຫະລັດ ອາເມຣິກາຕົກໃນແຂວງຮໍມອສກັນ ທາງພາກໃຕ້ຂອງອີຣານ ໃກ້ກັບຊ່ອງແຄບຮໍມຸສ “ຖືເປັນຄວາມຜິດພາດຄັ້ງໃຫຍ່ຫຼວງ” ແຕ່ຜູ້ນຳສະຫະລັດ ອາເມຣິກາກ່າວຕໍ່ອີກວ່າ ໂດຍສ່ວນຕົວບໍ່ຄິດວ່າເປັນການເຈດຕະນາໂຈມຕີ ແລະ ເຫດການອາດພິກຜັນໄປຈາກນີ້ຫາກໂດຣນເປັນຍົນທີ່ມີຄົນຂັບ.

ເມື່ອຜູ້ສື່ຂ່າວຊັກຖາມວ່າ ແລ້ວສະຫະລັດ ອາເມຣິກາຈະຕອບໂຕ້ຫຼືບໍ່?, ທ່ານ ໂດໂນ ທຣຳ ກ່າວວ່າ “ດຽວໄດ້ເຫັນນຳກັນ”, ຂະນະທີ່ທ່ານ ພົນເອກ ໂຈເຊັບ ກວສເຕລາ ຜູ້ບັນຊາການສູນບັນຊາການທາງອາກາດຂອງສູນບັນຊາການກາງສະຫະລັດ ອາເມຣິກາ ໃນຕາເວັນອອກກາງກ່າວວ່າ IRGC ເຈດຕະນາກໍ່ກວນປະຕິບັດການທາງທະຫານຂອງສະຫະລັດ ອາເມຣິກາ ໃນການສັງເກດການສະຖານະການໃນຊ່ອງແຄບຮໍມຸສ ແລະ ບໍລິເວນໃກ້ຄຽງ ພາຍຫຼັງເກີດເຫດໂຈມຕີເຮືອບັນທຸກນ້ຳມັນເຖິງ 2 ຄັ້ງໃນເດືອນນີ້ ທີ່ເປັນສີມືຂອງ IRGC (ຕາມການກ່າວຫາຂອງທາງການສະຫະລັດ ອາເມຣິກາ) ແລະ ຢືນຢັນວ່າໂດຣນທີ່ຖືກຍິງຕົກບິນຢູ່ໃນເຂດນ່ານນ້ຳສາກົນລະຫວ່າງຊ່ອງແຄບຮໍມຸສກັບອາວໂອມານ ຫ່າງຈາກຝັ່ງຂອງແຂວງຮໍມອສກັນປະມານ 34 ກິໂລແມັດ ກ່ອນຖືກໂຈມຕີດ້ວນຂີປະນາວຸດຈາກພື້ນສູ່ອາກາດ.

ເຖິງຢ່າງໃດກໍ່ຕາມ, ທ່ານ ໂມຮຳໝັດ ຈາວາດ ຊາຣີບ ລັດຖະມົນຕີກະຊວງການຕ່າງປະເທດອີຣານກ່າວວ່າ ໂດຣນຂອງສະຫະລັດ ອາເມຣິກາເຈດຈະນາລະເມີດນ່ານຟ້າຂອງປະເທດຢ່າງຊັດເຈນ ແລະ ໃຫ້ລາຍລະອຽດອີກວ່າ ໂດຣນໄດ້ບິນຂຶ້ນຈາກຖານທັບໃນສະຫະນະຄອນ ເອເມຣັດ ອາຣັບ (UAE) ເມື່ອເວລາ 00:14 ໂມງ ຕາມເວລາທ້ອງຖິ່ນຂອງວັນພະຫັດທີ່ຜ່ານມາ ເຂົ້າສູ່ນ່ານຟ້າຂອງອີຣານເມື່ອເວລາ 04:05 ຕາມເວລາທ້ອງຖິ່ນ ທີ່ພິກັດ 2559”43”N 5702″25″E ຕໍ່ມາໃນເວລາກອງທັບສະຫະລັດ ອາເມຮິກາໄດ້ເຜີຍແຜ່ຂໍ້ມູນຕອບໂຕ້ຢ່າງໄວວາວ່າ ໂດຣນຢູ່ທີ່ພິກັດ 2557″42″N 5650″22″E ໝາຍຄວາມວ່າບໍ່ໄດ້ລ່ວງລ້ຳອະທິປະໄຕອີຣານ.

ເຊິ່ງສະຖານະການທີ່ເກີດຂຶ້ນ ຍິ່ງເພີ່ມຄວາມເຄັ່ງຕຶງໃຫ້ກັບບັນຍາກາດຄວາມຂັດແຍ່ງລະຫວ່າງສະຫະລັດ ອາເມຣິກາ ກັບ ອີຣານ ທີ່ຮ້ອນແຮງຢ່າງຕໍ່ເນື່ອງ ນັບຕັ້ງແຕ່ລັດຖະບານສະຫະລັດ ອາເມຣິກາ ຖອນຕົວອອກຈາກຂໍ້ຕົກລົງນິວເຄຼຍ ເມື່ອເດືອນພຶດສະພາ ປີທີ່ຜ່ານມາ, ໃນດ້ານຄູ່ຮ່ວມຂໍ້ຕົກລົງອື່ນໆທີ່ຍັງເຫຼືອຄື ລັດເຊຍ, ຈີນ, ຝຣັ່ງ, ອັງກິດ, ເຢຍລະມັນ ແລະ ສະຫະພາບເອີຣົບ ລວມເຖິງອີຣານ ຈະປະຊຸມກັນທີ່ນະຄອນຫຼວງວຽນນາ ປະເທດໂອຕຣິດ ໃນວັນທີ 28 ມິຖຸນາ 2019 ນີ້.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube