ເງິນບາດໄທ ແຂງຄ່າທີ່ສຸດໃນຮອບ 6 ປີ, ກະທົບການນຳເຂົ້າ ລາຄາສິນຄ້າໃນທ້ອງຕະຫຼາດເພີ່ມສູງຂຶ້ນ

21 ມິຖຸນາ 2019 ຈາກການລາຍງານຂອງທະນາຄານກຸງໄທໃຫ້ຮູ້ວ່າ ໃນຕອນເຊົ້າມື້ນີ້ເງິນບາດເປີດຕະຫຼາດແຂງຄ່າຢູ່ທີ່ລະດັບ 30.86 ບາດຕໍ່ໂດລາສະຫະລັດ ເຊິ່ງແຂງຄ່າເພີ່ມຂຶ້ນຈາກຊ່ວງປິດຕະຫຼາດໃນວັນກ່ອນໜ້ານີ້ທີ່ຢູ່ 30.92 ບາດຕໍ່ໂດລາສະຫະລັດ ຖືເປັນການແຂ່ງຄ່າທີ່ສຸດໃນຮອບ 6 ປີ, ເຊິ່ງອັດຕາອ້າງອີງຈາກທະນາຄານແຫ່ງ ສປປ.ລາວ ປະຈຳວັນທີ 21 ມິຖຸນາ 281.38 ກີບຕໍ່ບາດ, ສ່ວນອັດຕາຈາກທະນາຄານທຸລະກິດ 286.69 ກີບຕໍ່ບາດ (BCEL).

ເຊິ່ງການແຂງຄ່າຂອງຄ່າເງິນບາດເປັນຜົນມາຈາກເງິນທຶນໄຫຼເຂົ້າໃນຕະຫຼາດຮຸ້ນໄທ ແລະ ຕະຫຼາດເກີດໃໝ່ ພາຍຫຼັງທີ່ທະນາຄານກາງສະຫະລັດ ອາເມຣິກາ ສົ່ງສັນຍາຈະຫຼຸດອັດຕາດອກເບ້ຍລົງ ເພາະຕົວເລກເສດຖະກິດຕ່າງໆເລີ່ມອ່ອນແອຈາກບັນຫາສົງຄາມທາງການຄ້າລະຫວ່າງສະຫະລັດ ອາເມຣິກາ ແລະ ຈີນ.

ນອກຈາກນີ້, ນັບຕັ້ງແຕ່ວັນທີ 19-20 ມິຖຸນາ ພົບວ່າຄ່າເປັນວອນ-ເກົາຫຼີໃຕ້ແຂ່ງສຸດທີ່ລະດັບ 1.23% ຮອງລົງມາເປັນເງິນບາດ-ໄທແຂ່ງຄ່າ 1.03%, ຢວນ-ຈີນ 0.77%, ໂດລາ-ໄຕ້ຫວັນ 0.6%, ຣິງກິດ-ເມເລເຊຍ 0.6%, ຣູເປຍ-ອິນໂດເນເຊຍ 0.59%, ໂດລາ-ສິງກະໂປ 0.46%, ເປໂຊ-ຟິລິບປິນ 0.41%, ຣູປີ-ອິນເດຍ 0.16%, ໂດລາ-ຮົງກົງ 0.12%, ເຖິງຢ່າງໃດກໍ່ຕາມ ຜູ້ປະກອບການຄວນປ້ອງກັນຄວາມສ່ຽງຈາກອັດຕາແລກປ່ຽນ ເພື່ອຫຼຸດຜ່ອນຄວາມຜັນຜວນຂອງຄ່າເງິນ ແລະ ໄລຍະນີ້ເງິນບາດແຂ່ງຄ່າຖືເປັນໂອກາດສຳລັບການສົ່ງອອກ ແຕ່ເປັນອຸປະສັກສຳລັບການນຳເຂົ້າ ເພາະ ສປປ.ລາວ ເພິ່ງພາການນຳເຂົ້າຈາກປະເທດໄທເປັນໂດຍຫຼັກ ໂດຍສະເພາະທາງດ້ານສະບຽງອາຫານ ແນ່ນອນວ່າຈະສົ່ງຜົນກະທົບຕໍ່ປາກທ້ອງປະຊາຊົນລາວຢ່າງຫຼີກລ້ຽງບໍ່ໄດ້ ເນື່ອງຈາກລາຄາສິນຄ້າໃນທ້ອງຕະຫຼາດເລີ່ມປັບຕົວຂຶ້ນຢ່າງຊັດເຈ

ນອກຈາກນີ້, ການອ່ອນຄ່າຂອງເງິນໂດລາ ຍັງເຮັດໃຫ້ລາຄາຄຳຂຶ້ນ 2.0% ສູ່ລະດັບ 1,387 ໂດລາສະຫະລັດຕໍ່ອອນ, ຂະນະທີ່ລາຄານ້ຳມັນດິບຂຶ້ນ 4.4% ສູ່ລະດັບ 64.6 ໂດລາຕໍ່ບາເຣວ ຈາກຄວາມເຄັ່ງຕຶງໃນຕາເວັນອອກກາງ ພາຍຫຼັງສະຫະລັດ ອາເມຣິກາຂູ່ໂຈມຕີອີຣານ.