ຜູ້ນຳປະເທດສະມາຊິກອາຊຽນ ຈະປຶກສາຫາລືກັນເພື່ອຈັດກອງປະຊຸມສຸດຍອດ ກັບ ຜູ້ນຳເກົາຫຼີເໜືອ

ສຳນັກຂ່າວຕ່າງປະເທດລາຍງານ 21 ມິຖຸນາ 2019 ໂດຍອ້າງອີງຈາກແຫຼ່ງຂ່າວຂອງສຳນັກຂ່າວຍີ່ປຸ່ນຫຼາຍແຫ່ງວ່າ: ນອກເໜືອຈາກການປຶກສາຫາລືກ່ຽວກັບສະຖານະການໃນພູມມິພາກ ແລະ ຄວາມທ້າທາຍຈາກພາຍນອກໂດຍສະເພາະຜົນກະທົບຈາກສົງຄາມການຄ້າລະຫວ່າງສະຫະລັດ ອາເມຣິກາກັບຈີນແລ້ວ, ຜູ້ນຳຈາກ 10 ປະເທດສະມາຊິກອາຊຽນ ຈະປຶກສາຫາລືກ່ຽວກັບການຈັດກອງປະຊຸມສຸດຍອດລະດັບຜູ້ນຳຄັ້ງປະຫວັດສາດ ກັບ ທ່ານ ຄິມ ຈອງ-ອຶນ ຜູ້ນຳສູງສຸດເກົາຫຼີເໜືອ ເຊິ່ງເບື້ອງຕົ້ນມີການກຳນົດການໄວ້ວັນທີ 25-26 ພະຈິກນີ້ ທີ່ເມືອງປູຊານ ປະເທດເກົາຫຼີໃຕ້.

ນອກຈາກນີ້, ຫາກເກີດຂຶ້ນຈິງ, ກອງປະຊຸມຄັ້ງນີ້ຍັງຖືເປັນກອງປະຊຸມວາລະພິເສດ ເນື່ອງໃນໂອກາດ ຄົບຮອບ 30 ປີ ຂອງການສະຖາປະນາສາຍພົວພັນໃນຖານະຄູ່ເຈລະຈາລະຫວ່າງອາຊຽນກັບເກົາຫຼີເໜືອ, ຂະນະທີ່ແຫຼ່ງຂ່າວຍັງລະບຸອີກວ່າ ຜູ້ນຳອາຊຽນທັງ 10 ປະເທດ ຕ້ອງຫາລືເລື່ອງດັ່ງກ່າວດ້ວຍຄວາມລະມັດລະວັງ ແລະ ຮອບຄອບທີ່ສຸດ ເນື່ອງຈາກຍັງບໍ່ມີໃຜສາມາດປະເມີນສະຖານະການໄດ້ວ່າ ຜູ້ນຳເກົາຫຼີເໜືອຈະຕອບຮັບຄຳເຊີນຫຼືບໍ່ ແຕ່ໃນກໍລະນີທີ່ທ່ານ ຄິມ ຈອງ-ອຶນ ຕອບຮັບ ແລະ ເຂົ້າຮ່ວມກອງປະຊຸມດ້ວຍຕົນເອງ ຈະເປັນການສົ່ງເສີມບົດບາດ ແລະ ພາບລັກຄັ້ງສຳຄັນໃຫ້ກັບອາຊຽນ ໃນຖານະອົງກອນລະຫວ່າງປະເທດທີ່ຮ່ວມມີບົດບາດໃນການແກ້ໄຂສະຖານະການດ້ານຄວາມໝັ້ນຄົງສຳຄັນລະດັບໂລກ ເນື່ອງຈາກເປັນບັນຫາທີ່ທັງສະຫະລັດ ອາເມຣິກາ, ຈີນ ແລະ ເກົາຫຼີໃຕ້ກ່ຽວຂ້ອງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube