ຜູ້ນຳ ສ.ອາເມຣິກາ ສັ່ງໂຈມຕີອີຣານ ເພື່ອຕອບໂຕ້ທີ່ຍິງໂດຣນຕົກ

ສຳນັກຂ່າວຕ່າງປະເທດລາຍງານ 21 ມິຖຸນາ 2019 ວ່າ: ໜັງສືພິມນິວຢອກທາມ ຂອງສະຫະລັດ ອາເມຣິກາລາຍງານໂດຍອ້າງອີງແຫຼ່ງຂ່າວຈາກເຈົ້າໜ້າທີ່ລະດັບສູງ ໃນລັດຖະບານສະຫະລັດ ອາເມຣິກາວ່າ ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ອະນຸມັດການໂຈມຕີອີຣານເມື່ອຄືນວັນພະຫັດ (20 ມິຖຸນາ) ທີ່ຜ່ານມາ ແຕ່ໄດ້ຕັດສິນໃຈສັ່ງຍົກເລີກໃນອີກບໍ່ພໍເທົ່າໃດຊົ່ວໂມງຕໍ່ມາ.

ແຫຼ່ງຂ່າວຍັງເປີດເຜີຍອີກວ່າ ເປົ້າໝາຍຂອງການໂຈມຕີໃນອີຣານ ຕາມແຜນທີ່ອະນຸມັດໃນເບື້ອງຕົ້ນ ລວມມີຖານທີ່ຕັ້ງຈັກຣາດາ ແລະ ຖານຍິງຂີປະນາວຸດ, ແຜນການໂຈມຕີດັ່ງກ່າວນຳສະເໜີໂດຍກະຊວງປ້ອງກັນປະເທດສະຫະລັດ ອາເມຣິກາ ໂດຍເປັນໜຶ່ງໃນຫຼາຍທາງເລືອກ ທີ່ນຳສະເໜີຕໍ່ຄະນະທີ່ປຶກສາລະດັບສູງຂອງທຳນຽບຂາວ.

ລາຍງານຍັງລະບຸອີກວ່າ ຄຳສັ່ງຍົກເລີກປະຕິບັດການໂຈມຕີອີຣານ ເກີດຂຶ້ນເມື່ອເວລາປະມານ 19:30 ຕາມເວລາທ້ອງຖິ່ນນະຄອນຫຼວງວໍຊິງຕັນ ເກີດຂຶ້ນພາຍຫຼັງທີ່ທ່ານ ໂດໂນ ທຣຳໃຊ້ເວລາເກືອບຕະຫຼອດວັນ ປຶກສາຫາລືແຜນຍຸດທະສາດອີຣານ ກັບຄະນະທີ່ປຶກສາດ້ານຄວາມໝັ້ນຄົງແຫ່ງຊາດ ແລະ ກຸ່ມຜູ້ນຳໃນລັດຖະສະພາ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube