ສານຫວຽດນາມ ຕັດສິນໃສ່ໂທດຄຸກ 12 ປີ ຊາວອາເມຣິກາ ຂໍ້ຫາພະຍາຍາມລົ້ມລ້າງອຳນາດລັດ

ສຳນັກຂ່າວຕ່າງປະເທດລາຍງານ 24 ມິຖຸນາ 2019 ວ່າ: ສານປະຊາຊົນນະຄອນໂຮ່ຈິມິນ ມີຄຳພິພາກສາຂອງສານໃນວັນຈັນນີ້ ໃຫ້ທ້າວ ໄມເຄີ ເຟືອງ ມິນ ຫງວຽນ ສັນຊາດອາເມຣິກາເຊື້ອສາຍຫວຽດນາມ ອາຍຸ 55 ປີ ຮັບໂທດຕິດຄຸກ 12 ປີ ໃນຄະດີຄວາມໝັ້ນຄົງ ກ່ຽວກັບການພະຍາຍາມລົ້ມລ້າງອຳນາດລັດຖະບານສັງຄົມນິຍົມ ແລະ ໃຫ້ເນລະເທດກັບສະຫະລັດ ອາເມຣິກາທັນທີ ເມື່ອຮັບໂທດຄົບຕາມກຳນົດ.

ເຖິງຢ່າງໃດກໍ່ຕາມ, ຫງວຽນ ທີ່ໄດ້ໃຫ້ການຍອມຮັບສາລະພາບ ໄດ້ຍື່ນອຸທອນຂໍ້ຫຼຸດໂທດ ໂດຍຂໍຄວາມເມຕາຈາກສານເພື່ອໃຫ້ຕົນໄດ້ເດີນທາງກັບໄປຫາຄອບຄົວໄດ້ໄວຂຶ້ນ,​ ແຕ່ຜູ້ພິພາກສາຍັງບໍ່ໄດ້ພິຈາລະນາວ່າຈະຮັບຄຳຮ້ອງຂໍອຸທອນຂອງຈຳເລີຍຫຼືບໍ່, ໃນດ້ານຂອງສະຖານເອກອັກຄະລັດຖະທູດສະຫະລັດ ອາເມຣິກາ ປະຈຳນະຄອນຫຼວງຮ່າໂນ້ຍ ຍັງບໍ່ສະແດງທ່າທີຕໍ່ການຕັດສິນຂອງສານໃນຄັ້ງນີ້, ຂະນະທີ່ຈຳເລີຍຮ່ວມອີກ 2 ຄົນເປັນຊາຍຊາວຫວຽດນາມຮັບໂທດຈຳຄຸກ 8 ປີ ແລະ 10 ປີຕາມລຳດັບ.

ເຊິ່ງເນື້ອໃນສຳຄັນຈາກສຳນວນຄະດີທີ່ມີການເປີດເຜີຍລະບຸວ່າ: ເຈົ້າໜ້າທີ່ຝ່າຍຄວາມໝັ້ນຄົງຂອງຫວຽດນາມ ໄດ້ຈັບກຸມຫງວຽນ ເມື່ອເດືອນກໍລະກົດ ປີທີ່ຜ່ານມາ, ໃນຂໍ້ຫາຮ່ວມກັນປະທ້ວງຕໍ່ຕ້ານລັດຖະບານ, ຂະນະດຽວກັນຍັງປຸກລະດົມໃຫ້ປະຊາຊົນຈຳນວນຫຼາຍຮ່ວມກັນເດີນຂະບວນຂັບໄລ່ລັດຖະບານໃນນະຄອນຫຼວງຮ່າໂນ້ຍ ແລະ ນະຄອນໂຮ່ຈິມິນ, ນອກຈາກນນີ້ ຈຳເລີຍຍັງເປັນແກນນຳໃນການກໍ່ຄວາມເສຍຫາຍແກ່ສະຖານທີ່ທາງລັດຖະການຫຼາຍແຫ່ງ ໂດຍໃຊ້ທັງລະເບີດເພີງ ແລະ ຢາງກະຖຸນ.

ເມື່ອຫວນຄືນໄປເມື່ອເດືອນກໍລະກົດ ປີທີ່ຜ່ານມາ, ສານປະຊາຊົນນະຄອນໂຮ່ຈິມິນ ກໍ່ໄດ້ສັ່ງເທລະເທດທ້າວ ວິນລຽມ ອັນ ຫງວຽນ ຊາວອາເມຣິກາເຊື້ອສາຍຫວຽດນາມ ອາຍຸ 32 ປີ ຂໍ້ຫາຮ່ວມກິດຈະກຳທີ່ຜິດກົດໝາຍ ດ້ວຍການຮ່ວມເດີນຂະບວນປະທ້ວງຕໍ່ຕ້ານລັດຖະບານ ແຕ່ການທີ່ຈຳເລີຍໃຫ້ການຮັບສາລະພາບ ແລະ ສະແດງຄວາມສຳນຶກຢ່າງສູງສຸດຕໍ່ການກະທຳຂອງຕົນເອງ ຜູ້ພິພາກສາຈຶ່ງລະເວັ້ນບົດລົງໂທດຈຳຄຸກທີ່ອາດສູງສຸດເຖິງ 7 ປີ ແຕ່ໃຫ້ເນລະເທດຈຳເລີຍກັບສະຫະລັດ ອາເມຣິກາ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube