ສ.ອາເມຣິກາ-ເກົາຫຼີເໜືອ ກຽມຈັດກອງປະຊຸມສຸດຍອດຜູ້ນຳ ຄັ້ງທີ 3

ສຳນັກຂ່າວຕ່າງປະເທດລາຍງານເມື່ອວັນທີ 26 ມິຖຸນາ 2019 ວ່າ: ທ່ານ ມູນ ແຈ-ອິນ ປະທານປະເທດເກົາຫຼີໃຕ້ເປີດເຜີຍວ່າ ເຈົ້າໜ້າທີ່ຂອງສະຫະລັດ ອາເມຣິກາ ແລະ ເກົາຫຼີເໜືອໄດ້ປຶກສາຫາລືກັນແບບບໍ່ເປີດເຜີຍ ເພື່ອກະກຽມຈັດກອງປະຊຸມສຸດຍອດ ຄັ້ງທີ 3 ລະຫວ່າງທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ກັບ ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ເພື່ອຫາລືເລື່ອງໂຄງການອາວຸດນິວເຄຼຍເກົາຫຼີເໜືອ, ຫຼັງຈາກທີ່ຜ່ານມາໄດ້ສີ່ເດືອນແລ້ວ ນັບຕັ້ງແຕ່ກອງປະຊຸມສຸດຍອດ ຄັ້ງທີ 2 ທີ່ນະຄອນຫຼວງຮ່າໂນ້ຍ ປະເທດຫວຽດນາມ ທີ່ຈົບລົງໂດຍບໍ່ມີການລົງນາມໃນຂໍ້ຕົກລົງໃດໆ.

 

ເຊິ່ງທີ່ຜ່ານມາບໍ່ໄດ້ມີການປຶກສາຫາລືກັນຢ່າງເປັນທາງການລະຫວ່າງເຈົ້າໜ້າທີ່ຂອງສະຫະລັດ ອາເມຣິກາ ກັບ ເກົາຫຼີເໜືອ ນັບຕັ້ງແຕ່ກອງປະຊຸມສຸດຍອດ ຄັ້ງທີ 2 ເມື່ອເດືອນກຸມພາ ທີ່ຜ່ານມາ, ແຕ່ຫຼ້າສຸດມີຄວາມເປັນໄປໄດ້ທີ່ຈະສາມາດຟື້ນຟູກອງປະຊຸມສຸດຍອດ ຄັ້ງທີ 3 ຂຶ້ນມາອີກຄັ້ງ, ເພາະຫາກໍ່ມີການຟື້ນຟູສາຍພົວພັນທາງການທູດລະຫວ່າງສະຫະລັດ ອາເມຣິກາ ກັບ ເກົາຫຼີເໜືອ ໂດຍທ່ານ ໂດໂນ ທຣຳ ແລະ ທ່ານ ຄິມ ຈອງ-ອຶນ ໄດ້ສົ່ງຈົດໝາຍເຖິງກັນ ແລະ ກັນ, ໂດຍຜູ້ນຳສະຫະລັດ ອາເມຣິກາກ່າວວ່າ ຈົດໝາຍຂອງຜູ້ນຳເກົາຫຼີເໜືອນັ້ນຈົບງາມຫຼາຍ, ຂະນະທີ່ຜູ້ນຳເກົາຫຼີເໜືອກໍ່ກ່າວວ່າ ຈົດໝາຍຂອງຜູ້ນຳສະຫະລັດ ອາເມຣິການັ້ນດີເລີດຫຼາຍ ເຖິງແມ່ນວ່າຈະຍັງບໍ່ມີການເປີດເຜີຍເນື້ອໃນຂອງຈົດໝາຍກໍ່ຕາມ.

ໂດຍ ທ່ານ ມູນ ແຈ-ອິນ ຜູ້ນຳເກົາຫຼີໃຕ້ກ່າວວ່າ ທັງຜູ້ນຳສະຫະລັດ ອາເມຣິກາ ແລະ ເກົາຫຼີເໜືອຕ່າງກໍ່ສະແດງຄວາມມຸ່ງໝັ້ນທີ່ຈະເຈລະຈາກັນ ແລະ ຈົດໝາຍຂອງທັງສອງກໍ່ພິສູດໃຫ້ເຫັນແລ້ວ ເຊິ່ງຕົນກໍ່ບໍ່ຄິດດວ່າ ກອງປະຊຸມສຸດຍອດ ທີ່ນະຄອນຫຼວງຮ່າໂນ້ຍນັ້ນລົ້ມເຫຼວ ແຕ່ກອງປະຊຸມດັ່ງກ່າວເປັນໂອກາດຂອງທັງສະຫະລັດ ອາເມຣິກາ ແລະ ເກົາຫຼີເໜືອຈະໄດ້ມີຄວາມເຂົ້າໃຈໃນຈຸດຢືນຂອງກັນ ແລະ ກັນດີຂຶ້ນ ແລະ ນຳທຸກຢ່າງທີ່ຢາກປຶກສາຫາລືເຂົ້າສູ່ໂຕະເຈລະຈາ.