ລຸກຊຳບວກຊ່ວຍເຫຼືອ ສປປ.ລາວ ແລ້ວ 178 ລ້ານເອີໂຣ ແລະ ຈະສືບ​ຕໍ່​ຊ່ວຍ​ເຫຼືອ​​ ເພື່ອໃຫ້​ຫຼຸດ​ພົ້ນ​​ຈາກຄວາມ​ດ້ອຍ​ພັດ​ທະ​ນາ ໃນປີ 2024

ອີງຕາມການລາຍງານຂອງກະຊວງການຕ່າງປະເທດໃຫ້ຮູ້ວ່າ: ໂດຍ​ຕອບ​ສະ​ໜອງ​ຕາມ​ຄຳ​ເຊີນ​ຂອງ​ ທ່ານ ຊອນ ອັສ​ແຊນ​ລ໌ບອນ (H.E. Mr. Jean ASSELBORN) ​ລັດ​ຖະມົນ​ຕີກະ​ຊວງ​ການ​ຕ່າງ​ປະ​ເທດ ​ແລະ ວຽ​ກ​ງານ​ເອີ​ຣົບ ແຫ່ງລາ​ຊະ​ອາ​ນາ​ຈັກລຸກ​ຊຳ​ບວກ, ທ່ານ ສະ​ເຫຼີມ​ໄຊ ກົມ​ມະ​ສິດ ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ ແຫ່ງ ສ​ປ​ປ.ລາວ ພ້ອມ​ດ້ວຍ​ຄະ​ນະ ໄດ້ເດີນທາງຢ້ຽມ​ຢາມ ລາ​ຊະ​ອາ​ນ​ຈັກລຸກ​ຊຳ​ບວກ ຢ່າງເປັນທາງການ, ໃນລະຫວ່າງວັນ​ທີ 26-27 ມິ​ຖຸ​ນາ 2019, ເຊິ່ງ​ເປັນ​ການ​ຢ້ຽມ​ຢາມ​ຄັ້ງ​ທຳອິດ ແລະ ເປັນ​ນິ​ມິດ​ໝາຍ​ອັນ​ສຳ​ຄັນ​ໃນ​ການ​ເສີມ​ຂະ​ຫຍາຍ​ສາຍ​ພົວ​ພັນ​ມິດ​ຕະ​ພາບ ແລະ ການ​ຮ່ວມ​ມື​ອັນ​ດີ​ງາມ ລະ​ຫວ່າງ ສ​ປ​ປ.ລາວ ແລະ ລາຊະອານາຈັກລຸກ​ຊຳ​ບວກ ໃຫ້​ນັບມື້ນັບແໜ້ນແຟ້ນ ແລະ ແຕກດອກ​ອອກ​ຜົນ​ຍິ່ງໆ​ຂຶ້ນ.

ໃນ​ຕອນບ່າຍ​ຂອງ​ວັນ​ທີ 26 ມິ​ຖຸ​ນາ 2019, ທ່ານ ສະ​ເຫຼີມ​ໄຊ ກົມ​ມະ​ສິດ ໄດ້ພົບ​ປະ​ສອງ​ຝ່າຍກັບ ​ທ່ານ ຊອນ ອັສ​ແຊນ​ລ໌ບອນ ເຊິ່ງໄດ້​ດຳ​ເນີນ​ໄປພາຍ​ໃຕ້​ບັນ​ຍາ​ກາດ​ອັນ​ສະ​ໜິດ​ສະ​ໜົມ ແລະ ສ້າງສັນ. ສອງ​ຝ່າຍ ໄດ້​ຕີ​ລາ​ຄາ​ສູງ​ຕໍ່​ສາຍ​ພົວ​ພັນ​ມິດ​ຕະ​ພາບ ແລະ ການ​ຮ່ວມ​ມື​ທີ່​ດີ ລະ​ຫວ່າງ ສປປ.ລາວ ແລະ ລາຊະອານາຈັກລຸກຊໍາບວກ ນັບ​ແຕ່​ສອງປະເທດໄດ້​ສ້າງ​ຕັ້ງ​ສາຍ​ພົວ​ພັນ​ການ​ທູດ​ນຳ​ກັນ ໃນວັນ​ທີ 25 ກັນ​ຍາ 1997 ເປັນຕົ້ນມາ. ພ້ອມກັນນັ້ນ,​ ກໍ່ໄດ້ທົບທວນຄືນການ​ຊ່ວຍ​ເຫຼືອ​ຂອງ​ລາ​ຊະ​ອາ​ນາ​ຈັກລຸກ​ຊຳ​ບວກ ແກ່ ສ​ປ​ປ.ລາວ ເຊິ່ງສຸມ​ໃສ່​ຂະ​ແໜງ​ການ​ບຸລິ​ມະ​ສິດຂອງແຜນພັດທະນາເສດຖະກິດ-ສັງຄົມ ໃນໄລຍະຜ່ານມາຮອດປັດຈຸບັນ ເຊັ່ນ: ດ້ານ​ການ​ສຶກສາ, ສາທາລະນະ​ສຸກ, ອຸດສາ​ຫະກຳການທ່ອງທ່ຽວ, ການເກັບກູ້ລະເບີດບໍ່ທັນແຕກຢູ່ລາວ, ໂຮງ​ແຮມ ແລະ ການບໍລິ​ການ, ການ​ເງິນ-ການ​ທະນາຄານ, ພັດທະນາ​ຊົນນະບົດ ​ແລະ ພື້ນຖານ​ໂຄງ​ລ່າງ.

ສຳ​ລັບ​ການ​ຊ່ວຍ​ເຫຼືອ​ຂອງລຸກ​ຊຳ​ບວກ ແມ່ນເປັນແຜນງານ​ຮ່ວມ​ມືໄລຍະຍາວ ລະ​ຫວ່າງ ​ສອງ​ລັດ​ຖະ​ບານ (Indicative Cooperation Programme (ICP) ແລະ ຈັດເປັນ​ແຕ່​ລະ​ໄລ​ຍະ, ເຊິ່ງມາ​ເຖິງ​ປັດ​ຈຸ​ບັນ​ ​ປະ​ຕິ​ບັດໄດ້​ 4 ໄລ​ຍະ​ແລ້ວ​ ຄື:

1) ICP I ແຕ່ປີ 2003-2006 ມູນ​ຄ່າ 18 ລ້ານ​ເອີ​ໂຣ,

2) ICP II ແຕ່ປີ 2007-2010 ​ມູນ​ຄ່າ 35 ລ້ານ​ເອີ​ໂຣ,

3) ICP III ແຕ່ປີ 2011-2015 ມູນ​ຄ່າ 50 ລ້ານ​ເອີ​ໂຣ

4) ICP IVແຕ່ປີ 2016-2020 ມູນ​ຄ່າ 75 ລ້ານເອີໂຣ

ລວມມູນຄ່າການຊ່ວຍເຫຼືອທັງໝົດ ນັບແຕ່ປີ 2003 ເປັນຕົ້ນມາ ມີເຖິງ 178 ລ້ານເອີໂຣ. ​ໃນ​ໂອ​ກາດນີ້, ທ່ານ​ລັດ​ຖະ​ມົນ​ຕີ​ ສະ​ເຫຼີມ​ໄຊ ກົມ​ມະ​ສິດ ໄດ້​ຕາງໜ້າໃຫ້ລັດຖະບານສະ​ແດງ​ຄວາມ​ຮູ້​ບຸນ​ຄຸນຢ່າງສູງ​ຕໍ່​ການ​ຊ່ວຍ​ເຫຼືອ​ອັນ​ລ້ຳ​ຄ່າຂອງ​ ລັດ​ຖະ​ບານ ແລະ ປະ​ຊ​າ​ຊົນ​ລຸກ​ຊຳ​ບວກ ໃຫ້ແກ່ ສປປ.ລາວ ໃນການຈັດຕັ້ງປະຕິບັດ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ ຂອງຕົນໃຫ້ມີຄວາມກ້າວໜ້າ ແລະ ປະສົບຜົນສຳເລັດເປັນຢ່າງດີ, ອັນເປັນການປະກອບສ່ວນອັນສຳຄັນ ເຂົ້າໃນການປັບປຸງຊີວິດການເປັນຢູ່ຂອງປະຊາຊົນລາວບັນດາເຜົ່າ ໃຫ້ດີຂຶ້ນເທື່ອລະກ້າວ.

ຄຽງ​ຄູ່​ກັນ​ນັ້ນ, ສອງ​ຝ່າຍ​ ໄດ້​ປຶກ​ສາ​ຫາ​ລື​ທິດ​ທາງ​ແຜນ​ການ​ຮ່ວມ​ມື​ໃນ​ຕໍ່​ໜ້າ​ ລວມທັງ​ການ​ຮ່ວມ​ມື​ ລະ​ຫວ່າງ​ສອງ​ກະ​ຊວງ​ການ​ຕ່າງ​ປະ​ເທດ ​ລ​າວ-ລຸກ​ຊໍາບວກ. ໃນ​ຂະ​ນະ​ດຽວ​ກັນນັ້ນ​, ຝ່າຍ​ລຸກ​ຊຳ​ບວກ ກໍ່ໄດ້​ຢືນ​ຢັນ​ທີ່​ຈະ​ສືບ​ຕໍ່ໃຫ້​ການ​ຊ່ວຍ​ເຫຼືອ​​ເພີ່ມ​ຕື່ມ ເພື່ອປະກອບສ່ວນຊ່ວຍເຫຼືອໃຫ້ ສ​ປ​ປ.ລາວ ​ຫຼຸດ​ພົ້ນ​ອອກ​ຈາກ​ສະ​ຖາ​ນະ​ພາບ​ດ້ອຍ​ພັດ​ທະ​ນາ ໃນປີ 2024 ແລະ ບັນ​ລຸ​ເປົ້າ​ໝາຍ​ການ​ພັດ​ທະ​ນາ​ແບບ​ຍືນ​ຍົງ​ເທື່ອ​ລະ​ກ້າວ. ​ນອກ​ຈາກນັ້ນ, ສອງ​ຝ່າຍ ​ຍັງ​ໄດ້​ແລກ​ປ່ຽນ​ທັດ​ສະ​ນະກ່ຽວ​ກັບ​ບັນ​ຫາ​ພາກ​ພື້ນ ແລະ ສາ​ກົນ ທີ່​ຕ່າງ​ຝ່າຍ​ຕ່າງ​ມີ​ຄວາມ​ສົນ​ໃຈຮ່ວມກັນ.

ທ່ານ ຊາວີເອ ແບນແຕນ ນາ​ຍົກ​ລັດ​ຖະ​ມົນ​ຕີ ແຫ່ງລາຊະອານາຈັກ ລຸກຊໍາບວກ ແລະ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ.ລາວ

ໃນ​ໂອ​ກາດ​ຢ້ຽມ​ຢາມ​ທາງ​ການ ທີ່ ລາ​ຊະ​ອາ​ນາ​ຈັກລຸກ​ຊຳ​ບວກ ໃນ​ຄັ້ງ​ນີ້, ນອກ​ຈາກ​ການ​ພົບ​ປະ​ສອງ​ຝ່າຍ ກັບ ທ່ານ ຊອນ ອັສ​ແຊນ​ລ໌ບອນ, ​ລັດ​ຖະມົນ​ຕີກະ​ຊວງ​ການ​ຕ່າງ​ປະ​ເທດ ​ແລະ ວຽ​ກ​ງານ​ເອີ​ຣົບ ແລະ ພົບ​ປະ​ກັບ ທ່ານ ນາງ Paulette Lenert, ລັດ​ຖະ​ມົນ​ຕີ​ຮ່ວມ​ມື ເພື່ອການ​ພັດ​ທະ​ນາ ແລະ ​ມະ​ນຸດ​ສະ​ທຳ ແຫ່ງລາ​ຊະ​ອາ​ນາ​ຈັກລຸກ​ຊຳ​ບວກ ແລ້ວ, ທ່ານລັດຖະມົນຕີ ສະເຫຼີມໄຊ ກົມມະສິດ ແລະ ຄະນະ ຍັງໄດ້ເຂົ້າຢ້ຽມຂໍ່ານັບທ່ານ ຊາວີເອ ແບນແຕນ (Xavier Bettel), ນາ​ຍົກ​ລັດ​ຖະ​ມົນ​ຕີ ແຫ່ງລາຊະອານາຈັກ ລຸກຊໍາບວກ​ ແລະ ທ່ຽວຊົມ ສະຖານທີ່ທ່ອງທ່ຽວທີ່ສຳຄັນທາງປະຫວັດສາດຈໍານວນ​ໜຶ່ງໃນລຸກ​ຊຳ​ບວກ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube