ນາຍົກເຢຍລະມັນຢືນໂຕສັ່ນ ເຖິງ 2 ຄັ້ງ ຂະນະປະຕິບັດໜ້າທີ່ ເຮັດໃຫ້ຫຼາຍຝ່າຍເປັນຫ່ວງເລື່ອງສຸຂະພາບ (ວິດີໂອ)

ສຳນັກຂ່າວຕ່າງປະເທດລາຍງານ 28 ມິຖຸນາ 2019 ວ່າ: ທຳນຽບນາຍົກລັດຖະມົນຕີເຢຍລະມັນອອກຖະແຫຼງການ ເມື່ອວັນພະຫັດທີ່ຜ່ານມາ ວ່າທ່ານ ນາງ ອັງເກລາ ແມເຄິ ນາຍົກລັດຖະມົນຕີເຢຍລະມັນ ສະບາຍດີ, ທ່ານນາງຍັງສາມາດປະຕິບັດໜ້າທີ່ໄດ້ຕາມປົກກະຕິ ແລະ ຈະບໍ່ມີການຍົກເລີກກຳນົດການປະຕິບັດໜ້າທີ່ທີ່ກຽມໄວ້ແລ້ວ ເຊິ່ງລວມເຖິງການເຂົ້າຮ່ວມກອງປະຊຸມສຸດຍອດຜູ້ນຳກຸ່ມປະເທດເສດຖະກິດຂະໜາດໃຫຍ່ G20 ທີ່ເມືອງໂອຊາກ້າ ປະເທດຍີ່ປຸ່ນ ທີ່ມີລາຍງານວ່າທ່ານ ນາງ ອັງເກລາ ແມເຄິ ເດີນທາງເຖິງຍີ່ປຸ່ນຕາມກຳນົດໝາຍ.

ຖະແຫຼງການດັ່ງກ່າວຂອງລັດຖະບານເຢຍລະມັນ ໄດ້ຮັບການເຜີຍເຜີຍອອກມາພຽງບໍ່ພໍເທົ່າໃດຊົ່ວໂມງ ພາຍຫຼັງທີ່ຜູ້ນຳຂອງເຢຍລະມັນ ມີອາການໂຕສັ່ນທີ່ເຫັນໄດ້ຢ່າງຊັດເຈນ ໃນລະຫວ່າງການຢືນຮ່ວມຖະແຫຼງຂ່າວກັບທ່ານ ຟຣັງ ວໍເຕີ ສະຕຽນໄມເອີ ປະທານປະເທດເຢຍລະມັນ ໃນພິທີອຳລາທ່ານ ນາງ ຄາທາຣິນາ ບາລີ ທີ່ລາອອກຈາກຕຳແໜ່ງລັດຖະມົນຕີກະຊວງຍຸຕິທຳ ໄປດຳລົງຕຳແໜ່ງສະມາຊິກສະພາເອີຣົບ.

ເຊິ່ງອາການດັ່ງກ່າວເປັນອາການຄ້າຍກັບທີ່ເກີດຂຶ້ນໃນລະຫວ່າງທີ່ທ່ານ ນາງ ອັງເກລາ ແມເຄິ ຕ້ອນຮັບທ່ານ ໂວໂລດິເມຍ ເຊເລນສະກີ ປະທານປະເທດອູແກຣນ ທີ່ເດີນທາງມາຢ້ຽມຢາມນະຄອນຫຼວງແບັກແລັງ (ເບີລິນ) ເມື່ອວັນທີ 18 ມິຖຸນາ ທີ່ຜ່ານມາ, ໂດຍໃນຄັ້ງນັ້ນຄະນະຂອງທ່ານ ນາງ ອັງເກລາ ແມເຄິ ໃຫ້ຂ່າວວ່າເປັນເພາະພິທີການເກີດຂຶ້ນກາງແຈ້ງທ່າມກາງສະພາບອາກາດຮ້ອນຈັດ ແລະ ທ່ານນາງດື່ມກາເຟຫຼາຍເກີນໄປ ແຕ່ດື່ມນ້ຳໜ້ອຍກ່ອນອອກງານໃນວັນນັ້ນ ແລະ ສຳລັບເຫດການຫຼ້າສຸດທາງລັດຖະບານຍັງໃຫ້ເຫດຜົນບໍ່ຕ່າງຈາກເດີມ ວ່າເປັນເພາະສະພາບອາກາດທີ່ຮ້ອນໃນໄລຍະນີ້.

ເຊິ່ງຕະຫຼອດໄລຍະເວລາກວ່າ 14 ປີທີ່ຢູ່ໃນຕຳແໜ່ງ ທ່ານ ນາງ ອັງເກລາ ແມເຄິ ອາຍຸ 64 ປີ ບໍ່ເຄີຍມີປະຫວັດການເຂົ້າໂຮງໝໍ ຫຼື ເຈັບປ່ວຍໜັກຈັກເທື່ອ ໂດຍພາບທີ່ປາກົດໃນສາຍຕາຂອງຄົນທົ່ວໂລກ ຄືການປະຕິບັດໜ້າທີ່ຢ່າງເຂັ້ມແຂງ, ໃນດ້ານຂອງສື່ທ້ອງຖິ່ນວິເຄາະສິ່ງທີ່ເກີດຂຶ້ນວ່າ ຫາກທ່ານ ນາງ ອັງເກລາ ແມເຄິ ບໍ່ສະບາຍແທ້ ບໍ່ວ່າຈະດ້ວຍໂລກອັນໃດກໍ່ຕາມ ລັດຖະບານຕ້ອງບໍ່ປິດບັງປະຊາຊົນ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube