ເພື່ອບໍ່ໃຫ້ປະຫວັດສາດຊ້ຳຮອຍຮອບ 4 ລັດຮ່ວມກັບຊ່ຽວຊານສາກົນຕິດຕາມ ແລະ ກວດກາເຂື່ອນທົ່ວປະເທດ

ວິທະຍຸກະຈາຍສຽງແຫ່ງຊາດ (LNR) ລາຍງານວ່າ: ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ໃຫ້ສໍາພາດໃນໂອກາດເຂົ້າຮ່ວມກອງປະຊຸມລັດຖະບານເປີດກ້ວາງ ຄັ້ງທີ I ປີ 2019 ເຊິ່ງຈັດຂຶ້ນຢູ່ນະຄອນຫຼວງວຽງຈັນ ໃນລະຫວ່າງວັນທີ 26-27 ມິຖຸນາ 2019 ນີ້ວ່າ: ຫຼັງຈາກທີ່ໃນປີ 2018 ຜ່ານມາ ໄດ້ເກີດສະພາບໄພພິບັດຢ່າງໃຫຍ່ຫຼວງແບບທີ່ບໍ່ເຄີຍມີມາກ່ອນຢູ່ລາວ, ກະຊວງ ພະລັງງານ ແລະ ບໍ່ແຮ່ ກໍ່ຄື ລັດຖະບານ ຈຶ່ງໄດ້ຈັດຕັ້ງຄະນະກໍາມະການແກ້ໄຂໄພພິບັດ ຫລື ຄະນະກໍາມະການຄຸ້ມຄອງຄວາມປອດໄພຂອງເຂື່ອນ ໂດຍມີສາກົນເຂົ້າຮ່ວມນຳເພື່ອລົງຕິດຕາມກວດກາສະພາບຂອງແຕ່ລະເຂື່ອນໃນທົ່ວປະເທດ.

ມາຮອດປັດຈຸບັນ, ລາວປະກອບມີແຫຼ່ງຜະລິດກະແສໄຟຟ້າ ທັງຫມົດ 63 ແຫ່ງ, ໃນນັ້ນ ມີ 55 ໂຄງການເຂື່ອນໄຟຟ້າ ໄດ້ມອບໃຫ້ 6 ທີມງາມກ່ຽວຂ້ອງລົງເຄື່ອນໄຫວຕິດຕາມກວດກາຄວາມປອດໄພຂອງແຕ່ລະເຂື່ອນ ໂດຍສົມທົບກັບຜູ້ລົງທຶນຂອງເຂື່ອນທີ່ຕ້ອງມີຊ່ຽວຊານຂອງຕົນເອງເພື່ອກວດກາຄວາມປອດໄພຂອງເຂື່ອນ ພ້ອມທັງລາຍງານໃຫ້ລັດຖະບານໄດ້ຮັບຮູ້ນຳ ເປັນແຕ່ລະໄລຍະ

ທ່ານລັດຖະມົນຕີກະຊວງພະລັງງານ ແລະ ບໍ່ແຮ່ ໃຫ້ຮູ້ຕື່ມວ່າ: ສໍາລັບບັນດາເຂື່ອນໄຟຟ້າທີ່ພວມດໍາເນີນການກໍ່ສ້າງຢູ່ລາວໃນປັດຈຸບັນ ແມ່ນໄດ້ມີການຕິດຕາມກວດກາເຊັ່ນດຽວກັນ ໂດຍສົມທົບກັບອົງການຈັດຕັ້ງສາກົນ ແລະ ສປ.ຈີນ ທີ່ໃຫ້ການສະໜັບສະໜູນດ້ານຕ່າງໆ, ເຊິ່ງປັດຈຸບັນພວມດໍາເນີນການຢູ່; ສ່ວນບັນດາເຂື່ອນທີ່ກໍາລັງກະກຽມການກໍ່ສ້າງຢູ່ນັ້ນ ກໍ່ໄດ້ມີການຕິດຕາມກວດກາຢ່າງເປັນລະບົບຄົບຊຸດ ເພື່ອຮັບປະກັນບໍ່ໃຫ້ມີຜົນກະທົບຕ່າງໆເກີດຂຶ້ນເຊິ່ງຈະສ້າງຄວາມເສຍຫາຍດ້ານຊີວິດ ແລະ ຊັບສິນຂອງປະຊາຊົນ. ຖ້າຫາກພົບເຫັນວ່າຜູ້ລົງທຶນທ່ານໃດຫາກບໍ່ມີມາດຕະຖານພຽງພໍ ກໍ່ຈະສະເໜີລັດຖະບານບໍ່ໃຫ້ອະນຸມັດຕໍ່ນັກລົງທຶນເຫຼົ່ານັ້ນໄດ້ເຄື່ອນໄຫວຢ່າງເດັດຂາດ, ເຊິ່ງໃນໄລຍະຜ່ານມາ ກໍ່ໄດ້ມີຫລາຍໂຄງການແລ້ວທີ່ຖືກຍົກເລີກໄປ ຍ້ອນບໍ່ໄດ້ມາດຕະຖານຕາມທີ່ໄດ້ກໍານົດໄວ້.

ປັດຈຸບັນ, ແຫຼ່ງຜະລິດພະລັງງານໄຟຟ້າຢູ່ໃນລາວ ມີທັງໝົດ 63 ແຫ່ງ ດ້ວຍກໍາລັງຕິດຕັ້ງລວມ 7,213 ເມກາວັດ, ເຊິ່ງສາມາດຜະລິດພະລັງງານໄຟຟ້າອອກຮັບໃຊ້ທັງພາຍໃນ ແລະ ຕ່າງປະເທດ ໄດ້ທັງໝົດ 37 ຕື້ກິໂລວັດໂມງຕໍ່ປີ. ແນວໃດກໍ່ຕາມ, ໃນໄລຍະຜ່ານມາ, ລາວກໍ່ເຄີຍປະສົບບັນຫາອັນໜັກໜ່ວງ ກ່ຽວກັບກັບເຂື່ອນໄຟຟ້າມາແລ້ວ 3 ຄັ້ງໃຫຍ່ ຄື:

ຄັ້ງທີ 1 ແມ່ນເຫດການອຸບມົງໄຟຟ້າເຂື່ອນເຊກະໝານ 3 ຢູ່ເມືອງ ດາກຈຶງ ແຂວງເຊກອງແຕກໃນເດືອນ ທັນວາ ປີ 2016;

ຄັ້ງທີ 2 ແມ່ນເຂື່ອນໄຟຟ້ານ້ຳອ້າວຢູ່ເມືອງ ຜາໄຊ, ແຂວງຊຽງຂວາງແຕກໃນເດືອນ ກັນຍາ ປີ 2017 ແລະ

ຄັ້ງຫ້າ ສຸດຄັ້ງທີ 3 ແມ່ນເຫດການຄູກັ້ນນ້ຳອ່າງເກັບນ້ຳສຳຮອງໂຄງການເຂື່ອນໄຟຟ້າເຊປຽນ-ເຊນ້ຳນ້ອຍແຕກຢູ່ເມືອງສະໜາມໄຊ, ແຂວງ ອັດຕະປື ໃນຄໍ່າຄືນຂອງວັນທີ 23 ກໍລະກົດ 2018 ເຊິ່ງໄດ້ສ້າງຄວາມເສຍຫາຍທາງດ້ານຊີວິດ ແລະ ຊັບສິນຂອງປະຊາຊົນຢ່າງໜັກໜ່ວງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube