ອຳມະຫິດເກີນມະນຸດ ຂັງແຮງງານແມ່ຍິງ ແລະ ເດັກນ້ອຍ ອົດເຂົ້າ 5 ວັນ ອາໄສກິນແຕ່ນ້ຳຝົນ (ວິດີໂອ)

ສຳນັກຂ່າວໄທລາຍງານເມື່ອວັນທີ 29 ມິຖຸນາ 2019 ທີ່ຜ່ານມາວ່າ: ເຈົ້າໜ້າທີ່ຕຳຫຼວດ ແລະ ສູນປົກປ້ອງເດັກ, ແມ່ຍິງ, ຄອບຄົວ ແລະ ປ້ອງກັນປາມປາບການຄ້າມະນຸດຂອງໄທ ໄດ້ຮັບແຈ້ງຈາກພົນລະເມືອງດີວ່າ ມີການນຳແຮງງານມາຂັງໄວ້ໃນສາງຮ້າງແຫ່ງໜຶ່ງໃນຈັງຫວັດສົງຂາ ທາງພາກໃຕ້ຂອງໄທ ທີ່ມີຊາຍແດນຕິດກັບເມເລເຊຍ ເນື່ອງຈາກຊາວບ້ານໄດ້ຍິນສຽງເດັກນ້ອຍຮ້ອງອອກມາຈາກໃນສາງຜິດປົກກະຕິມາຫຼາຍວັນແລ້ວ.

ເມື່ອເຈົ້າໜ້າທີ່ໄປເຖິງສະຖານທີ່ ພົບວ່າປະຕູມີການລ່າມດ້ວຍໂຊ້ເຫຼັກ ລັອກກຸນແຈແໜ້ນໜາ ເພື່ອປ້ອງກັນການຫຼົບໜີ ຈຶ່ງໄດ້ຮີບງັດປະຕູຢ່າງເລັ່ງດ່ວນ ເນື່ອງຈາກພາຍໃນສາງມີສຽງຮ້ອງຂອງເດັກນ້ອຍ ແລະ ຜູ້ຍິງ.

ແລະ ຕ້ອງພົບກັບສະພາບອັນໜ້າສະຫຼົດໃຈ ແລະ ໜ້າສົງສານ ເນື່ອງຈາກມີຄົນທັງຜູ້ໃຫຍ່ ແລະ ເດັກນ້ອຍຢູ່ໃນສາງທ່າມກາງຄວາມມືດ ເພາະບໍ່ມີປ່ອງຢ້ຽມ, ບໍ່ມີໄຟຟ້າ ແລະ ທຸກຄົນຕ່າງດີໃຈທີ່ເຈົ້າໜ້າທີ່ເຂົ້າຊ່ວຍເຫຼືອ, ຈຶ່ງຮີບນຳຕົວອອກມາຈາກສາງລວມທັງໝົດ 20 ຄົນ ເປັນຊາຍ 9, ແມ່ຍິງ 6 ແລະ ເດັກນ້ອຍ 5 ຄົນ ໃນຈຳນວນນີ້ມີເດັກນ້ອຍອາຍຸຕ່ຳສຸດ 1 ປີ 3 ເດືອນ 1 ຄົນ ເຊິ່ງຍັງນັ່ງຢູ່ໃນຕັກຂອງພໍ່ແມ່ ສ່ວນທີ່ເຫຼືອເປັນເດັກນ້ອຍອາຍຸແຕ່ 6 ປີເຖິງ 14 ປີ.

 

ຈາການສືບສວນສອບສວນຮູ້ວ່າ ແຮງງານກຸ່ມນີ້ເປັນຊາວມຽນມາ ຖືກນຳມາຂັງໄວ້ໃນສາງຮ້າງແຫ່ງນີ້ 5 ວັນແລ້ວ ແລະ ຢູ່ໃນສະພາບອົດຢາກບໍ່ໄດ້ກິນເຂົ້າ,​ ອາໄສກິນນ້ຳທີ່ໄຫຼມາທາງຫຼັງຄາຕອນຝົນຕົກປະຄອງຊີວິດ ເຮັດໃຫ້ເດັກນ້ອຍທົນບໍ່ໄຫວເພາະຄວາມຫິວໂຊຈຶ່ງຮ້ອງໄຫ້ ຊາວບ້ານໄດ້ຍິນຈຶ່ງແຈ້ງໃຫ້ເຈົ້າໜ້າທີ່ເຂົ້າໄປກວດສອບ ແລະ ໃຫ້ການຊ່ວຍເຫຼືອໄວ້.

ແລະ ຈາກສະພາບທີ່ພົບ ຄາດວ່າຖືກນາຍໜ້າພາມາກັກຂັງໄວ້ ເພື່ອລໍຖ້າສົ່ງຕໍ່ໄປຍັງປາຍທາງໃນປະເທດມາເລເຊຍ ດັ່ງທີ່ເຈົ້າໜ້າທີ່ຊຸດນີ້ເຄີຍຈັບກຸມໄດ້ຢ່າງຕໍ່ເນື່ອງກ່ອນໜ້ານີ້. ຫຼັງຈາກຊ່ວຍເຫຼືອແລ້ວໜ່ວຍງານທີ່ກ່ຽວຂ້ອງຂອງໄທໄດ້ສັ່ງໃຫ້ເບິ່ງແຍງແຮງງານກຸ່ມນີ້ທັງໝົດຢ່າງດີທີ່ສຸດ ໂດຍສະເພາະເດັກນ້ອຍ ແລະ ໃຫ້ສອບຖາມເຫຍື່ອ ເພື່ອຂະຫຍາຍຜົນໄປຍັງນາຍໜ້າທີ່ນຳພາກຸ່ມຄົນເຫຼົ່ານີ້ເຂົ້າມາ ເຊິ່ງຖືເປັນເຫຍື່ອຂອງຂະບວນການຄ້າມະນຸດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube