ເຖິງຈະປະກາດສະຫງົບເສິກສົງຄາມການຄ້າ, ທີ່ປຶກສາ ປ.ທຣຳ ຢືນຢັນວ່າຫົວເຫວີ່ຍຍັງຈະຢູ່ໃນບັນຊີດຳ

ສຳນັກຂ່າວຕ່າງປະເທດລາຍງານເມື່ອວັນທີ 30 ມິຖຸນາ 2019 ທີ່ຜ່ານມາວ່າ: ທ່ານ ແລຣີ ກຸດໂລ ທີ່ປຶກສາດ້ານນະໂຍບາຍເສດຖະກິດຂອງທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ກ່າວໃນລາຍການ Fox News Sunday ເມື່ອວັນອາທິດທີ່ຜ່ານມາ ກ່ຽວກັບຜົນການປຶກສາຫາລືລະຫວ່າງທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ກັບທ່ານ ສີ ຈິ້ນຜິງ ປະທານປະເທດຈີນ ນອກຮອບກອງປະຊຸມສຸດຍອດຜູ້ນຳກຸ່ມປະເທດເສດຖະກິດຂະໜາດໃຫຍ່ G20 ທີ່ໂອຊາກ້າ ປະເທດຍີ່ປຸ່ນ ເມື່ອວັນເສົາທີ່ຜ່ານມາ ເຊິ່ງນຳໄປສູ່ການສະຫງົບເສິກສົງຄາມການຄ້າຮອບໃໝ່ ເຊິ່ງທ່ານ ແລຣີ ກຸດໂລ ຕີລາຄາວ່າ ຢ່າງໜ້ອຍຕອນນີ້ໜ້າຈະເປັນໂອກາດດີ ໃຫ້ແກ່ບໍລິສັດຂອງສະຫະລັດ ອາເມຣິກາ ໃນການຂໍໃບອະນຸຍາດຈາກກະຊວງການຄ້າ ເພື່ອທຳການຄ້າຂາຍກັບຫົວເຫວີ່ຍ ແລະ ອາດເພີ່ມຈຳນວນໃນອະນາຄົດ ເຊັ່ນດຽບກັບຫົວເຫວີ່ຍທີ່ກັບມາຄ້າຂາຍກັບບໍລິສັດຂອງສະຫະລັດ ອາເມຣິກາ ໄດ້ຕາມເດີມ.

ເຖິງຢ່າງໃດກໍ່ຕາມ, ທ່ານ ແລຣີ ກຸດໂລ ຢືນຢັນວ່າຫົວເຫວີ່ຍຈະຍັງຢູ່ໃນບັນຊີດຳຂອງກະຊວງການຄ້າ ສະຫະລັດ ອາເມຣິກາຕໍ່ໄປ ເພື່ອໃຫ້ລັດຖະບານສາມາດຄວບຄຸມກວດສອບໄດ້ຢ່າງລະອຽດກ່ອນອອກໃບອະນຸຍາດໃຫ້ແກ່ຜູ້ປະກອບການຂອງສະຫະລັດ ອາເມຣິກາ ແລະ ກວດສອບເອກະສານຂອງຫົວເຫວີ່ຍ ໃນການຄ້າຂາຍ ແລະ ເຮັດທຸລະກິດຮ່ວມກັນ, ເຊິ່ງສະຫະລັດ ອາເມຣິກາຍັງເຊື່ອວ່າຫົວເຫວີ່ຍທີ່ປັດຈຸບັນເປັນຜູ້ຜະລິດສະມາດໂຟນລາຍໃຫຍ່ອັນດັບ 2 ຂອງໂລກຮອງຈາກຊຳຊຸງຂອງເກົາຫຼີໃຕ້ ແລະ ເປັນອັນດັບ 1 ໃນການພັດທະນາລະບົບ 5G ຄືປະຕູລັບຂອງລັດຖະບານຈີນໃນການປະຕິບັດການທາງໄຊເບີ ເຊິ່ງຫົວເຫວີ່ຍປະຕິເສດມາໂດຍຕະຫຼອດ.

ເຖິງຢ່າງໃດກໍ່ຕາມ, ສຳນັກຂ່າວ Bloomberg ລາຍງານເມື່ອອາທິດທີ່ຜ່ານມາ ໂດຍອ້າງແຫຼ່ງຂ່າວວ່າ ຫົວເຫວີ່ຍມີທີມງານຊຸດພິເສດກຸ່ມໜຶ່ງ ທີ່ປະຕິບັດງານຮ່ວມກັບກອງທັງປົດປ່ອຍປະຊາຊົນຈີນແລ້ວຢ່າງໜ້ອຍ 10 ໂຄງການ ນັບຕັ້ງແຕ່ທ່ານ ເຫຼິນ ເຈິ້ງເຟີຍ ເຊິ່ງເປັນອະດີດນັກວິເຄາະຂອງກອງທັບປົດປ່ອຍປະຊາຊົນຈີນ ລາອອກມາສ້າງຕັ້ງບໍລິສັດຫົວເຫວີ່ຍ ເມື່ອປີ 1987 ໂດຍໂຄງການສ່ວນໃຫຍ່ເນັ້ນການພັດທະນາປັນຍາປະດິດ (AI) ແລະ ວິທະຍຸສື່ສານ ແລະ ຫົວເຫວີ່ຍຍັງຢືນຢັນປະຕິເສດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube