ອີຣານປະກາດ ມີປະລິມານຢູເຣນຽມເສີມສະມັດຖະພາບເກີນມາດຕະຖານປະລະມານູນສາກົນ

ສຳນັກຂ່າວຕ່າງປະເທດລາຍງານ 2 ກໍລະກົດ 2019 ວ່າ: ທ່ານ ໂມຮຳໝັດ ຈາວາດ ຊາຣີບ ລັດຖະມົນຕີກະຊວງການຕ່າງປະເທດອີຣານ ຖະແຫຼງເມື່ອວັນຈັນ ທີ່ຜ່ານມາ ວ່າໂຄງການຍົກລະດັບການເສີມສະມັດຖະພາບຢູເຣນຽມ ຂອງລັດຖະບານອີຣານດຳເນີນໄປຢ່າງມີປະສິດທິພາບ ຕັ້ງແຕ່ກາງເດືອນທີ່ຜ່ານມາ ຜົນຜະລິດໄດ້ເກີນເກນ 300 ກິໂລກຣາມຕາມທີ່ວົງການພະລັງງານປະລະມານູລະຫວ່າງປະເທດ (IAEA) ກຳນົດໄວ້ໃນຂໍ້ຕົກລົງນິວເຄຼຍ ສະບັບປີ 2015 ພ້ອມທັງຢືນຢັນວ່າປະລິມານຢູເຣນຽມເສີມສະມັດຖະພາບທີ່ເພີ່ມຂຶ້ນນັ້ນ ບໍ່ໄດ້ເປັນການລະເມີດຂໍ້ຕົກລົງ ເນື່ອງຈາກອີຣານໄດ້ຍົກເລີກການປະຕິບັດຕາມຫຍໍ້ໜ້າທີ 36 ຂອງຂໍ້ຕົກລົງ ເຊິ່ງມີເນື້ອໃນກ່ຽວກັບບັນຫາດັ່ງກ່າວ ເມື່ອເດືອນພຶດສະພາ ທີ່ຜ່ານມາ ຫຼື 1 ປີຫຼັງຈາກທີ່ລັດຖະບານສະຫະລັດ ອາເມຣິກາພາຍໃຕ້ການນຳຂອງທ່ານ ໂດໂນ ທຣຳ ປະກາດຖອນຕົວອອກຈາກຂໍ້ຕົກລົງສະບັບດຽວກັນ.

ເຖິງຢ່າງໃດກໍ່ຕາມ, ທ່ານ ໂມຮຳໝັດ ຈາວາດ ຊາຣີບ ກ່າວວ່າລັດຖະບານອີຣານ ພ້ອມກັບມາປະຕິບັດຕາມຂໍ້ຕົກລົງໃນຫຍໍ້ໜ້າທີ 36 ຕາມເດີມ ເມື່ອໃດກໍ່ຕາມທີ່ຄູ່ຮ່ວມທີ່ຍັງເຫຼືອຢູ່ໃນຂໍ້ຕົກລົງສາມາດປະຕິບັດຕາມເງື່ອນໄຂ ຫຼື ສະແຫວງຫາແນວທາງອື່ນທີ່ດີກວ່າໄດ້, ໂດຍສະເພາະກຸ່ມ E3 ເຊິ່ງໝາຍເຖິງອັງກິດ, ຝຣັ່ງ ແລະ ເຢຍລະມັນ, ນອກເໜືອຈາກລັດເຊຍ, ຈີນ ແລະ ສະຫະພາບເອີຣົບ (EU), ໃນດ້ານຂອງ IAEA ອອກລາຍງານຢືນຢັນວ່າ ປະລິມານຢູເຣນຽມເສີມສະມັດຖະພາບຂອງອີຣານເກີນຂໍ້ຕົກລົງ 300 ກິໂລກຣາມຈິງ ໂດຍແຫຼ່ງຂ່າວໃນ IAEA ປະເມີນວ່າຕອນນີ້ໜ້າຈະຢູ່ປະມານ 302 ກິໂລກຣາມ.

ຂະນະທີ່ອັງກິດ ແລະ ເຢຍລະມັນ ອອກຖະແຫຼງການໃນເວລາໄລ່ເລ່ຍກັນ ວ່າສະຖານະການທີ່ເກີດຂຶ້ນມີຄວາມໜ້າເປັນຫ່ວງຢ່າງຍິ່ງ ແລະ ຮຽກຮ້ອງໃຫ້ອີຣານຖອຍເພີ່ມອີກກ້າວໜຶ່ງ ຈາກການເຂົ້າສູ່ຈຸດແຫ່ງຄວາມຂັດແຍ່ງ, ສ່ວນທ່ານ ເຊີເກ ຣິບຄັອບ ຮອງລັດຖະມົນຕີກະຊວງການຕ່າງປະເທດລັດເຊຍ ກ່າວເຖິງການກັບມາເສີມສະມັດຖະພາບຢູເຣນຽມຂອງອີຣານ ວ່າເປັນຜົນມາຈາກການເກີດຄວາມຜິດຫວັງຕໍ່ທຸກຝ່າຍທີ່ຮ່ວມຂໍ້ຕົກລົງ ໂດຍສະເພາະແຮງກົດດັນທຸກດ້ານຈາກລັດຖະບານສະຫະລັດ ອາເມຣິກາ ທີ່ສຸມເຂົ້າໃສ່ຢ່າງຕໍ່ເນື່ອງ.

ຕໍ່ມາທຳນຽບຂາວອອກຖະແຫຼງການວິຈານອີຣານ ວ່າລະເມີດບັນທັດຖານໂລກ ມາຕັ້ງແຕ່ກ່ອນທີ່ຈະມີຂໍ້ຕົກລົງເກີດຂຶ້ນແລ້ວ ແລະ ທ່ານ ເບນຈາມິນ ເນທັນຢາຮູ ນາຍົກລັດຖະມົນຕີອິດສະຣາແອນ ຮຽກຮ້ອງສະຫະພາບເອີຣົບເພີ່ມມາດຕະການຂວໍ້າບາດຕໍ່ອີຣານໂດຍໄວ້ທີ່ສຸດ ເພື່ອລົງໂທດທີ່ອີຣານລະເມີດຂໍ້ຕົກລົງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube