ຜູ້ນຳ ສ.ອາເມຣິກາ ວ່າ ອີຣານກຳລັງຫຼິ້ນກັບໄຟ, ພ້ອມຖະແຫຼງບໍ່ໃຫ້ອີຣານມີອາວຸດນິວເຄຼຍເດັດຂາດ

ສຳນັກຂ່າວຕ່າງປະເທດລາຍງານເມື່ອວັນທີ 1 ກໍລະກົດ 2019 ທີ່ຜ່ານມາວ່າ: ພາຍຫຼັງອີຣານປະກາດວ່າ ໂຄງການຍົກລະດັບເສີມສະມັດຖະພາບຢູເຣນຽມຂອງລັດຖະບານອີຣານດຳເນີນໄປຢ່າງມີປະສິດທິພາບ ມາຕັ້ງແຕ່ກາງເດືອນທີ່ຜ່ານມາ ໄດ້ເພີ່ມປະລິມານຢູເຣນຽມເກີນເກນ 300 ກິໂລກຣາມ ຕາມທີ່ອົງການພະລັງງານປະລະມານູລະຫວ່າງປະເທດ (IAEA) ກຳນົດໄວ້ໃນຂໍ້ຕົກລົງນິວເຄຼຍ ສະບັບປີ 2015 ແລ້ວ ແລະ ຂະບວນການຕໍ່ໄປຄືການເພີ່ມຄວາມບໍລິສຸດຂອງຢູເຣນຽມທີ່ຜ່ານການເສີມສະມັດຖະພາບໃຫ້ເກີນ 3.67%.

ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ກ່າວເຖິງສະຖານະການດັ່ງກ່າວ ວ່າອີຣານຮູ້ຕົວດີວ່າກຳລັງເຮັດຫຍັງຢູ່ ໂດຍສະເພາະຢ່າງຍິ່ງສິ່ງທີ່ກຳລັງເຮັດຢູ່ໃນຕອນນີ້ບໍ່ຕ່າງຫຍັງກັບການຫຼິ້ນກັບໄຟ, ຂະນະທີ່ທຳນຽບຂາວອອກຖະແຫຼງການວິຈານອີຣານ ວ່າລະເມີດບັນທັດຖານໂລກຕໍ່ບັນຫາດັ່ງກ່າວນີ້ ມາຕັ້ງແຕ່ກ່ອນຍັງບໍ່ມີຂໍ້ຕົກລົງນິວເຄຼຍ ແລະ ກ່ອນໜ້ານັ້ນເຄີຍອອກຖະແຫຼງການຢ້ຳວ່າ ລັດຖະບານສະຫະລັດ ອາເມຣິກາ ຈະບໍ່ມີທາງຍອມໃຫ້ລັດຖະບານອີຣານມີນິວເຄຼຍໄວ້ໃນຄອບຄອງເດັດຂາດ.

ໃນດ້ານຂອງທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ກ່າວເຖິງການທີ່ປະລິມານຢູເຣນຽມເສີມສະມັດຖະພາບຂອງອີຣານເກີນເກນຂັ້ນຕ່ຳ 300 ກິໂລກຣາມ ຕາມທີ່ IAEA ກຳນົດໄວ້ປະມານ 2 ກິໂລກຣາມ ວ່າຍິ່ງເຮັດໃຫ້ເຫັນຊັດເຈນວ່າລັດຖະບານອີຣານຍັງຄົງຂົ່ມຂູ່ຕໍ່ປະຊາຄົມໂລກ ແລະ ອີຣານຖືເປັນໄພຄຸກຄາມຕໍ່ຄວາມປອດໄພ ແລະ ຄວາມໝັ້ນຄົງຂອງຕາເວັນອອກກາງຢ່າງແທ້ຈິງ, ສ່ວນທ່ານ ເບນຈາມິນ ເນທັນຢາຮູ ນາຍົກລັດຖະມົນຕີອິດສະຣາແອນ ໄດ້ຮຽກຮ້ອງໃຫ້ສະຫະພາບເອີຣົບ ເພີ່ມມາດຕະການຂວໍ້າບາດອີຣານໂດຍໄວທີ່ສຸດ ເພື່ອລົງໂທດທີ່ອີຣານລະເມີດຂໍ້ຕົກລົງ.