ໄຟໄໝ້ເຮືອດຳນ້ຳລັດເຊຍ ເຮັດໃຫ້ລູກເຮືອເສຍຊີວິດ 14 ຄົນ

ສຳນັກຂ່າວຕ່າງປະເທດລາຍງານ ເມື່ອວັນທີ 2 ກໍລະກົດ 2019 ທີ່ຜ່ານມາວ່າ: ກະຊວງປ້ອງກັນປະເທດລັດເຊຍອອກຖະແຫຼງການ ລະບຸວ່າເກີດເຫດໄຟໄໝ້ພາຍໃນເຮືອດຳນ້ຳລຳໜຶ່ງ ຂອງກອງທັບລັດເຊຍເມື່ອວັນຈັນ ທີ່ຜ່ານມາ ຂະນະປະຕິບັດການວັດລະດັບນ້ຳເລິກພາຍໃນເຂດນ່ານນ້ຳຂອງລັດເຊຍ ສົ່ງຜົນໃຫ້ລູກເຮືອເສຍຊີວິດ 14 ຄົນ, ໂດຍເຮືອດຳນ້ຳລຳນີ້ຢູ່ທ່າເຮືອເຊເວໂຣມອສ ແຖບຂົ້ວໂລກເໜືອ ເຊິ່ງເປັນທີ່ຕັ້ງຂອງຖານທັບເຮືອ ຂອງກອງເຮືອທະເລເໜືອລັດເຊຍ ກ່ອນອອກໄປປະຕິບັດການ, ສາເຫດກຳລັງຢູ່ໃນລະຫວ່າງການສືບສວນສອບສວນ.

ເຖິງແມ່ນວ່າກະຊວງປ້ອງກັນປະເທດລັດເຊຍບໍ່ໄດ້ເປີດເຜີຍຊື່ເຮືອ,​ ສາເຫດ ແລະ ພົບຜູ້ລອດຊີວິດຫຼືບໍ່ ແຕ່ສື່ມວນຊົນຂອງລັດເຊຍລາຍງານວ່າ ເປັນເຮືອດຳນ້ຳລັບສຸດຍອດຂອງກອງທັບລັດເຊຍ ເປັນເຮືອດຳນ້ຳພະລັງງານນິວເຄຼຍ ອອກແບບມາເພື່ອພາລະກິດທີ່ລະອຽດອ່ອນໃນທະເລເລິກ ແລະ ລະບຸວ່າແມ່ນເຮືອດຳນ້ຳ AS-12 Losharik ທີ່ເຂົ້າປະຈຳການຕັ້ງແຕ່ປີ 2010 ເປັນເຮືອດຳນ້ຳທີ່ທັນສະໄໝທີ່ສຸດ ແລະ ປົກປິດຫຼາຍທີ່ສຸດ.

ໃນດ້ານຂອງທ່ານ ວະລາດິເມຍ ປູຕິນ ປະທານປະເທດລັດເຊຍ ໄດ້ສັ່ງຍົກເລີກກຳນົດງານ ແລະ ພາລະກິດທັງໝົດ ແລະ ຮຽກໃຫ້ລັດຖະມົນຕີກະຊວງປ້ອງກັນປະເທດເຂົ້າມາລາຍງານສະຫຼຸບສະຖານະການທີ່ເກີດຂຶ້ນ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube