ທະຫານລັດເຊຍໃນເຮືອດຳນ້ຳທີ່ໄຟໄໝ້ສະຫຼະຊີວິດ ເພື່ອຊ່ວຍນັກວິໄຈອອກຈາກເຮືອໄດ້ຢ່າງປອດໄພ

ສຳນັກຂ່າວຕ່າງປະເທດລາຍງານ 4 ກໍລະກົດ 2019 ວ່າ: ທ່ານ ພົນເອກ ເຊີເກ ຊອຍກູ ລັດຖະມົນຕີກະຊວງປ້ອງກັນປະເທດລັດເຊຍ ກ່າວເມື່ອວັນພຸດ ທີ່ຜ່ານມາ ກ່ຽວກັບເຫດການໄຟໄໝ້ພາຍໃນເຮືອດຳນ້ຳຂອງກອງທັບລັດເຊຍ ລະຫວ່າງປະຕິບັດພາລະກິດສຳຫຼວດໃນທະເລແບເຣັນ ທີ່ຢູ່ລະຫວ່າງລັດເຊຍ ກັບນອກແວ ເປັນເຫດໃຫ້ລູກເຮືອເສຍຊີວິດ 14 ຄົນ ວ່າ: ມີຜູ້ລອດຊີວິດຈາກເຫດການຄັ້ງນີ້ ແຕ່ປະຕິເສດໃຫ້ຂໍ້ມູນວ່າມີຈຳນວນເທົ່າໃດ ແລະ ແມ່ນໃຜ ພ້ອມຊົມເຊີຍລູກເຮືອທຸກຄົນວ່າເປັນວິລະບຸລຸດ ທີ່ຊ່ວຍກັນມອດໄຟ ແລະ ຍອມສະຫຼະຊີວິດຂອງຕົນເອງ ດ້ວຍການໃຫ້ໜ່ວຍກູ້ໄພຊ່ວຍເຫຼືອນັກວິໄຈທີ່ເປັນພົນລະເຮືອນອອກມາກ່ອນ.

ເຊິ່ງທ່ານ ພົນເອກ ເຊີເກ ຊອຍກູ ຍັງຢືນຢັນວ່າພາລະກິດຂອງເຮືອດຳນ້ຳລຳນີ້ ຄືການວັດແທກລະດັບຄວາມເລິກຂອງທະເລແບເຣັນ ໃນເຂດນ່ານນ້ຳຂອງລັດເຊຍ ແລະ ຜູ້ເສຍຊີວິດສ່ວນໃຫຍ່ເປັນຜົນມາຈາກການສະໝັກຄວັນພິດທີ່ເກີດຈາກການລະເບີດ ໂດຍບໍ່ໃຫ້ຂໍ້ມູນເພີ່ມເຕີມອີກ ແມ່ນແຕ່ຊື່ຂອງເຮືອ ແຕ່ສື່ທ້ອງຖິ່ນຫຼາຍແຫ່ງລາຍງານວ່າ ກອງທັບເຮືອລັດເຊຍມີພາຫະນະລັບສຸດຍອດ ໄວ້ໃຊ້ປະຕິບັດພາລະກິດສຳຫຼວດໃຕ້ທະເລເລິກຢູ່ລຳໜຶ່ງຊື່ Losharik ເປັນເຮືອດຳນ້ຳຂັບເຄື່ອນດ້ວຍພະລັງງານນິວເຄຼຍ ສ່ວນເຫດການຄັ້ງນີ້ເກີດຂຶ້ນເມື່ອວັນຈັນທີ 1 ກໍລະກົດ ແຕ່ລັດຖະບານເປີດເຜີຍຂໍ້ມູນພຽງເລັກໜ້ອຍໃນວັນທີ 2 ກໍລະກົດ.

ຂະນະທີ່ທ່ານ ວະລາດິເມຍ ປູຕິນ ປະທານປະເທດລັດເຊຍ ກ່າວວ່າໃນຈຳນວນຜູ້ເສຍຊີວິດທັງໝົດນັ້ນ ມີລູກເຮືອ 7 ຄົນເປັນທະຫານເຮືອຍົດວານາເອກ ແລະ ຈາກຈຳນວນດັ່ງກ່າວ 2 ຄົນໄດ້ຮັບຫຼຽນກ້າຫານຂັ້ນສູງສຸດ “ວິລະບຸລຸດແຫ່ງລັດເຊຍ”, ເຖິງຢ່າງໃດກໍ່ຕາມ ການທີ່ລັດຖະບານລັດເຊຍປະຕິເສດໃຫ້ຂໍ້ມູນໃນອີກຫຼາຍປະເດັນ ຍິ່ງເພີ່ມຄວາມສົງໄສໃຫ້ກັບປະຊາຊົນ ແລະ ມີການນຳໄປປຽບທຽບກັບໄພພິບັດນິວເຄຼຍເຊີໂນບິວ ເມື່ອປີ 1986 ທີ່ອູແກຣນແຕ່ໃນຕອນນັ້ນຍັງເປັນສ່ວນໜຶ່ງຂອງສະຫະພາບໂຊວຽດ ທີ່ຫຼາຍຝ່າຍເຊື່ອວ່າຍັງຄົງມີຄວາມລັບອີກຫຼາຍຢ່າງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube