ອັງກິດຢຶດເຮືອບັນທຸກນ້ຳມັນອີຣານ ຕາມຄຳສັ່ງຂອງ ສ.ອາເມຣິກາ ທີ່ຢິບບຼໍຕາ

ສຳນັກຂ່າວຕ່າງປະເທດລາຍງານ 5 ກໍລະກົດ 2019 ວ່າ: ກະຊວງການຕ່າງປະເທດອີຣານອອກຖະແຫຼງການ ເມື່ອວັນພະຫັດ ທີ່ຜ່ານມາ ກ່ຽວກັບກໍລະນີເຮືອກວດກາຂອງກອງທັບອັງກິດ ຢຶດເຮືອບັນທຸກນ້ຳມັນ The Grace 1 ຂອງອີຣານແຕ່ຈົດທະບຽນໃນປານາມາ ທີ່ນ່ານນ້ຳບໍລິເວນນອກຝັ່ງເກາະຢິບບຼໍຕາ ດິນແດນຫ່າງໄກຂອງອັງກິດ ແລະ ຢູ່ໃກ້ກັບແອັດສະປາຍ ເມື່ອວັນພຸດ ທີ່ຜ່ານມາ ດ້ວຍເຫດຜົນວ່າເຮືອລຳດັ່ງກ່າວຕ້ອງສົງໄສວ່າບັນທຸກນ້ຳມັນດິບປະມານ 2 ລ້ານບາເຣວໄປຍັງຊີຣີ ເຊິ່ງຖືເປັນການລະເມີດມາດຕະການຂວໍ້າບາດຂອງສະຫະພາບເອີຣົບ (EU) ວ່າເປັນການສະກັດກັ້ນຢ່າງຜິດກົດໝາຍ ແລະ ພຶດຕິກຳຂອງກອງທັບອັງກິດບໍ່ຕ່າງຫຍັງກັບໂຈສະຫຼັດ.

ຕໍ່ມາລັດຖະບານອີຣານໄດ້ເຊີນເອກອັກຄະລັດຖະທູດອັງກິດເຂົ້າພົບ ເພື່ອປຶກສາຫາລືກ່ຽວກັບສະຖານະການດັ່ງກ່າວແລ້ວ, ຂະນະທີ່ກະຊວງການຕ່າງປະເທດແອັດສະປາຍອອກຖະແຫຼງການຢ່າງກົງໄປກົງມາ ວ່າລັດຖະບານແອັດສະປາຍເປັນຜູ້ແຈ້ງການເຄື່ອນໄຫວດັ່ງກ່າວຂອງເຮືອ The Grace 1 ໄປຍັງອັງກິດຕາມຄຳສັ່ງຂອງສະຫະລັດ ອາເມຮິກາ ເຊິ່ງສອດຄ່ອງກັບທ່າທີຂອງທ່ານ ຈອນ ໂບຕັ້ນ ທີ່ປຶກສາດ້ານຄວາມໝັ້ນຄົງແຫ່ງຊາດສະຫະລັດ ອາເມຣິກາ ທີ່ລົງຂໍ້ຄວາມໃນ Twitter ເຖິງບັນຫາດັ່ງກ່າວວ່າ ເປັນຂ່າວທີ່ດີທີ່ສຸດ, ສ່ວນກະຊວງການຕ່າງປະເທດອັງກິດອອກຖະແຫຼງການປະຕິເສດການປະນາມຂອງອີຣານວ່າໄຮ້ເຫດຜົນ.

ເຊິ່ງສະຖານະການທີ່ຢິບບຼໍຕາເກີດຂຶ້ນໃນຊ່ວງທີ່ສາຍພົວກັນລະຫວ່າງສະຫະລັດ ອາເມຣິກາ ກັບ ອີຣານກຳລັງຢູ່ໃນຈຸດທີ່ເຄັ່ງຕຶງຢ່າງໜັກຈົນເຖິງຂັ້ນໃກ້ສົງຄາມ ຈາກຄວາມຂັດແຍ່ງເລື່ອງຂໍ້ຕົກລົງນິວເຄຼຍທີ່ລົງນາມໃນສະໄໝອະດີດປະທານປະເທດ ບາຣັກ ໂອບາມາ ເມື່ອປີ 2015 ແຕ່ລັດຖະບານສະຫະລັດ ອາເມຣິກາຊຸດປັດຈຸບັນຂອງທ່ານ ໂດໂນ ທຣຳ ໄດ້ຖອນຕົວອອກຈາກຂໍ້ຕົກລົງດັ່ງກ່າວເມື່ອເດືອນພຶດສະພາ ປີທີ່ຜ່ານມາ ແລະ ເດີນໜ້າຂວໍ້າບາດອີຣານຢ່າງຕໍ່ເນື່ອງ, ນອກຈາກນີ້ ໃນໄລຍະ 1-2 ເດືອນທີ່ຜ່ານມາເກີດເຫດໂຈມຕີຫຼາຍຄັ້ງກັບເຮືອບັນທຸກນ້ຳມັນບໍລິເວນຊ່ອງແຄບຮໍມຸສ ແລະ ເມື່ອອາທິດທີ່ຜ່ານມາລັດຖະບານອີຣານກໍ່ໄປກາດຟື້ນຟູໂຄງການເສີມສະມັດຖະພາບຢູເຣນຽມ ຈົນມີປະລິມານເກີນເກນຕາມທີ່ອົງການພະລັງງານປະລະມານູນສາກົນ (IAEA) ກຳນົດແລ້ວ ແລະ ຂັ້ນຕໍ່ໄປຄືການສະກັດໃຫ້ຄວາມບໍລິສັດຂອງຢູເຣນຽມເກີນ 3.67% ເພື່ອການຜະລິດອາວຸດນິວເຄຼຍ.