ທົ່ງໄຫຫິນ ແຂວງຊຽງຂວາງ ຖືກຮັບຮອງເປັນມໍລະດົກໂລກແລ້ວ ດ້ວຍການລໍຄອຍ 20 ກວ່າປີ ແຕ່ 1992

ສຳນັກຂ່າວສານປະເທດລາວ (KPL) ລາຍງານ​ 6 ກໍລະກົດ 2019 ວ່າ: ກອງປະຊຸມຄັ້ງທີ 43 ຂອງຄະນະກຳມະການມໍລະດົກໂລກ (UNESCO) ທີ່ຈັດຂຶ້ນຢູ່ນະຄອນຫຼວງບາກູ ປະເທດອາແຊັກໄບຊານ ໄດ້ຮັບຮອງເອົາທົ່ງໄຫຫິນ ແຂວງຊຽງຂວາງ ເຂົ້າເປັນມໍລະດົກໂລກແລ້ວ ແລະ ຖືເປັນແຫ່ງທີ 3 ຂອງ ສປປ.ລາວ.

ໂດຍຜູ້ແທນຈາກ ສປປ.ລາວ ເຂົ້າຮ່ວມກອງປະຊຸມໃນຄັ້ງນີ້ ນຳໂດຍທ່ານ ບໍ່ແສງຄຳ ວົງລາດາ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ເຊິ່ງ ສປປ.ລາວ ໄດ້ສະເໜີທົ່ງໄຫຫິນ ແຂວງຊຽງຂວາງ 11 ແຫ່ງ ຈາກທັງໝົດເກືອບ 20 ແຫ່ງທີ່ຄົ້ນພົບ ແລະ ບັນທຶກຢ່າງເປັນທາງການເຂົ້າເປັນມໍລະດົກໂລກ.

ທົ່ງໄຫຫິນ ແຂວງຊຽງຂວາງ ໄດ້ຖືກສະເໜີຂຶ້ນເປັນມໍລະດົກໂລກ ມາຕັ້ງແຕ່ວັນທີ 25 ມີນາ 1992 ໃນປະເພດມໍລະດົກໂລກທາງວັດທະນະທຳ ດ້ວຍຂໍ້ກຳນົດ ແລະ ຫຼັກເກນທີ 1 ແລະ 3 ຈາກທັງໝົດ 6 ຫຼັກເກນໃນປະເພດມໍລະດົກໂລກທາງວັດທະນະທຳຂອງອົງການ UNESCO ທີ່ລະບຸວ່າ: 1. ເປັນຕົວແທນໃນການສະແດງຜົນງານເອກ ທີ່ສ້າງຂຶ້ນດ້ວຍຫົວຄິດປະດິດສ້າງອັນສະຫຼຽວສະຫຼາດຂອງມະນຸດ, 3. ເປັນສິ່ງທີ່ຢືນຢັນເຖິງຫຼັກຖານຂອງວັດທະນະທຳ ແລະ ອະລິຍະທຳທີ່ປາກົດໃຫ້ເຫັນຢູ່ໃນປັດຈຸບັນ ຫຼື ວ່າໄດ້ສາບສູນໄປແລ້ວ.

ປັດຈຸບັນ, ມໍລະມົກໂລກ ໃນ ສປປ.ລາວ ປະກອບມີ: ເມືອງຫຼວງພະບາງ (ນະຄອນຫຼວງພະບາງ) ແຂວງຫຼວງພະບາງ ທີ່ຖືກຮັບຮອງໃນປີ 1995, ວັດພູ ແຂວງຈຳປາສັກ ຖືກຮັບຮອງໃນປີ 2001 ແລະ ຫຼ້າສຸດທົ່ງໄຫຫິນ ແຂວງຊຽງຂວາງ ເຊິ່ງທັງໝົດນອນຢູ່ໃນປະເພດມໍລະດົກໂລກທາງວັດທະນະທຳ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube