ທະນາຄານແຫ່ງ ສປປ.ລາວ (ທຫລ) ລາຍງານວ່າ: ເມື່ອວັນທີ 9 ກໍລະກົດ 2019 ທີ່ຜ່ານມາ ລັດຖະບານແຫ່ງ ສປປ.ລາວ ແລະ ລັດຖະບານແຫ່ງ ສປ.ຈີນ ໄດ້ມອບໃຫ້ທະນາຄານ (ທຫລ) ແລະ ທະນາຄານພັດທະນາແຫ່ງຊາດຈີນ (CDB) ຮ່ວມກັນເຊັນສັນຍາເງິນກູ້ 300 ລ້ານໂດລາສະຫະລັດ ເພື່ອສົ່ງເສີມວິສາຫະກິດຂະໜາດນ້ອຍ ແລະ ກາງ (SMEs) ໃນ ສປປ.ລາວ ທີ່ໂຮງແຮມລາວພລາຊາ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງທ່ານ ສອນໄຊ ສິດພະໄຊ ຜູ້ວ່າການ ທຫລ, ພ້ອມນີ້ ຍັງມີຄະນະຈາກ ທຫລ, ທະນາຄານພັດທະນາແຫ່ງຊາດຈີນ, ຄະນະກຳມະການຮ່ວມມືລາວ-ຈີນ, ກະຊວງທີ່ກ່ຽວຂ້ອງ, ຕາມໜ້າສະຖານທູດ ສປ.ຈີນ ປະຈຳ ສປປ.ລາວ ເຂົ້າຮ່ວມ.
ໃນການຮ່ວມລົງນາມເຊັນສັຍາເງິນກູ້ບ້ວງດັ່ງກ່າວ ຝ່າຍລາວໂດຍແມ່ນທ່ານນາງ ວັດທະນະ ດາລາລອຍ ຮອງຜູ້ວ່າການ ທຫລ ແລະ ຝ່າຍຈີນ ໂດຍແມ່ນທ່ານ ຫົງ ເຈິ້ງ ຫົວ ຫົວໜ້າສາຂາ CDB ແຂວງຢູນນານ.
ລາຍງານລະບຸວ່າ: ທະນາຄານ CDB ໄດ້ສະເໜີໃຫ້ເງິນກູ້ເພື່ອສົ່ງເສີມພັດທະນາ SMEs ແກ່ ສປປ.ລາວ ເພາະເຫັນໄດ້ວ່າລັດຖະບານລາວມີການຊຸກຍູ້ສົ່ງເສີມບົດບາດຂອງ SMEs ໃນການຂັບເຄື່ອນເສດຖະກິດໃຫ້ມີການພັດທະນາ ແລະ ຂະຫຍາຍຕົວ ທີ່ສຳຄັນຫົວໜ່ວຍ SMEs ໃນ ສປປ.ລາວ ຍັງມີຄວາມຕ້ອງການແຫຼ່ງທຶນຈຳນວນຫຼວງຫຼາຍ ໂດຍໃນຕົ້ນປີ 2017 ທຫລ ແລະ ທະນາຄານ CDB ຈຶ່ງມີການປຶກສາຫາລືກັນ ແລະ ຕໍ່ມາໃນວັນທີ 13 ພະຈິກ 2017 ຂະນະທີ່ທ່ານ ສີ ຈິ້ນຜິງ ປະທານປະເທດຈີນ ເດີນທາງຢ້ຽມຢາມ ສປປ.ລາວ ຢ່າງເປັນທາງການ ຈຶ່ງໄດ້ມີການລົງນາມໃນບົດບັນທຶກຄວາມເຂົ້າໃຈ (MOU) ວ່າດ້ວຍການຮ່ວມມືທາງດ້ານການເງິນ ເພື່ອສົ່ງເສີມ SMEs ໃນ ສປປ.ລາວ ວົງເງິນ 300 ລ້ານໂດລາສະຫະລັດ ໂດຍການລົງນາມຂອງທ່ານ ສົມພາວ ໄຟສິດ ຜູ້ວ່າການ ທຫລ ໃນໄລຍະນັ້ນ ແລະ ທ່ານ ຫູ ຫ້ວຍ ປ່າງ ປະທານສະພາບໍລິຫານຂອງທະນາຄານ CDB ໃນໄລຍະນັ້ນ.
ສຳລັບເງິນກູ້ດັ່ງກ່າວ ຈະແບ່ງການເບີກຖອນອອກເປັນ 3 ງວດ, ງວດລະ 100 ລ້ານໂດລາສະຫະລັດ ບົນພື້ນຖານເງື່ອນໄຂສັນຍາເງິນກູ້ທີ່ເຫັນດີຮ່ວມກັນ, ໂດຍລາຍງານດັ່ງກ່າວບໍ່ໄດ້ໃຫ້ລາຍລະອຽດໃດໆຂອງສັນຍາກູ້ຢືມ ລວມທັງບໍ່ມີການເປີດເຜີຍເຖິງອັດຕາດອກເບ້ຍເງິນກູ້ບ້ວງດັ່ງກ່າວແຕ່ຢ່າງໃດ.
ນອກນີ້, ຍັງລາຍງານອີກວ່າ ເງິນກູ້ບ້ວງດັ່ງກ່າວ ຈະເປັນກຳລັງແຮງທາງດ້ານແຫຼ່ງທຶນ ສົມທົບກັບແຫຼ່ງທຶນຂອງທະນາຄານທຸລະກິດພາຍໃນປະເທດ ໃນການຊຸກຍູ້ວຽກງານການເຂົ້າເຖິງແຫຼ່ງທຶນ ແລະ ສ້າງຄວາມເຂັ້ມແຂວງຂອງ SMEs ຫຼາຍຂຶ້ນ.