ທາງການແຈ້ງ ບັນດາສື່ຂ່າວອອນລາຍ ຕ້ອງໄປຂຶ້ນທະບຽນໃຫ້ຖືກຕ້ອງຕາມກົດໝາຍ

ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ອອກແຈ້ງການ ສະບັບເລກທີ 256/ຫກ ລົງວັນທີ 12 ກໍລະກົດ 2019 ເລື່ອງ ການສ້າງຕັ້ງໜ້າຂ່າວອອນລາາຍ ເພື່ອສະໜອງຂໍ້ມູນຂ່າວສານຮັບໃຊ້ສັງຄົມ ໂດຍມີເນື້ອໃນລະບຸວ່າ:

ໃນໄລຍະຜ່ານມາ ມີການຈັດຕັ້ງ, ບຸກຄົນ ແລະ ນິຕິບຸກຄົນ ໄດ້ສ້າງໜ້າຂ່າວບໍລິການຂໍ້ມູນຂ່າວສານແກ່ສັງຄົມ ແລະ ກຳນົດຊື່ເອີ້ນຂອງໜ້າຂ່າວໂດຍພາລະການ ໂດຍບໍ່ໄດ້ຮັບອະນຸຍາດຢ່າງຖືກຕ້ອງຕາມກົດໝາຍ ຈາກອົງການຄຸ້ມຄອງສື່ມວນຊົນ ເຊິ່ງມີທັງຂ່າວທີ່ມີຄວາມຈິງ, ມີປະໂຫຍດ ແລະ ມີທັງຂ່າວປອດ, ຂ່າວອະກຸສົນ, ຂ່າວບິດເບືອນຄວາມຈິງ ອັນໄດ້ສ້າງຄວາມສັບສົນໃຫ້ສັງຄົມ ເປັນຕົ້ນໜ້າຂ່າວອອນລາຍໃນ Facebook ທີ່ໃສ່ນາມຕົນເອງວ່າ: “Support Prime Minister Thongloun Sisoulith” ເຊິ່ງພາຍຫຼັງໄດ້ປ່ຽນຊື່ມາເປັນ “ມວນຊົນລາວ support”, ໂທລະໂຄ່ງ, ABC Laos News ສຳນັກຂ່າວເອບີຊີ ແລະ ອື່ນໆ.

ເພື່ອເສີມຂະຫຍາຍດ້ານຄຸນປະໂຫຍດ ແລະ ຈຳກັດດ້ານຫຍໍ້ທໍ້ຂອງສື່ສັງຄົມອອນລາຍ ຫຼື ໜ້າຂ່າວອອນລາຍ, ຖ້າບຸກຄົນ, ນິຕິບຸກຄົນ ແລະ ການຈັດຕັ້ງໄດ້ສ້າງໜ້າຂ່າວອອນລາຍຜ່ານພາຫະນະສື່ປະເພດຕ່າງໆບໍລິການສັງຄົມຜ່ານມາແລ້ວ ຫຼື ບຸກຄົນ, ນິຕິບຸກຄົນ ແລະ ການຈັດຕັ້ງມີຈຸດປະສົງຈະສ້າງຕັ້ງເວັບໄຊ, ໜ້າຂ່າວອອນລາຍ ຜ່ານພາຫະນະສື່ປະເພດຕ່າງໆ ເພື່ອບໍລິການສັງຄົມ ກໍ່ສາມາດເຮັດໄດ້ ແຕ່ຕ້ອງໄດ້ແຈ້ງຈຸດປະສົງ, ຂໍອະນຸຍາດການເຄື່ອນໄຫວຈາກກົມສື່ມວນຊົນ, ກະຊວງ ຖວທ, ພະແນກ ຖວທ ແຂວງ ແລະ ນະຄອນຫຼວງ ເພື່ອອກໃບອະນຸຍາດເຄື່ອນໄຫວຢ່າງຖືກຕ້ອງຕາມກົດໝາຍ ແລະ ລະບຽບການ.

ທຸກການເຄື່ອນໄຫວບໍລິການຂໍ້ມູນຂ່າວສານແກ່ສັງຄົມຜ່ານສື່ອອນລາຍທຸກປະເພດ ໂດຍບໍ່ໄດ້ຮັບອະນຸຍາດຈາກອົງການຄຸ້ມຄອງສື່ມວນຊົນ ແມ່ນຜິດກົດໝາຍ ແລະ ລະບຽບການ.

ເຈົ້າໜ້າທີ່ຄຸ້ມຄອງສື່ມວນຊົນຢູ່ສູນກາງ ແລະ ທ້ອງຖິ່ນ ໄດ້ກະກຽມແບບຟອມລະອຽດເພື່ອປະກອບໃຫ້ເຈົ້າຂອງໜ້າຂ່າວ, ໂດຍສາມາດຕິດຕໍ່ສອບຖາມໄດ້ທີ່ກົມສື່ມວນຊົນ ໂທ: 021 212420.