ລັດເຊຍສົ່ງກ້ອງໂທລະທັດ Spektr-RG ຂຶ້ນສູ່ວົງໂຄຈອນ (ວິດີໂອ)

ສຳນັກຂ່າວຕ່າງປະເທດລາຍງານ 14 ກໍລະກົດ 2019 ວ່າ: ຈະຫຼວດ Proton-M ຂອງອົງການອະວະກາດລັດເຊຍ (ROSCOSMOS) ອອກເດີນທາງຈາກຖານປ່ອຍຈະຫຼວດ ສູນອະວະກາດໄບໂຄນູ ຄອສໂມໂດຣມ ປະເທດກາຊັກສະຖານ ເມື່ອເວລາ 17:30 ນາທີ ຕາມເວລາທ້ອງຖິ່ນຂອງວັນເສົາ ທີ 13 ກໍລະກົດ ທີ່ຜ່ານມາ (19:30 ນາທີ ຕາມເວລາໃນປະເທດລາວ) ເພື່ອສົ່ງກ້ອງໂທລະທັດອະວະກາດ Spektr-RG ທີ່ມີນ້ຳໜັກຫຼາຍກວ່າ 2.7 ໂຕນ ຂຶ້ນສູ່ຊັ້ນບັນຍາກາດໂລກ.

ເຊິ່ງໂຄງການກ້ອງໂທລະທັດ Spektr-RG ເປັນການຮ່ວມມືລະຫວ່າງລັດເຊຍ ກັບ ເຢຍລະມັນ ໂດຍຕາມກຳນົດການເດີມແມ່ນຈະປ່ອຍຕັ້ງແຕ່ວັນທີ 21 ມິຖຸນາ ທີ່ຜ່ານມາ ແຕ່ຕ້ອງເລື່ອນເຖິງ 2 ຄັ້ງ ພາຍຫຼັງທີ່ເຈົ້າໜ້າທີ່ກວດພົບບັນຫາທີ່ແບັດເຕີຣີ ໂດຍ Spektr-RG ຈະຂຶ້ນໄປປະຕິບັດໜ້າທີ່ແທນກ້ອງໂທລະທັດ Spektr-R ທີ່ໃຊ້ງານມາຕັ້ງແຕ່ປີ 2011 ແລະ ROSCOSMOS ເປີດເຜີຍວ່າຂາດການຕິດຕໍ່ຕັ້ງແຕ່ເດືອນມັງກອນ ທີ່ຜ່ານມາ.

ກ້ອງໂທລະທັດອະວະກາດ ແມ່ນອຸປະກອນສຳລັບການສັງເກດການທາງດາລາສາດ ທີ່ຢູ່ໃນອະວະກາດພາຍນອກລະດັບວົງໂຄຈອນຂອງໂລກ ເພື່ອສັງເກດການດາວເຄາະອັນຫ່າງໄກ, ດາລາຈັກ ແລະ ວັດຖຸຕ່າງໆໃນທ້ອງຟ້າ ທີ່ຊ່ວຍໃຫ້ມະນຸດສາມາດສ້າງຄວາມເຂົ້າໃຈກັບຈັກກະວານໄດ້ດີຂຶ້ນ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube