ແມ່ນ້ຳຂອງເຂົ້າຂັ້ນວິກິດ ແຫ້ງແລ້ງທີ່ສຸດໃນຮອບ 10 ປີ, ພ້ອມເຕືອນໃຫ້ປະຊາຊົນລະວັງເພາະຈະມີການປ່ອຍນ້ຳຈາກເຂື່ອນ

ອີງຕາມການລາຍງານຂອງໜັງສືພິມວຽງຈັນທາຍ ເມື່ອວັນທີ 16 ກໍລະກົດ 2019 ທີ່ຜ່ານມາວ່າ: ປີນີ້ນ້ຳຂອງບົກແຫ້ງທີ່ສຸດ ໃນຮອບ 10 ປີທີ່ຜ່ານມາ ຈາກສະພາບການດັ່ງກ່າວ ທ່ານ ບຸນຮຽງ ສຸວັນນະຫານ ຮອງຫົວໜ້າພະແນກອຸທົກກະສາດ ກົມອຸຕຸນິຍົມ ແລະ ອຸທົກກະສາດ ກະຊວງຊັບພະຍາກອນ ແລະ ສິ່ງແວດລ້ອມໄດ້ລາຍງານວ່າ: ສະພາບນ້ຳໃນແມ່ນ້ຳຂອງໄດ້ບົກແຫ້ງລົງຫຼາຍໃນປີນີ້ ເຊິ່ງອາດຈະເກີດມາຈາກຫຼາຍສາເຫດ ເປັນຕົ້ນໃນລະດູຝົນປີນີ້ຍັງບໍ່ທັນມີລົມມໍລະສຸມພັດຜ່ານມາຫຼາຍເທົ່າທີ່ຄວນ ຖ້າທຽບໃສ່ປີຜ່ານມາ ຈຶ່ງເຮັດໃຫ້ເຂື່ອນຫຼາຍແຫ່ງຢູ່ຕອນເໜືອຂອງແມ່ນ້ຳຂອງ ອາດຈະມີການກັກເກັບນ້ຳໄວ້ເພື່ອຜະລິດກະແສໄຟຟ້າ ແລະ ເພື່ອໃຊ້ເຂົ້າໃນການຜະລິດກະສິກຳ.

ທ່ານ ບຸນຮຽງ ສຸວັນນະຫານ ຍັງໄດ້ກ່າວຕື່ມອີກວ່າ ປັດຈຸບັນລະດັບນ້ຳສະຖານີວັດແທກນ້ຳ ຢູ່ນະຄອນຫຼວງວຽງຈັນ ແມ່ນຢູ່ໃນລະດັບ 0.96 ແມັດ ຖ້າທຽບໃສ່ເດືອນ 7-8 ຂອງປີຜ່ານມາ ລະດັບນ້ຳໃນແມ່ນ້ຳຂອງຈະຢູ່ທີ່ 7-8 ແມັດ.

ສະພາບດັ່ງກ່າວນີ້ອາດຈະແກ້ຍາວໄປຮອດທ້າຍເດືອນສິງຫາ ແລະ ລະດັບນ້ຳໃນແມ່ນ້ຳຂອງຈຶ່ງຈະຄ່ອຍໆສູງຂຶ້ນໄປຕາມປົກກະຕິ.

ນອກຈາກນີ້, ໜັງສືພິມເສດຖະກິດ-ການຄ້າ ຍັງໄດ້ລາຍງານວ່າ: ໃນລະຫວ່າງ 15-29 ກໍລະກົດ 2019 ນີ້ ເຂື່ອນໄຟຟ້ານ້ຳຂອງໄຊຍະບູລີ ກຳລັງຢູ່ໃນຂັ້ນຕອນການທົດລອງເຄື່ອງປັ່ນກະແສໄຟຟ້າ ເຊິ່ງຈະເຮັດໃຫ້ລະດັບນ້ຳຂອງສູງຂຶ້ນ ແລະ ຫຼຸດລົງຢ່າງໄວວາ.

ພ້ອມທັງໄດ້ແຈ້ງເຕືອນປະຊາຊົນໃນເຂດໃກ້ຄຽງ ໂດຍສະເພາະຊາວເມືອງປາກລາຍ ໃຫ້ມ້ຽນມັດວັດຖຸສິ່ງຂອງໃນແມ່ນ້ຳຂອງຂຶ້ນໄວບ່ອນທີ່ປອດໄພ ເພື່ອຫຼີກເວັ້ນອຸບັດເຫດ ແລະ ບັນຫາຕ່າງໆທີ່ຈະເກີດຂຶ້ນ ຈາກລະດັບນ້ຳຂຶ້ນ-ລົງຢ່າງກະທັນຫັນ ໃນໄລຍະການທົດລອງປີດ-ເປີດປະຕູນ້ຳຂອງເຂື່ອນນ້ຳຂອງໄຊຍະບູລີ.

HTML tutorial