ສ.ອາເມຣິກາ ຍົກເລີກໂຄງການຮ່ວມມືພັດທະນາ F-35 ກັບຕວັກກີ ເພາະຊື້ S-400 ຈາກລັດເຊຍ

ສຳນັກຂ່າວຕ່າງປະເທດລາຍງານ 18 ກໍລະກົດ 2019 ວ່າ: ທຳນຽບຂາວອອກຖະແຫຼງການ ເມື່ອວັນພຸດ ທີ່ຜ່ານມາວ່າ ການຕັດສິນໃຈຂອງຕວັກກີ ໃນການຊື້ລະບົບປ້ອງກັນໄພທາງອາກາດ S-400 ຂອງລັດເຊຍ ບໍ່ອາດເຮັດໃຫ້ການຮ່ວມມືລະຫວ່າງຕວັກກີ ແລະ ສະຫະລັດ ອາເມຣິກາ ໃນໂຄງການພັດທະນາຍົນຂັບໄລ່ F-35 ເປັນໄປໄດ້ອີກຕໍ່ໄປ ເນື່ອງຈາກການຮ່ວມມືດັ່ງກ່າວບໍ່ສາມາດເດີນໜ້າໄປໄດ້ ຕາບໃດທີ່ຍັງມີລະບົບການເກັບກຳຂໍ້ມູນດ້ານຂ່າວກອງຂອງລັດເຊຍ ຕັ້ງຢູ່ໃນດິນແດນຕວັກກີ ແລະ ມີຄວາມເປັນໄປໄດ້ສູງທີ່ອຸປະກອນດັ່ງກ່າວຈະສາມາດສອດແນມ ຄວາມກ້າວໜ້າໃນໂຄງການພັດທະນາຍົນຂັບໄລ່ F-35 ຂອງສະຫະລັດ ອາເມຣິກາໄດ້.

ຂະນະທີ່ກະຊວງການຕ່າງປະເທດຕວັກກີ ອອກຖະແຫຼງການຕອບໂຕ້ພາຍໃນເວລາໄລ່ເລ່ຍວ່າ ການຕັດສິນໃຈດັ່ງກ່າວຂອງສະຫະລັດ ອາເມຣິກາ ບໍ່ຍຸຕິທຳ ແລະ ບໍ່ສົມເຫດສົມຜົນ ເພາະເປັນການປະເມີນສະຖານະການແຕ່ພຽງຝ່າຍດຽວ ແລະ ເຕືອນວ່າ ອາດສົ່ງຜົນກະທົບຕໍ່ການຮ່ວມມືສອງຝ່າຍອີກຫຼາຍດ້ານໃນອະນາຄົດ, ເຊິ່ງການຍົກເລີກການຮ່ວມມືລະຫວ່າງສະຫະລັດ ອາເມຣິກາ ກັບ ຕວັກກີທີ່ກ່ຽວກັບ F-35 ຍັງລວມເຖິງການທີ່ບໍລິສັດຂອງຕວັກກີຕ້ອງຢຸດຕິການຜະລິດສ່ວນປະກອບຕາມຂໍ້ຕົກລົງ ແລະ ການຍົກເລີກຂໍ້ຕົກລົງຂາຍຍົນຂັບໄລ່ F-35 ຈຳນວນ 100 ລຳໃຫ້ແກ່ລັດຖະບານຕວັກກີ.

ໃນດ້ານຂອງທ່ານ ນາງ ສະເຕຟານີ ກຣິສແຊມ ໂຄສົກທຳນຽບຂ່າວ ກ່າວວ່າລັດຖະບານສະຫະລັດ ອາເມຣິກາໄດ້ຍື່ນຂໍ້ສະເໜີຂາຍລະບົບປ້ອງກັນໄພທາງອາກາດ PATRIOT ໃຫ້ແກ່ຕວັກກີ ໂດຍມີການປັບປຸງເງື່ອນໄຂຫຼາຍຄັ້ງ ເພື່ອໃຫ້ເປັນໄປຕາມຄວາມຕ້ອງການຂອງຕວັກກີ ແລະ ຢູ່ໃນລະດັບທີ່ສະຫະລັດອາເມຣິກາຍອມຮັບໄດ້ ແຕ່ສຸດທ້າຍຕວັກກີກໍ່ຍັງເລືອກລະບົບ S-400 ຂອງລັດເຊຍ, ເຖິງຢ່າງໃດກໍ່ຕາມ ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ປະຕິເສດສະແດງຄວາມຄິດເຫັນຕໍ່ບັນຫາດັ່ງກ່າວ ໂດຍກ່າວພຽງວ່າ ຕົນມີຄວາມສຳພັນທີ່ດີກັບທ່ານ ເຣເຊັບ ເທຢິບເອີໂດກັນ ປະທານປະເທດຕວັກກີ ທີ່ຮັບມອບຊິ້ນສ່ວນຊຸດທຳອິດຂອງລະບົບ S-400 ຈາກລັດເຊຍ ເມື່ອອາທິດທີ່ຜ່ານມາ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube