ກອງທັບລາວ-ລັດເຊຍ ສຳຫຼວດສະໜາມບິນທົ່ງໄຫຫິນ ເພື່ອກະກຽມກວດກູ້ລະເບີດບໍ່ທັນແຕກ

ໜັງສືພິມກອງທັບປະຊາຊົນລາວ ລາຍງານວ່າ ເມື່ອວັນທີ 17 ກໍລະກົດ 2019 ທີ່ຜ່ານມາ ຄະນະເກັບກູ້ລະເບີດກອງທັບປະຊາຊົນລາວ ກັບ ຄະນະວິຊາການກອງກວດກູ້ລະເບີດ ກຳລັງປະກອບອາວຸດລັດເຊຍ ໄດ້ລົງສຳຫຼວດກວດກາໃນພື້ນທີ່ຕົວຈິງ ບ່ອນຈະກວດກູ້ລະເບີດບໍ່ທັນແຕກ ຢູ່ສະໜາມບິນທົ່ງໄຫຫີນແຂວງ ຊຽງຂວາງ ຝ່າຍລາວ ນຳໂດຍ ທ່ານ ພັນເອກ ທົງໄຊ ບຸບຜາ ຮອງຫົວໜ້າກົມຊ່າງແສງ ກົມໃຫຍ່ເສນາທິການກອງທັບປະຊາຊົນລາວ, ຝ່າຍລັດເຊຍ ນຳໂດຍ ທ່ານ ພັນເອກ ອາບາຣ ມົບ ເຊຣ ເກວາຊີເລວິຊ ຫົວໜ້າຈຸເກັບກູ້ລະເບີດຂອງກົມຊ່າງແສງ ກຳລັງປະກອບອາວຸດແຫ່ງລັດເຊຍ ພ້ອມດ້ວຍຄະນະ ທັງສອງຝ່າຍ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມຕິດຕາມຕົວຈິງ.

ໂດຍປະຕິບັດຕາມແຜນການຮ່ວມມືສອງກອງທັບລາວ-ລັດເຊຍ ໃນການສຳຫຼວດພື້ນທີ່ກວດກູ້ລະເບີດທີ່ບໍ່ທັນແຕກ ໃນເນື້ອທີ່ທັງໝົດຂອງສະໜາມບິນທົ່ງໄຫຫີນ ຈຳນວນ 419 ເຮັກຕາ, ໃນນີ້ການສຳຫຼວດເບື້ອງຕົ້ນ ແມ່ນເນື້ອທີ່ສະໜາມບິນທີ່ຈະເລີ່ມລົງມືຈັດຕັ້ງປະຕິບັດການກວດກູ້ລະເບີດໃນ ຕົ້ນເດືອນຕຸລາ 2019 ຫາ ເດືອນມີນາ 2020 ສ່ວນພື້ນທີ່ຍັງເຫຼືອຈະໄດ້ສືບຕໍ່ສຳຫຼວດ ແລະ ປະຕິບັດການກວດກູ້ລະເບີດທີ່ບໍ່ທັນແຕກຄັ້ງຕໍ່ໄປ.

ການເກັບກູ້ລະເບີດບໍ່ທັນແຕກໃນເຂດດັ່ງກ່າວອາດພົບກັບຂໍ້ສະດວກ ແລະ ຂໍ້ຫຍຸ້ງຍາກໃນເບື້ອງຕົ້ນຄື: ເຂດດັ່ງກ່າວເປັນເຂດຂອງ ສະໜາມບິນທີ່ຍັງໃຊ້ການສັນຈອນຂອງສາຍການບິນ, ການເຝິກຊ້ອມບິນຂອງນັກບິນກອງພັນໃຫຍ່ 702 ມັນອາດຈະມີຄື້ນສັນຍານ ລົບກວນອຸປະກອນຂອງການກວດກູ້ລະເບີດ, ພ້ອມນີ້ເຂດດັ່ງກ່າວກໍ່ແມ່ນເຂດຂອງການກໍ່ສ້າງເກົ່າເຮັດໃຫ້ມີເສດເຫຼັກຂອງການກໍ່ສ້າງຕົກຄ້າງຢູ່ຫຼາຍ ມັນຈຶ່ງອາດຈະສົ່ງຜົນກະທົບໃນເວລາການກວດກູ້ລະເບີດ ເຮັດໃຫ້ມີການຊັກຊ້າອາດຈະບໍ່ທັນຕາມກຳນົດເວລາຂອງການກວດກູ້ລະເບີດຢູ່ພາກສະໜາມຕົວຈິງ ຜ່ານການສຳຫຼວດໃນຄັ້ງນີ້ ຄະນະກວດກູ້ລະ ເບີດຂອງລັດເຊຍ ຈະນຳໄປສ້າງແຜນກວດກູ້ຢ່າງລະອຽດເພື່ອ ເຮັດໃຫ້ເວລາລົງມາເກັບກູ້ລະເບີດຕົວຈິງ ໃຫ້ສຳເລັດຕາມແຜນການ ແລະ ຮັບປະກັນໄດ້ຄວາມປອດໄພ 100%.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube