ແມ່ນ້ຳຂອງເຂົ້າຂັ້ນຫາຍະນະ ປະປານະຄອນຫຼວງເຕືອນໃຫ້ໃຊ້ນ້ຳຢ່າງປະຢັດ ເພາະບໍ່ສາມາດຜະລິດໄດ້ເຕັມສ່ວນ

ລັດວິສາຫະກິດ ນ້ຳປະປານະຄອນຫຼວງ ໄດ້ອອກແຈ້ງການ ເລກທີ 0755/ນປນຄ ລົງວັນທີ 19 ກໍລະກົດ 2019 ເພື່ອແຈ້ງເຖິງປະຊາຊົນ ແລະ ບັນດາຫົວໜ່ວຍທຸລະກິດ ທີ່ອາໄສຢູ່ໃນນະຄອນຫຼວງວຽງຈັນຮັບຊາບວ່າ: ໃນໄລຍະນີ້ ແມ່ນ້ຳຂອງມີລະດັບນ້ຳແຫ້ງຫຼາຍ ເປັນສາເຫດໃຫ້ໂຮງງານຜະລິດນ້ຳປະປາ ທຳການຜະລິດນ້ຳປະປາບໍ່ໄດ້ເຕັມສ່ວນ ແຕ່ລັດວິສາຫະກິດນ້ຳປະປາ ນະຄອນຫຼວງວຽງຈັນ ຈະເຮັດຈົນສຸດຄວາມສາມາດ ເພື່ອໃຫ້ການຜະລິດນ້ຳເປັນໄປຕາມປົກກະຕິ ພ້ອມດຽວກັນນັ້ນກໍ່ຂໍຮຽກຮ້ອງມາຍັງທຸກພາກສ່ວນ ຈົ່ງໃຊ້ນ້ຳດ້ວຍຄວາມປະຢັດ ແລະ ກະກຽມອຸປະກອນໂຕ່ງນ້ຳໄວ້ໃຊ້ໃຫ້ພຽງພໍ ຈົນກວ່າລະດັບແມ່ນ້ຳຂອງຈະກັບມາເປັນປົກກະຕິ.

ໂດຍອີງຕາມການລາຍງານຂອງກົມອຸຕຸນິຍົມ ແລະ ອຸທົກກະສາດ ໃນວັນທີ 18 ກໍລະກົດ 2019 ທີ່ຜ່ານມາ ລະດັບແມ່ນ້ຳຂອງທີ່ນະຄອນຫຼວງວຽງຈັນ ເຂດຫຼັກ 4 ມີລະດັບນ້ຳພຽງ 70 ຊມ ເທົ່ານັ້ນ, ເຊິ່ງຖືເປັນລະດັບແມ່ນ້ຳຂອງທີ່ຕ່ຳທີ່ສຸດໃນຮອບ 50 ປີ.