ຈະຫຼວດລັດເຊຍ ສົ່ງນັກບິນອະວະກາດຊຸດໃໝ່ ເຖິງສະຖານນີອະວະກາດນານາຊາດ (ວິດີໂອ)

ສຳນັກຂ່າວຕ່າງປະເທດລາຍງານ 21 ກໍລະກົດ 2019 ວ່າ: ຈະຫຼວດ Soyuz-FG ຂອງອົງການອະວະກາດລັດເຊຍ (ROSCOSMOS) ອອກເດີນທາງຈາກຖານປ່ອຍຈະຫຼວດ ທີ່ສູນອະວະກາດໄບໂຄນູ ຄອສໂມໂດຼມ ປະເທດກາຊັກສະຖານ ເມື່ອເວລາ 16:28 ນາທີ ຕາມເວລາມາດຕະຖານສາກົນຂອງວັນເສົາ ທີ່ຜ່ານມາ (23:28 ນາທີ ຕາມເວລາໃນປະເທດລາວ) ເພື່ອສົ່ງຍານແຄັບຊູນ Soyuz MS-13 ນຳນັກບິນອະວະກາດຊຸດໃໝ່ 3 ຄົນເດີນທາງສູ່ສະຖານີອະວະກາດນານາຊາດ (ISS) ໄດ້ແກ່ທ່ານ ອະເລັກຊານເດີ ສະຄວາດຊັອບ (Alexander Skvortsov) ຄົນລັດເຊຍ ສັງກັດ ROSCOSMOS, ທ່ານ ແອນດຼິວ ມໍແກນ (Andrew Morgan) ຄົນອາເມຣິກາ ສັງກັດອົງການບໍລິຫານການບິນ ແລະ ອະວະກາດແຫ່ງຊາດສະຫະລັດ ອາເມຣິກາ (NASA) ແລະ ທ່ານ ລູກາ ປາມິຕາໂນ (Luca Parmitano) ຄົນອີຕາລີ ສັງກັດອົງການອະວະກາດເອີຣົບ (ESA).

ເຊິ່ງແຄັບຊູນ Soyuz MS-13 ເດີນທາງເຖິງຈຸດໝາຍເມື່ອວເລາ 22:48 ນາທີ ຕາມເວລາມາດຕະຖານສາກົນຂອງວັນເສົາ ທີ່ຜ່ານມາ (05:48 ນາທີ ວັນອາທິດຕາມເວລາໃນລາວ) ລວມເວລາໃນການເດີນທາງຄັ້ງນີ້ 6 ຊົ່ວໂມງ 20​ ນາທີ, ໂດຍແຂນກົນຂອງ ISS ໄດ້ດຶງຍານແຄັບຊູນເຂົ້າທຽບປະຕູທາງເຂົ້າສະຖານີອະວະກາດໄດ້ຢ່າງປອດໄພ, ເຊິ່ງການເດີນທາງຂອງນັກບິນອະວະກາດ ISS ຊຸດນີ້ເກີດຂຶ້ນໃນເວລາດຽວກັນກັບທີ່ວົງການອະວະກາດສາກົນສະເຫຼີມສະຫຼອງ ຄົບຮອບ 50 ປີ ໂຄງການ Apollo 11 ຂອງ NASA ທີ່ເປັນໂຄງການອະວະກາດໂຄງການທຳອິດຂອງໂລກ ທີ່ປະສົບຄວາມສຳເລັດໃນການສົ່ງຍານລົງຈອດເທິງດວງຈັນ ແລະ ມະນຸດຄົນທຳອິດທີ່ສ້າງປະຫວັດສາດຢຽບດວງຈັນຄື ນິວ ອາມສະຕຼອງ ເມື່ອວັນທີ 20 ກໍລະກົດ 1969.