ອິນເດຍ ສົ່ງຍານ “ຈັນທຣາຍານ-2” ຂຶ້ນສຳຫຼວດພື້ນຜິວດວງຈັນ (ວິດີໂອ)

ສຳນັກຂ່າວຕ່າງປະເທດລາຍງານ 22​ ກໍລະກົດ 2019 ວ່າ: ຈັນທຣາຍານ-2 (Chandrayaan-2) ຍານສຳຫຼວດດວງຈັນຂອງອິນເດຍ ຖືກສົ່ງຂຶ້ນໄປກັບຈະຫຼວດ ເມື່ອວເລາ 14:43 ນາທີ ຂອງວັນຈັນທີ 22 ກໍລະກົດນີ້ ຕາມເວລາທ້ອງຖິ່ນ (ເວລາ 16:13 ນາທີ ຕາມເວລາໃນປະເທດລາວ) ຈາກສູນອະວະກາດສາທິດ ຕາເວັນ ເທິງເກາະນອກຝັ່ງລັດອານທະຣະປະເທດ ທ່າມກາງສຽງຕົບມືກຶກກ້ອງໃນຫ້ອງຄວບຄຸມພາລະກິດ ຂະນະທີ່ຈະຫຼວດຍິ່ງຂຶ້ນໄປສູ່ທ້ອງຟ້າເໜືອມະຫາສະໝຸດອິນເດຍ ແລະ ສູນຄວບຄຸມພາລະກິດສຳຫຼວດດວງຈັນປະກາດວ່າ ຍານສຳຫຼວດແຍກຕົວຈາກຈະຫຼວດໄດ້ຢ່າງປອດໄພໂດຍບໍ່ມີບັນຫາໃດໆ.

ທ່ານ ເຄ ສີວັນ ປະທານອົງການວິໄຈອະວະກາດອິນເດຍກ່າວວ່າ ມື້ນີ້ຖືເປັນວັນປະຫວັດສາດສຳຄັນດ້ານອະວະກາດ, ວິທະຍາການ ແລະ ເຕັກໂນໂລຊີຂອງອິນເດຍ.

ການສົ່ງຈະຫຼວດນຳຍານຈຳຫຼວດດວງຈັນມູນຄ່າ 140 ລ້ານໂດລາສະຫະລັດໃນຄັ້ງນີ້ ໄດ້ຖືກເລື່ອນມາແລ້ວຄັ້ງໜຶ່ງ ຕາມກຳນົດເດີມແມ່ນຈະປ່ອຍໃນວັນທີ 15 ກໍລະກົດ ແຕ່ຕ້ອງຖືກຍົກເລີກພາຍໃນເວລາ 56 ນາທີກ່ອນຈະເຖິງກຳນົດເວລາປ່ອຍ ສາເຫດເພາະເຊື້ອໄຟຮົ່ວໄຫຼ, ໂດຍອິນເດຍໄດ້ພະຍາຍາມທີ່ຈະເປັນປະເທດທີ 4 ຕໍ່ຈາກລັດເຊຍ, ສະຫະລັດ ອາເມຣິກາ ແລະ ຈີນ ໃນການນຳຍານສຳຫຼວດລົງຈອດເທິງພື້ນຜິວດວງຈັນ.

ຜ່ານສຳຫຼວດຈັນທຣາຍານ-2 ມີນ້ຳໜັກ 2.4 ໂຕນ, ກຳນົດຈະຕ້ອງໂຄຈອນຮອບດວງຈັນເປັນເວລາ 1 ປີ ເພື່ອຖ່າຍພາບຕ່າງໆຂອງພື້ນຜິວດວງຈັນ ເພື່ອຫາສັນຍາລັກຂອງນ້ຳ ແລະ ສຶກສາເລື່ອງຊັ້ນບັນຍາກາດ, ສ່ວນຍານທີ່ຈະລົງຈອດເທິງພື້ນຜິວດວງຈັນຊື່ ວິຄຣຳ ເອ ສະຣະໄພ (Vikram A Sarabhai) ເຊິ່ງເປັນສື່ຂອງນັກວິທະຍາສາດຊາວອິນເດຍ ແລະ ເປັນຜູ້ລິເລີ່ມທີ່ໄດ້ຮັບການຍອມຮັບຢ່າງກວ້າງຂວາງວ່າເປັນບິດາແຫ່ງໂຄງການອະວະກາດຂອງອິນເດຍ ມີກຳນົດຈະລົງຈອດເທິງພື້ນຜິວດວງຈັນໃກ້ກັບຂົ້ວໃຕ້ ໂດຍຄາດວ່າປະມານຕົ້ນເດືອນກັນຍານີ້.