ອັດຕະປື ຮ່ວມກັບເຂື່ອນເຊປຽນ-ເຊນ້ຳນ້ອຍ ມອບເງິນຊົດເຊີຍ 50% ຕໍ່ຊັບສິນຜູ້ໄດ້ຮັບຜົນກະທົບເຂື່ອນແຕກ 26 ຕື້ກວ່າກີບ

ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງອັດຕະປືລາຍງານ 23 ກໍລະກົດ 2019 ວ່າ: ອັດຕະປືຈ່າຍເງິນຊົດເຊີຍ 50% ໃຫ້ຜູ້ທີ່ໄດ້ຮັບຜົນກະທົບດ້ານເສດຖະກິດຄົວເຮືອນຈາກອຸບັດຕິເຫດເຂື່ອນໄຟຟ້າເຊປຽນ-ເຊນ້ຳນ້ອຍແຕກຢູ່ ເມືອງສະໜາມໄຊ ມີຈຳນວນ 587 ຄົວເຮືອນ ລວມມີ 4 ບ້ານເປົ້າໝາຍ ໃນນັ້ນ ບ້ານ ສະໝອງ 75 ຄົວເຮືອນ ມູນຄ່າ 4 ຕື້ກວ່າກີບ, ບ້ານ ທ່າຫີນ 184 ຄົວເຮືອນ ມູນຄ່າ 8 ຕື້ກວ່າກີບ, ບ້ານໂຄກກ່ອງ 225 ຄົວເຮືອນ ມູນຄ່າ 8 ຕື້ກວ່າກີບ ແລະ ບ້ານ ທ່າແສງຈັນ 103 ຄົວເຮືອນ ມູນຄ່າ 5 ຕື້ກວ່າກີບ ລວມມູນຄ່າທັງໝົດ 26 ຕື້ກວ່າກີບ, ເງິນຊົດເຊີຍ 50% ທີ່ຈ່າຍໃຫ້ຜູ້ທີ່ຖືກຜົນກະທົບດ້ານເສດຖະກິດຄົວເຮືອນຄັ້ງນີ້ ລວມມີດ້ານພາຫະນະ, ເຄື່ອງໃຊ້ຄົວເຮືອນ, ວິສາຫະກິດຄົວເຮືອນ, ສັດລ້ຽງ, ສະບຽງອາຫານ ແລະ ເຄື່ອງໃຊ້ກະສິກຳ, ສ່ວນວ່າ ດ້ານສິ່ງປຸກສ້າງ, ຜົນລະປູກ, ທາດບັນຈຸອັດທິຂອງບັນພະບູລຸດນັ້ນ ແມ່ນຍັງບໍ່ທັນໄດ້ຄິດໄລ່ມູນຄ່າການຊົດເຊີຍ ເຊິ່ງປະຈຸບັນ ທາງບໍລິສັດພັດທະນາໂຄງການເຂື່ອນໄຟຟ້າເຊປຽນ-ເຊນ້ຳນ້ອຍພວມກຳລັງຄິດໄລ່ມູນຄ່າຄາມເສຍຫາຍຢູ່ ແລະ ຈະໄດ້ມີການຊົດເຊີຍໃນຄັ້ງຕໍ່ໄປ.

ພິທີມອບ-ຮັບ ເງິນຊົດເຊີຍດັ່ງກ່າວ ໄດ້ຈັດຂຶ້ນໃນວັນທີ 23 ກໍລະກົດ 2019 ທີ່ສູນພັກຊົ່ວຄາວຈຸດດົງບາກ, ໂດຍໃຫ້ກຽດມອບຂອງ ທ່ານ ເລັດ ໄຊຍະພອນ ເຈົ້າແຂວງອັດຕະປື ທັງເປັນຮອງຫົວໜ້າຄະນະສະເພາະກິດແກ້ໄຂໄພພິບັດລະດັບຊາດ ຕ່າງໜ້າຮັບໂດຍແມ່ນນາຍບ້ານທັງ 4 ບ້ານ, ມີການນຳຂອງແຂວງ, ເມືອງ ແລະ ພາກສ່ວນທີ່ກ່ຽວຂ້ອງ ຕະຫຼອດຮອດ ປະຊາຊົນຜູ້ປະສົບໄພເຂົ້າຮ່ວມ.

ໃນຕະຫຼອດໄລຍະໜຶ່ງປີທີ່ຜ່ານມາເຫັນໄດ້ວ່າ ສູນກາງພັກ-ລັດຖະບານ, ອົງການປົກຄອງທ້ອງຖິ່ນ ແລະ ບໍລິສັດຜູ້ພັດທະນາໂຄງການເຂື່ອນໄຟຟ້າເຊປຽນ-ເຊນ້ຳນ້ອຍ ຍັງໄດ້ໃຫ້ການຊ່ວຍເຫຼືອເບິ່ງແຍງ ດ້ານຊີວິດການເປັນຢູ່ຂອງປະຊາຊົນຜູ້ປະສົບໄພໃຫ້ມີຊີວິດການເປັນຢູ່ດີຂຶ້ນເທື່ອລະກ້າວຢ່າງຕໍ່ເນື່ອງຢູ່ ດັ່ງນັ້ນ, ການມອບ-ຮັບໃນເທື່ອນີ້ກ່ໍຖືວ່າເປັນໂອກາດອັນສຳຄັນໜຶ່ງ ເຊິ່ງເປັນວັນຄົບຮອບ 1 ປີ ຂອງເຫດການເຂື່ອນແຕກ ເພື່ອມອບເປັນຂອງຂວັນໃນການປຸກລະດົມຈິດໃຈພໍ່ເເມ່ປະຊາຊົນໃຫ້ມີຄວາມເຂັ້ມແຂງ, ໃຫ້ເປັນທຶນຮອນສືບຕໍ່ພັດທະນາເສດຖະກິດຄອບຄົວ ແລະ ສາມາດຜ່ານຜ່າວິກິດການຕ່າງໆນີ້ໂດຍໄວ ໃນຄະນະດຽວກັນ ການນຳຂອງແຂວງຍັງໄດ້ລົງເຄື່ອນໄຫວມອບເຄື່ອງຊ່ວຍເຫລືອ ອຸປະໂພກ, ບໍລິໂພກ ຢູ່ແຕ່ລະສູນພັກຊົ່ວຄາວ ແລະ ບາງບ້ານທີ່ໄດ້ຮັບຜົນກະທົບນຳອີກ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube