ທາງການໄທ ຮຽກທູດ ສປປ.ລາວ ເຂົ້າພົບ ປຶກສາຫາລືວິກິດແມ່ນ້ຳຂອງ ແລະ ໄພແລ້ງ ພ້ອມຊົມເຊີຍທີ່ບໍ່ກັກນ້ຳ

ສື່ໄທລາຍງານເມື່ອວັນທີ 23 ກໍລະກົດ 2019 ທີ່ຜ່ານມາວ່າ: ກະຊວງການຕ່າງປະເທດຂອງໄທແຈ້ງວ່າ ໄດ້ເຊີນທ່ານ ຫຼູ່ ຈ້ຽນ ເອກອັກຄະລັດຖະທູດຈີນ ປະຈຳປະເທດໄທ ແລະ ທ່ານ ແສງ ສຸຂະທິວົງ ເອກອັກຄະລັດຖະທູດ ສປປ.ລາວ ຈຳປະເທດໄທເຂົ້າພົບ ເມື່ອຕອນເຊົ້າວັນທີ 23 ກໍລະກົດ ທີ່ຜ່ານມາ ເພື່ອປຶກສາຫາລືກັບທ່ານ ອັດຖະຍຸດ ສຣີສະໝຸດ ຮອງຫົວໜ້າຫ້ອງການກະຊວງການຕ່າງປະເທດໄທ ຕໍ່ກັບບັນຫາໄພແຫ້ງແລ້ງໃນປະເທດໄທ ແລະ ທີ່ຫຼາຍປະເທດກຳລັງປະສົບຢູ່.

ເຊິ່ງທ່ານ ດອນ ປໍຣະມັດວິໄນ ລັດຖະມົນຕີກະຊວງການຕ່າງປະເທດຂອງໄທ ເປີດເຜີຍວ່າ ໃນການປຶກສາຫາລືດັ່ງກ່າວ ໄດ້ເວົ້າເຖິງບັນຫາການປ່ຽນແປງສະພາບອາກາດ ທີ່ມີຜົນຕໍ່ປະລິມານນ້ຳຝົນ ແລະ ລະດັບນ້ຳໃນແມ່ນ້ຳຂອງ ເຊິ່ງຈະນຳໄປສູ່ການຮ່ວມມືອັນເປັນຮູບປະທຳຮ່ວມກັນ, ໂດຍເຊື່ອວ່າທຸກປະເທດຮັບຮູ້ເຖິງຄວາມຮຸນແຮງຂອງໄພແຫ້ງແລ້ງທີ່ສົ່ງຜົນກະທົບຕໍ່ການດຳລົງຊີວິດຂອງປະຊາຊົນ ແລະ ສະພາບທາງທຳມະຊາດ ເຊິ່ງບັນຫາດັ່ງກ່າວນີ້ເປັນໄພທຳມະຊາດທີ່ທຸກປະເທດຕ້ອງຮ່ວມມືກັນແກ້ໄຂບັນຫາ ແລະ ສະເໜີແນວທາງການຜ່ອນຄາຍສະຖານະການໃຫ້ດີຂຶ້ນ. ສະຖານະການນ້ຳໜ້ອຍ, ໄພແລ້ງເປັນໄພທາງທຳມະຊາດທີ່ບັງເອີນເກີດຂຶ້ນຊ້ຳເຕີມໃນຊ່ວງທີ່ຝົນຕົກໜ້ອຍ ແຕ່ດີທີ່ຂະນະນີ້ ປະເທດຈີນໄດ້ປ່ອຍນ້ຳຈາກເຂື່ອນຈິງຫົງ ແລະ ສປປ.ລາວ ປ່ອຍນ້ຳຈາກເຂື່ອນໄຊຍະບູລີ ເຊິ່ງຊ່ວຍຫຼຸດຜ່ອນໄພແຫ້ງແລ້ງ ແລະ ເປັນປະໂຫຍດກັບປະເທດທ້າຍນ້ຳຫຼາຍ ເຊິ່ງຕ້ອງຂໍຊົມເຊີຍ ສົມກັບເປັນປະເທດທີ່ມີສາຍພົວພັນທີ່ໃກ້ຊິດ ແລະ ຍາວນານ.

ທ່ານ ດອນ ປໍຣະມັດວິໄນ ກ່າວອີກວ່າ ໃນການປະຊຸມກອບການຮ່ວມມືລຸ່ມແມ່ນ້ຳຂອງກັບຍີ່ປຸ່ນ, ການປະຊຸມປຶກສາຫາລືດ້ານນະໂຍບາຍຂອງກອບການຮ່ວມມືຂໍ້ລິເລີ່ມລຸ່ມແມ່ນ້ຳຂອງກັບສະຫະລັດ ອາເມຣິກາ ແລະ ການປະຊຸມກອບການຮ່ວມມືລຸ່ມແມ່ນ້ຳຂອງ-ຄົງຄາກັບອິນເດຍ ທີ່ຈະຈັດຂຶ້ນໃນວັນທີ 3​ ສິງຫາ 2019 ນີ້, ຈະມີການປຶກສາຫາລືເຖິງບັນຫາໄພແຫ້ງແລ້ງ ແລະ ການຮັບມືກັບການປ່ຽນແປງທາງສະພາບອາກາດທີ່ຈະນຳໄປສູ່ການໃຫ້ທຸກປະເທດມີບົດບາດ ແລະ ດຳເນີນການຮ່ວມກັນຢ່າງຈິງຈັງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube