ປະທານອົງການ IFAD ຢ້ຽມຢາມ ສປປ.ລາວ ແລະ ໄດ້ຊ່ວຍຊຸກຍູ້ສົ່ງເສີມກະສິກຳລາວແລ້ວ 15 ໂຄງການ ມູນຄ່າ 148 ລ້ານໂດລາ

ກະຊວງການຕ່າງປະເທດລາຍງານ 24 ກໍລະກົດ 2019 ວ່າ: ທ່ານ ກິວເບີດ ຮຸງໂບ ປະທານອົງການກອງທຶນສາກົນ ເພື່ອການພັດທະນາກະສິກຳ (IFAD) ພ້ອມດ້ວຍຄະນະໄດ້ເດີນທາງມາຢ້ຽມຢາມ ສປປ.ລາວ ຢ່າງເປັນທາງ ໃນລະຫວ່າງວັນທີ 22-25 ກໍລະກົດນີ້, ຈຸດປະສົງຂອງການເດີນທາງມາຢ້ຽມຢາມ ສປປ.ລາວ ຄັ້ງນີ້ ເພື່ອເປັນການຊຸກຍູ້ສົ່ງເສີມການພົວພັນຮ່ວມມືລະຫວ່າງ ສປປ.ລາວ ກັບ ອົງການ IFAD. ການຢ້ຽມຢາມຂອງປະທານ IFAD ຄັ້ງນີ້ ເປັນຄັ້ງທີ 2 ນັບແຕ່ ສປປ.ລາວ ໄດ້ຮັບການຊ່ວຍເຫຼືອຈາກອົງການດັ່ງກ່າວ ໃນປີ 1980 ເປັນຕົ້ນມາ ໂດຍຄັ້ງທຳອິດແມ່ນໃນປີ 2010.

ໃນໂອກາດນີ້, ປະທານອົງການ IFAD ໄດ້ເຂົ້າພົບທ່ານ ທອງລຸນ ສີສຸລິດ ນາຍົກລັດຖະມົນຕີ ແລະ ການນຳກະຊວງກ່ຽວຂ້ອງຄື: ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແລະ ທ່ານ ປອ. ລຽນທິແກ້ວ ລັດຖະມົນຕີກະຊວງກະສິກຳ ແລະ ປ່າໄມ້ ແລະ ທ່ານ ປອ. ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ ແລະ ຄູ່ຮ່ວມພັດທະນາອື່ນໆ.

ພ້ອມດຽວກັນນີ້, ຄະນະດັ່ງກ່າວ ຍັງໄດ້ເດີນທາງຢ້ຽມຢາມບັນດາໂຄງການຍຸດທະສາດສະໜັບສະໜູນ ການຄ້ຳປະກັນສະບຽງອາຫານ ແລະ ໂພສະນາການທີ່ໄດ້ຮັບການຊ່ວຍເຫຼືອຈາກອົງການ IFAD ຢູ່ແຂວງຊຽງຂວາງ ແລະ ໄດ້ເຂົ້າພົບທ່ານ ບຸນຕົ້ນ ຈັນທະພອນ ເຈົ້າແຂວງແຂວງຊຽງຂວາງ ພ້ອມດ້ວຍອຳນາດການປົກຄອງແຂວງ ແລະ ອຳນາດການປົກຄອງເມືອງຄຳ.

ການພົວພັນຮ່ວມມືລະຫວ່າງ ສປປ.ລາວ ແລະ ອົງການ IFAD ເລີ່ມແຕ່ປີ 1978, ການຮ່ວມມືສ່ວນໃຫຍ່ອີງໃສ່ແຜນພັດທະນາເສດຖະກິດ-ສັງຄົມແຫ່ງຊາດຂອງ ສປປ.ລາວ ໃນແຕ່ລະໄລຍະເປັນຫຼັກ, ໂດຍສະເພາະໃນຂົງເຂດການພັດທະນາຊົນນະບົດຮອບດ້ານ ແລະ ການຄ້ຳປະກັນດ້ານສະບຽງອາຫານ, ຄຽງຄູ່ກັບການຄຸ້ມຄອງທີ່ດິນ ແລະ ຊັບພະຍາກອນທຳມະຊາດໃຫ້ມີຄວາມຍືນຍົງ.

ການຊ່ວຍເຫຼືອ ສປປ.ລາວ ຂອງອົງການ IFAD ເລີ່ມແຕ່ປີ 1980 ເປັນຕົ້ນມາ ມີມູນຄ່າລວມ 148 ລ້ານໂດລາສະຫະລັດ ເພື່ອນຳໃຊ້ເຂົ້າໃນການຈັດຕັ້ງປະຕິບັດ 15 ໂຄງການ/ແຜນງານ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube