Facebook ຖືກປັບໃໝ 5 ຕື້ໂດລາ ຄະດີທີ່ໃຫ້ຂໍ້ມູນຜູ້ໃຊ້ກັບບໍລິສັດພາຍນອກ ເພື່ອສະແຫວງຫາຜົນປະໂຫຍດ

ສຳນັກຂ່າວຕ່າງປະເທດລາຍງານເມື່ອວັນທີ 24 ກໍລະກົດ 2019 ທີ່ຜ່ານມາວ່າ: ຄະນະກຳມາທິການການຄ້າຂອງລັດຖະບານກາງສະຫະລັດ ອາເມຣິກາ (FTC) ອອກຖະແຫຼງການວ່າ​: FTC ແລະ Facebook ບັນລຸຂໍ້ຕົກລົງປະນີປະນອມຍອມຄວາມນອກສານ ໃນການທີ່ຜູ້ໃຫ້ບໍລິການເຄືອຂ່າຍສັງຄົມອອນລາຍລາຍໃຫຍ່ທີ່ສຸດຂອງໂລກ ຕົກລົງຊຳລະຄ່າທຳນຽບ 5,000 ລ້ານໂດລາສະຫະລັດ ເພື່ອຍຸຕິຄະດີ ທີ່ Facebook ຜິດພາດຄັ້ງໃຫຍ່ໃນການປົກປ້ອງຄວາມເປັນສ່ວນຕົວຂອງຜູ້ໃຊ້ງານ ຈົນເກີດກໍລະນີທີ່ບໍລິສັດເຄັມບຼິດ ອະນາລິຕິກາ (Cambridge Analytica) ຂອງປະເທດອັງກິດ ສາມາດເຂົ້າເຖິງຖານຂໍ້ມູນຜູ້ໃຊ້ງານຂອງ Facebook ເພື່ອຜົນປະໂຫຍດທາງການເມືອງ ໃນການເລືອກຕັ້ງປະທານປະເທດສະຫະລັດ ອາເມຣິກາ ເມື່ອປີ 2016 ເຊິ່ງສົ່ງຜົນກະທົບຕໍ່ຜູ້ໃຊ້ Facebook ຫຼາຍເຖິງ 87 ລ້ານບັນຊີ ແລະ ກໍລະນີຂອງເຄັມບຼິດ ອະນາລິຕິກາ ຍັງສາມາດຂະຫຍາຍຜົນເປັນການພົບຄວາມຜິດພາດດ້ານການບໍລິຫານຈັດການຄວາມເປັນສ່ວນຕົນຂອງ Facebook ອີກຫຼາຍກໍລະນີ.

ຂະນະທີ່ທ່ານ ໂຈເຊັບ ໄຊມັອນ ປະທານ FTC ກ່າວວ່າ ຄ່າປັບໃໝດັ່ງກ່າວຖືວ່າສູງທີ່ສຸດເທົ່າທີ່ລັດຖະບານເຄີຍກຳນົດ ເພື່ອລົງໂທດບໍລິສັດເຕັກໂນໂລຊີຍັກໃຫຍ່ ໂດຍກອງປະຊຸມມີມະຕິສຽງສ່ວນຫຼາຍ 3 ຕໍ່ 2 ເຫັນດີກັບຈຳນວນເງິນຄ່າປັບໃໝ ແລະ ສະແດງຄວາມຫວັງວ່າຈະກະຕຸ້ນໃຫ້ບໍລິສັດຍົກລະດັບການຮັກສາຂໍ້ມູນຂອງຜູ້ໃຊ້ໃນອະນາຄົດ, ເຊິ່ງຈຳນວນເງິນປັບໃໝດັ່ງກ່າວແມ່ນກວມເອົາ 9% ຂອງລາຍໄດ້ໝຸນວຽນຂອງ Facebook ຕະຫຼອດທັງປີທີ່ຜ່ານມາ ນອກຈາກນີ້ຂໍ້ຕົກລົງອື່ນລະຫວ່າງ FTC ກັບ Facebook ຍັງລວມເຖິງການທີ່ທາງບໍລິສັດຕ້ອງກວດສອບຄວາມປອດໄພຂອງບໍລິການທັງໝົດ, ທັງບໍລິການໃໝ່ ແລະ ບໍລິການທີ່ມີການຍົກລະດັບຄຸນນະພາບ ເຊິ່ງລວມເຖິງ Instagram ແລະ WhatsApp ແລະ ການຈັດຕັ້ງຄະນະກຳມະການອິດສະຫຼະເພື່ອປົກປ້ອງຄວາມເປັນສ່ວນຕົວຂອງຜູ້ໃຊ້ງານທັງໝົດ, ໂດຍທ່ານ ມາກ ຊັກເຄິເບີກ ປະທານບໍລິສັດ Facebook ຈະບໍ່ມີອຳນາດເໜືອຄະນະກຳມະການຄະນະດັ່ງກ່າວຢ່າງເດັດຂາດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube