ສປປ.ລາວ ຈະຂາຍໄຟຟ້າໃຫ້ມາເລເຊຍເພີ່ມຈາກ 100 ເມກາວັດ ເປັນ 300 ເມກາວັດ

ລັດວິສາຫະກິດໄຟຟ້າລາວລາຍງານ 25 ກໍລະກົດ 2019 ວ່າ: ໃນຕອນເຊົ້າຂອງວັນພະຫັດນີ້ ຢູ່ສຳນັກງານໃຫຍ່ ລັດວິສາຫະກິດໄຟຟ້ລາວ, ນະຄອນຫຼວງວຽງຈັນ ໄດ້ມີກອງປະຊຸມຊື້-ຂາຍພະລັງງານໄຟຟ້າ ລະຫວ່າງລັດວິສາຫະກິດໄຟຟ້າລາວ-ການໄຟຟ້າຝ່າຍຜະລິດແຫ່ງປະເທດໄທ-ການໄຟຟ້າຂອງມາເລເຊຍ ພາຍໃຕ້ຊື່ໂຄງການ Lao PDR-Thailand-Malaysia Power Integration Project (LTM-PIP 2.0) ໂດຍການເປັນປະທານຂອງທ່ານ ເຄນ ເທບວົງສາ ຜູ້ຊ່ວຍຜູ້ອຳນວຍການໃຫຍ່ ທັງເປັນຫົວໜ້າຝ່າຍປະຕິບັດການໄຟຟ້ານະຄອນຫຼວງ ລັດວິສາຫະກິດໄຟຟ້າລາວ, ມີຜູ້ບໍລິຫານໄຟຟ້າມາເລເຊຍ, ຜູ້ບໍລິຫານການໄຟຟ້າຝ່າຍຜະລິດແຫ່ງປະເທດໄທ ແລະ ພາກສ່ວນທີ່ກ່ຽວຂ້ອງ 3 ຝ່າຍເຂົ້າຮ່ວມ.

ໂຄງການຊື້-ຂາຍພະລັງງານໄຟຟ້າ LTM-PIP ໂດຍຜ່ານລະບົບສາຍສົ່ງໄຟຟ້າແຮງສູງ ຂອງການໄຟຟ້າຝ່າຍຜະລິດແຫ່ງປະເທດໄທ ຖືໄດ້ວ່າເປັນໂຄງການໜຶ່ງທີ່ສຳຄັນໃນການຊື້-ຂາຍພະລັງງານໄຟຟ້າພາຍໃນກຸມປະເທດອາຊຽນ ແລະ ເປັນກອງປະຊຸມໃນການຂະຫຍາຍອາຍຸສັນຍາເດີມທີ່ຈະໝົດລົງໃນວັນທີ 31 ທັນວາ 2019 ອອກໄປຕື່ມອີກ 2 ປີ ໂດຍຈະໄດ້ເລີ່ມໃນວັນທີ 1 ມັງກອນ 2020 ຫາ 31 ທັນວາ 2021 ພ້ອມກັນນັ້ນຈະໄດ້ເພີ່ມກຳລັງການສົ່ງຈາກ 100 ເມກາວັດ ເປັນ 300 ເມກາວັດ.

ໂດຍອີງຕາມຂໍ້ມູນໃນລາຍງານສະຖິຕິໄຟຟ້າ 2018 ຂອງລັດວິສາຫະກິດໄຟຟ້າລາວໃຫ້ຮູ້ວ່າ ໃນປີ 2018 ຜ່ານມາ ສປປ.ລາວ ໄດ້ສົ່ງພະລັງງານໄຟຟ້າຂາຍໃຫ້ແກ່ປະເທດມາເລເຊຍທັງໝົດ 16.74 ລ້ານ kWh ເປັນເງິນ 1.25 ລ້ານໂດລາສະຫະລັດ.