ດ່ວນ…! ກົມອຸຕຸແຈ້ງເຕືອນ ໃຫ້ລະວັງພາຍຸໝູນເຂດຮ້ອນ “ວິພາ” ກຳລັງເຄື່ອນທີ່ມາ

ກົມອຸຕຸນິຍົມ ແລະ ອຸທົກກະສາດ ອອກແຈ້ງເຕືອນພາຍຸໝູນເຂດຮ້ອນ ເລກທີ 1082/ກອຕທ, ລົງວັນທີ 31 ກໍລະກົດ 2019 ໂດຍມີເນື້ອໃນລະບຸວ່າ:

ໃນໄລຍະວັນທີ 31 ກໍລະກົດ – 4​ ສິງຫາ 2019 ພາຍຸໝູນເຂດຮ້ອນວິພາ (Wipha) ຫົວທີ 07 ປະຈຳປີ 2019 ເຊິ່ງໃນເວລາ 09:00 ໂມງ ຂອງວັນທີ 31 ກໍລະກົດ 2019 ມີຈຸດສູນກາງຢູ່ເສັ້ນຂະໜານທີ 19.1 ອົງສາເໜືອ ແລະ ເສັ້ນແວງ 113.1 ອົງສາຕາເວັນອອກ ພວມເຄື່ອນທີ່ໄປທາງຕິດຕາເວັນຕົກ-ຕາເວັນຕົກສຽງເໜືອ ດ້ວຍຄວາມໄວ 15 ກໍໂລແມັດຕໍ່ຊົ່ວໂມງ.

ຈາກນັ້ນພາຍຸຫົວນີ້ ຈະເຄື່ອນທີ່ຜ່ານເກາະໄຮໜານ ແລະ ຈະມີທ່າອ່ຽງເຄື່ອນເຂົ້າຝັ່ງທາງພາກເໜືອຂອງປະເທດຫວຽດນາມ ໃນໄລຍະວັນທີ 1-2 ສິງຫາ 2019 ນີ້. ຈາກທ່າອ່າງການເຄື່ອນທີ່ຂອງພາຍຸຫົວນີ້ ໃນໄລຍະວັນທີ 3-5 ສິງຫາ 20/9 ຈະເຮັດໃຫ້ລົມມໍລະສຸມຕາເວັນຕົກສຽງໃຕ້ມີກຳລັງແຮງເພີ່ມຂຶ້ນພັດປົກຄຸມຢູ່ພາກເໜືອ ລົງຫາພາກກາງຂອງປະເທດລາວ, ເຊິ່ງຈະເຮັດໃຫ້ມີຝົນຕົກໃນລະດັບຄ່ອຍ ຫາ ປານກາງ ເປັນບໍລິເວນກວ້າງ ແລະ ຕົກໜັກຢູ່ບາງທ້ອງຖິ່ນແຂວງພາກເໜືອ ລົງຫາພາກກາງ ແລະ ພາກໃຕ້.

ດັ່ງນັ້ນ, ຈຶ່ງແຈ້ງເຕືອນເຖິງອຳນາດການປົກຄອງທຸກພາກສ່ວນ ແລະ ປະຊາຊົນບັນດາເຜົ່າທີ່ອາໄສຢູ່ບັນດາແຂວງຜົ້ງສາລີ, ຫົວພັນ, ຊຽງຂວາງ, ຫຼວງນ້ຳທາ, ອຸດົມໄຊ, ບໍ່ແກ້ວ, ຫຼວງພະບາງ, ໄຊຍະບູລີ, ໄຊສົມບູນ, ວຽງຈັນ, ບໍລິຄຳໄຊ, ຄຳມ່ວນ, ສະຫວັນນະເຂດ, ນັບທັງນະຄອນຫຼວງວຽງຈັນ, ສາລະວັນ, ຈຳປາສັກ, ເຊກອງ ແລະ ອັດຕະປື ໃຫ້ມີສະຕິລະມັດລະວັງຕໍ່ສະພາບຝົນຕົກໜັກ ແລະ ລົມພັດແຮງ, ນ້ຳຖ້ວມຊຸ, ນ້ຳຖ້ວມອັ່ງ ແລະ ສຳລັບຜູ້ທີ່ຈະເດີນທາງໄປພາກເໜືອໃຫ້ມີສະຕິລະມັດລະວັງຕໍ່ສະພາບດິນເຈື່ອນ.

ຂໍໃຫ້ຕິດຕາມຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະາດໃນໄລຍະ 1 ຫາ 5 ວັນຕໍ່ໜ້ານີ້.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube