ກອງປະຊຸມລັດຖະມົນຕີຕ່າງປະເທດອາຊຽນ ຄັ້ັງທີ 52 ປຶກສາຫາລືຫຼາຍບັນຫາທີ່ທ້າທາຍໃນພູມມິພາກ

ລາຍງານ 31 ກໍລະກົດ 2019, ທ່ານ ພົນເອກ ປຣະຍຸດ ຈັນໂອຊາ ນາຍົກລັດຖະມົນຕີ ທັງເປັນລັດຖະມົນຕີກະຊວງປ້ອງກັນປະເທດໄທ ເປັນປະທານໃນພິທີເປີດກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 52 ທີ່ທີ່ນະຄອນຫຼວງບາງກອກ ໂດຍມີລັດຖະມົນຕີຕ່າງປະເທດອາຊຽນ ແລະ ປະເທດທີ່ໄດ້ຮັບເຊີນເຂົ້າ.

ທ່ານ ພົນເອກ ປຣະຍຸດ ຈັນໂອຊາ, ນາຍົກລັດຖະມົນຕີ ແລະ ລັດຖະມົນຕີກະຊວງປ້ອງກັນປະເທດຂອງໄທ

ໃນໂອກາດນີ້, ນາຍົກລັດຖະມົນຕີຂອງໄທກ່າວໃນຕອນໜຶຶ່ງວ່າ ໃນຖານະທີ່ໄທເປັນປະທານອາຊຽນປີນີ້ ແມ່ນມີຄວາມມຸ່ງໝັ້ນທີ່ຈະສ້າງປະຊາຄົມອາຊຽນ ທີ່ມີປະຊາຊົນເປັນສູນກາງ ບໍ່ປ່ອຍປະໃດໄວ້ທາງຫຼັງ ແລະ ກ້າວໄປສູ່ອະນາຄົດ ພາຍໃຕ້ຄຳຂວັນ “ຮ່ວມມື ຮ່ວມໃຈ ກ້າວໄກ ຍືນຍົງ” ເພື່ອສ້າງປະຊາຄົມໃຫ້ເຕີບໃຫຍ່ຢ່າງໝັ້ນຄົງ ແລະ ຍືນຍົງ ແລະ ກຽມພ້ອມເພື່ອຮັບມືກັບການປ່ຽນແປງ ແລະ ສິ່ງທ້າທາຍຕ່າງໆ ໂດຍຈະຮ່ວມແຮງຮ່ວມໃຈກັບຮຸ້ນສ່ວນນອກພູມມິພາກ ຊຸກດັນໃຫ້ເກີດຄວາມຍືນຍົງໃນທຸກດ້ານ ແລະ ເປັນປະໂຫຍດຕໍ່ປະຊາຊົນ.

ທ່ານ ພົນເອກ ປຣະຍຸດ ກ່າວອີກວ່າ ອາຊຽນໄດ້ສ້າງໝາກຜົນທີ່ເປັນຮູບປະທຳທີ່ສຳຄັນຫຼາຍຢ່າງ ຕະຫຼອດໄລຍະເວລາ 6 ເດືອນທີ່ຜ່ານມາ ແຕ່ອາຊຽນບໍ່ສາມາດບັນລຸຜົນໄດ້ພຽງລຳພັງ ຈະຕ້ອງເສີມສ້າງການຮ່ວມມືກັບປະເທດຄູ່ເຈລະຈາອາຊຽນ ແລະ ປະເທດນອກພູມມິພາກ ລວມທັງເປີດຮັບການຮ່ວມມືກັບພາຄີຕ່າງໆ ແລະ ກອງປະຊຸມລັດຖະມົນຕີຕ່າງປະເທດຄັ້ງນີ້ ເປັນໂອກາດດີ ເພື່ອສ້າງຄວາມຕໍ່ເນື່ອງຈາກກອງປະຊຸມຕ່າງໆ ແລະ ໝາກຜົນທີ່ເປັນຮູບປະທຳໃນ 3 ແນວທາງຄື:

  1. ການໃຊ້ປະໂຫຍດຈາກກົນໄກ ທີ່ອາຊຽນມີບົດບາດນຳ ແລະ ການຮ່ວມມືອາຊຽນ ກັບປະເທດຄູ່ເຈລະຈາ ເພື່ອສ້າງຄວາມຍືນຍົງໃນທຸກດ້ານໃນອາຊຽນ ແລະ ເພື່ອປະໂຫຍດຂອງປະຊາຊົນອາຊຽນທຸກຄົນ
  2. ການສົ່ງເສີມການເຊື່ອມຈອດລະຫວ່າງກັນ ດ້ວຍການໃຊ້ປະໂຫຍດຈາກແຜນແມ່ບົດ ວ່າດ້ວຍການເຊື່ອມຈອດລະຫວ່າງກັນໃນອາຊຽນ ສະບັບປັດຈຸບັນ ກັບຍຸດທະສາດການເຊື່ອມຈອດຕ່າງໆນອກພູມມິພາກໃນດ້ານຕ່າງໆ
  3. ການສົ່ງເສີມຄວາມໝັ້ນຄົງໃນພູມມິພາກ ດ້ວຍການເຊີນຊວນໃຫ້ປະເທດເພື່ອນມິດ ມາຮ່ວມມືບົນຫຼັກການ 3M ດ້ວຍການສ້າງບັນຍາກາດທີ່ໄວ້ເນື້ອເຊື່ອໃຈກັນ, ເຄົາລົບ ແລະ ເຂົ້າໃຈຄວາມແຕກຕ່າງຫຼາກຫຼາຍລະຫວ່າງກັນ ແລະ ກ້າວສູ່ຜົນປະໂຫຍດຮ່ວມກັນ ລວມທັງການຮ່ວມກັນແກ້ໄຂຂໍ້ຂັດແຍ່ງໂດຍສັນຕິວິທີ.

ທ່ານ ດອນ ປໍຣະມັດວິໄນ, ລັດຖະມົນຕີກະຊວງການຕ່າງປະເທດຂອງໄທ

ໃນດ້ານຂອງທ່ານ ດອນ ປໍຣະມັດວິໄນ ລັດຖະມົນຕີກະຊວງການຕ່າງປະເທດຂອງໄທກ່າວວ່າ ໝາກຜົນຂອງກອງປະຊຸມສຸດຍອດອາຊຽນ ຄັ້ງທີ 34 ທີ່ຜ່ານມາ ໄດ້ສະທ້ອນໃຫ້ເຫັນເຖິງສາຍພົວພັນທາງພູມສາດ, ການເມືອງ, ຄວາມໝັ້ນຄົງ,​ ເສດຖະກິດ, ສັງຄົມ ແລະ ວັດທະນະທຳ ໃນພູມມິພາກອາຊຽນ ເພື່ອຕໍ່ຍອດສູ່ກອງປະຊຸມລັດຖະມົນຕີຕ່າງປະເທດອາຊຽນຄັ້ງນີ້ ໃນການກະກຽມຄວາມພ້ອມກ່ອນທີ່ຈະປະສົບກັບບັນຫາຄວາມທ້າທ້າຍຕ່າງໆຮ່ວມກັນ ໂດຍສະເພາະບັນຫາດິຈິຕອນ ເພື່ອກຽມພ້ອມກ່ອນເຂົ້າສູ່ຍຸກປະຕິວັດ ອຸດສາຫະກຳ 4.0 ລວມເຖິງການປ່ຽນແປງສະພາບດິນຟ້າອາກາດ ແລະ ການກໍ່ອາຊະຍາກຳຂ້າມຊາດ ດັ່ງນັ້ນ, ຈຶ່ງເປັນສິ່ງທີ່ສຳຄັນທີ່ທຸກປະເທດໃນພູມມິພາກຕ້ອງຮ່ວມມືກັນ ພ້ອມສະແຫວງຫາການຮ່ວມມືກັບປະເທດນອກພູມມິພາກ ເຊິ່ງມຸມມອງຂອງອາຊຽນຕໍ່ແນວຄິດອິນໂດ-ປາຊີຟິກ (An ASEAN Indo-Pacific Outlook) ທີ່ສະທ້ອນແນວຄິດຂອງອາຊຽນ ຈະເປັນສ່ວນສຳຄັນໃນການເປີດໂອກາດຫາການເຊື່ອມຈອດດ້ານຕ່າງໆຢ່າງຍືນຍົງເຊັ່ນ: ການຮ່ວມມືດ້ານເສດຖະກິດທາງທະເລ ເພື່ອໃຫ້ເກີດຄວາມໝັ້ນໃຈຕໍ່ຍຸດທະສາດທາງເສດຖະກິດຮ່ວມກັນ.

ກອງປະຊຸມຄັ້ງນີ້ ມີຜູ້ແທນຈາກຫຼາຍກວ່າ 30 ປະເທດເຂົ້າຮ່ວມໄດ້ແກ່: ປະເທດສະມາຊິກອາຊຽນ, ປະເທດຄູ່ເຈລະຈາ 10 ປະເທດຄື: ອົດສະຕຣາລີ, ການາດາ, ຈີນ, ສະຫະພາບເອີຣົບ, ອິນເດຍ, ຍີ່ປຸ່ນ, ນິວຊີແລນ, ເກົາຫຼີໃຕ້, ລັດເຊຍ, ສະຫະລັດ ອາເມຣິກາ; ປະເທດສະມາຊິກກອງປະຊຸມອາຊຽນ ວ່າດ້ວຍການຮ່ວມມືດ້ານເມືອງ ແລະ ຄວາມໝັ້ນຄົງໃນພູມມິພາກອາຊີ-ປາຊີຟິກນອກເໜືອຈາກປະເທດຄູ່ເຈລະຈາອີກ 7 ປະເທດຄື: ບັງກະລາເທດ, ເກົາຫຼີເໜືອ, ມົງໂກລີ, ປາກິດສະຖານ, ປາປົວນິວກິນີ, ຕິມໍ-ເລສເຕ ແລະ ສີລັງກາ ແລະ ປະເທດທີ່ໄດ້ຮັບເຊີນໃຫ້ຖານະແຂກຂອງປະທານອາຊຽນໄດ້ແກ່: ນອກແວ, ເປຣູ, ສະວິດ ແລະ ຕວັກກີ.

ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດຂອງລາວ

ນອກຈາກນີ້, ຈະມີກອງປະຊຸມລະດັບລັດຖະມົນຕີໃນກອບອະນຸພູມມິພາກອີກ 4 ກອງປະຊຸມໄດ້ແກ່: ກອງປະຊຸມລັດຖະມົນຕີຂໍ້ລິເລີ່ມລຸ່ມແມ່ນ້ຳຂອງຕອນລຸ່ມ (LMI) ຄັ້ງທີ 12, ກອງປະຊຸມລັດຖະມົນຕີກອບການຮ່ວມມືແມ່ນ້ຳຂອງ-ຄົງຄາ ຄັ້ງທີ 10, ກອງປະຊຸມລະດັບລັດຖະມົນຕີປະເທດລຸ່ມແມ່ນ້ຳຂອງກັບເກົາຫຼີໃຕ້ ຄັ້ງທີ 9 ແລະ ກອງປະຊຸມລັດຖະມົນຕີປະເທດລຸ່ມແມ່ນ້ຳຂອງກັບຍີ່ປຸ່ນ ຄັ້ງທີ 12 ແລະ ກິດຈະກຳອື່ນໆທີ່ກ່ຽວຂ້ອງ.