ທົ່ວໂລກອວ່າຍກ້ອງສ່ອງໄທ ຕໍ່ເຫດລະເບີດຫຼາຍຄັ້ງໃນບາງກອກ ທີ່ອາດສົ່ງຜົນຕໍ່ພາບລັກການເປັນເຈົ້າພາບປະຊຸມອາຊຽນ

ລາຍງານ 2 ສິງຫາ 2019, ຈາກສະຖານະການເຫດລະເບີດຢ່າງໜ້ອຍ 6 ຄັ້ງ ຕາມສະຖານທີ່ສຳຄັນຫຼາຍແຫ່ງໃນນະຄອນຫຼວງບາງກອກ ເຊິ່ງເປົ້າໝາຍສ່ວນໃຫຍ່ເປັນສະຖານທີ່ທາງລັດຖະການ ແລະ ລະບົບການຂົນສົ່ງ ໂດຍສົ່ງຜົນໃຫ້ມີຜູ້ໄດ້ຮັບບາດເຈັບຢ່າງໜ້ອຍ 4 ຄົນ ແລະ ມີລາຍງານຊັບສິນເສຍຫາຍຈຳນວນໜຶ່ງ, ໃນດ້ານຂອງທ່ານ ພົນເອກ ປຣະຍຸດ ຈັນໂອຊາ ນາຍົກລັດຖະມົນຕີຂອງໄທ ໄດ້ມີຄຳສັ່ງສຸກເສີນໃຫ້ຍົກລະດັບຮັກສາຄວາມປອດໄພສະຖານທີ່ສຳຄັນທຸກແຫ່ງໃນນະຄອນຫຼວງບາງກອກ ພ້ອມທັງຂໍໃຫ້ປະຊາຊົນຢ່າແຕກຕື່ນ ເນື່ອງຈາກເຈົ້າໜ້າທີ່ຝ່າຍຄວາມໝັ້ນຄົງຈະຕິດຕາມສະຖານະການຢ່າງໃກ້ຊິດ ແລະ ເຝົ້າລະວັງເຫດການຕະຫຼອດ 24 ຊົ່ວໂມງ.

ເຊິ່ງເຫດລະເບີດຫຼາຍຄັ້ງໃນວັນສຸກນີ້ ເກີດຂຶ້ນຫ່າງກັນພຽງວັນດຽວ ພາຍຫຼັງທີ່ມີຜູ້ຕ້ອງສົງໄສ 2 ຄົນ ລອບວາງລະເບີດໜ້າສຳນັກງານຕຳຫຼວດແຫ່ງຊາດໄທ ເຊິ່ງຢູ່ໃກ້ກັບໂຮງແຮມທີ່ເປັນສະຖານທີ່ຈັດກອງປະຊຸມລັດຖະມົນຕີຕ່າງປະເທດອາຊຽນ ແລະ ຄູ່ເຈລະຈາຕະຫຼອດໄລຍະອາທິດນີ້ ທີ່ຜູ້ເຂົ້າຮ່ວມງານລ້ວນແຕ່ເປັນບຸກຄົນສຳຄັນ ລວມເຖິງຕົວແທນຈາກປະເທດມະຫາອຳນາດເຊັ່ນ: ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ, ທ່ານ ເຊີເກ ລາວະຣົບ ລັດຖະມົນກະຊວງການຕ່າງປະເທດລັດເຊຍ ແລະ ທ່ານ ຫວັງອີ້  ລັດຖະມົນຕີກະຊວງການຕ່າງປະເທດຈີນ.

ນອກຈາກນີ້, ເວທີການປະຊຸມລັດຖະມົນຕີຕ່າງປະເທດອາຊຽນຄັ້ງນີ້ ຍັງເປັນສະຖານທີ່ນັດພົບ ແລະ ເຈລະຈາຜ່ອນຄາຍຄວາມຂັດແຍ່ງ ທີ່ກຳລັງສົ່ງຜົນກະທົບໃນຫຼາຍລະດັບ ລວມເຖິງການພົບປະຫາລືລະຫວ່າງທ່ານ ທາໂຣ ໂຄໂນະ ລັດຖະມົນຕີກະຊວງການຕ່າງປະເທດຍີ່ປຸ່ນ ກັບ ທ່ານ ນາງ ຄັງ ຄະຢອງ-ຮວາ ລັດຖະມົນຕີກະຊວງການຕ່າງປະເທດເກົາຫຼີໃຕ້ ທີ່ທັງສອງປະເທດກຳລັງມີຂໍ້ຂັດແຍ່ງທາງການຄ້າ ແລະ ທ່ານ ໂດມິນິກ ຣາບ ລັດຖະມົນຕີກະຊວງການຕ່າງປະເທດອັງກິດ ທີ່ຢ້ຽມຢາມໄທ ເພື່ອສະແຫວງຫາໂອກາດຍົກລະດັບສາຍພົວພັນທາງການຄ້າກັບອາຊຽນ ກ່ອນທີ່ຈະອອກຈາກສະຫະພາບເອີຣົບ, ຈຶ່ງມີການວິເຄາະວ່າ ຜູ້ຢູ່ເບື້ອງຫຼັງບັນຫາຄວາມວຸ້ນວາຍດັ່ງກ່າວ ອາດມີເຈດຕະນາທຳລາຍຄວາມເຊື່ອໝັ້ນຂອງໄທ ໃນການເປັນເຈົ້າພາບຈັດກອງປະຊຸມອາຊຽນ, ເນື່ອງຈາກຄົບຮອບ 10 ປີພໍດີທີ່ຕຳແໜ່ງປະທານອາຊຽນໝຸນວຽນມາທີ່ໄທອີກຄັ້ງ ຕໍ່ຈາກປີ 2009 ເຊິ່ງເກີດສະຖານະການຄວາມວຸ້ນວາຍໃນກອງປະຊຸມຄັ້ງນັ້ນ ແລະ ໄດ້ທຳລາຍພາບລັກຂອງລັດຖະບານໄທຊຸດນັ້ນຫຼາຍສົມຄວນ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube