ສ.ອາເມຣິກາວ່າຈີນກໍ່ຄວາມປັ່ນປ່ວນໃນແມ່ນ້ຳຂອງ, ຈີນວ່າບາງປະເທດນອກພູມມິພາກມັກວິຈານໂດຍໄຮ້ເຫດຜົນ

ລາຍງານ 3 ສິງຫາ 2019: ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ກ່າວໃນລະຫວ່າງກອງປະຊຸມການຮ່ວມມືລະຫວ່າງອາຊຽນ ກັບ ກຸ່ມປະເທດແມ່ນ້ຳຂອງຕອນລຸ່ມ ຄັ້ງທີ 12 ທີ່ບາງກອກ ປະເທດໄທ, ເຊິ່ງປະກອບດ້ວຍປະເທດມຽນມາ, ໄທ, ລາວ, ກຳປູເຈຍ ແລະ ຫວຽດນາມ ເມື່ອວັນພະຫັດ ທີ່ຜ່ານມາ ວ່າວິກິດໄພແຫ້ງແລ້ງທີ່ເກີດຂຶ້ນໃນຫຼາຍພູມມິພາກຂອງກຸ່ມປະເທດແມ່ນ້ຳຂອງຕອນລຸ່ມ ເປັນຜົນມາຈາກການທີ່ຈີນໃຊ້ແມ່ນ້ຳຂອງ ທີ່ເປັນຊັບພະຍາກອນສຳຄັນຂອງກຸ່ມປະເທດເຫຼົ່ານີ້ ທີ່ສ່ວນໃຫຍ່ຍັງດຳລົງຊີວິດດ້ວຍການຜະລິດກະສິກຳ ເປັນເຄື່ອງມືໃນການຕໍ່ລອງ ແລະ ຄວບຄຸມຜ່ານການກັກເກັບ ແລະ ປ່ອຍນ້ຳ ເຊິ່ງຍັງເປັນການທຳລາຍລະບົບນິເວດໃນບໍລິເວນນີ້ດ້ວຍ.

ເຊິ່ງທ່ານ ໄມ ພອມແພວ ກ່າວຕໍ່ວ່າ ກຸ່ມປະເທດລຸ່ມແມ່ນ້ຳຂອງປະສົບບັນຫາລະດັບນ້ຳຕ່ຳກວ່າທີ່ຄວນຈະເປັນຕະຫຼອດໄລຍະເວລາ 1 ທົດສະວັດທີ່ຜ່ານມາ ເນື່ອງຈາກຈີນທີ່ຢູ່ເໜືອແມ່ນ້ຳຂອງບໍ່ຍ່ອມປ່ອຍນ້ຳ ໂດຍສ້າງເຂື່ອນແລ້ວຢ່າງໜ້ອຍ 1 ແຫ່ງ, ນອກຈາກນີ້ລັດຖະບານ ສ.ອາເມຣິກາ ຍັງມີຂໍ້ມູນວ່າລັດຖະບານຈີນກະກຽມການລະເບີດ ແລະ ຂຸດເຈາະພື້ນທີ່ລຸ່ມນ້ຳບາງສ່ວນອີກດ້ວຍ ຈຶ່ງຂໍຮຽກຮ້ອງໃຫ້ໜ່ວຍງານທີ່ກ່ຽວຂ້ອງກວດສອບບັນຫານີ້ຢ່າງຈິງຈັງ ແລະ ສ.ອາເມຣິກາ ພ້ອມໃຫ້ການສະໜັບສະໜູນ.

ໃນດ້ານຂອງທ່ານ ຫວັງ ອີ້ ລັດຖະມົນຕີກຊະວງການຕ່າງປະເທດຂອງຈີນ ກ່າວເຖິງມຸມມອງຕໍ່ບັນຫາໄພແຫ້ງແລ້ງຂອງແມ່ນ້ຳຂອງ ລະຫວ່າງເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ +3 ຄື: ຈີນ, ຍີ່ປຸ່ນ ແລະ ເກົາຫຼີໃຕ້ ຄັ້ງທີ 20 ທີ່ບາງກອງ ເຊັ່ນກັນ ວ່າ: ແມ່ນ້ຳລ້ານຊ້າງ ຫຼື ແມ່ນ້ຳຂອງເປັນແມ່ນ້ຳສາຍສຳຄັນຕໍ່ການດຳລົງຊີວິດຂອງທັງປະຊາຊົນຈີນ ແລະ ປະຊາຊົນໃນປະເທດລຸ່ມແມ່ນ້ຳຂອງ ທັງສອງຝ່າຍຕ່າງກໍ່ມີຊະຕາກຳຮ່ວມກັນ ທັງປະເທດເໜືອນ້ຳ ແລະ ລຸ່ມນ້ຳໄດ້ດຳເນີນງານຮ່ວມກັນຢ່າງໃກ້ຊິດມາໂດຍຕະຫຼອດ ຈົນກາຍເປັນເນື້ອໃນສຳຄັນຂອງກອບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ (MLC), ພວກເຮົາຮູ້ນຳກັນດີວ່າ ປີນີ້ບໍລິເວນຕອນລຸ່ມແມ່ນ້ຳຂອງເກີດໄພແຫ້ງແລ້ງ ເຊິ່ງຄວາມຈິງແລ້ວບໍ່ພຽງແຕ່ພື້ນທີ່ຕອນລຸ່ມແມ່ນ້ຳຂອງເທົ່ານັ້ນ ແຕ່ພື້ນທີ່ເໜືອແມ່ນ້ຳຂອງກໍ່ຄືແມ່ນ້ຳລ້ານຊ້າງ ກໍ່ປະສົບສະຖານະການໄພແຫ້ງແລ້ງເຊັ່ນກັນ, ເມື່ອພິຈາລະນາເຖິງຄວາມຈຳເປັນຂອງປະເທດລຸ່ມແມ່ນ້ຳຂອງແລ້ວ ປະເທດຈີນກ້າວຂ້າມຄວາມຍາກລຳບາກຂອງຕົນເອງ ໄດ້ເພີ່ມປະລິມານການປ່ອຍນ້ຳໃຫ້ກັບພື້ນທີ່ຕອນລຸ່ມຂອງແມ່ນ້ຳຂອງໃນປະລິມານທີ່ຫຼາຍກວ່າມາດຕະຖານ ໂດຍຫວັງວ່າມາດຕະການທີ່ສະແດງອອກເຖິງຄວາມປາຖະໜາດີນີ້ ຈະສາມາດບັນເທົາສະຖານະການໄພແຫ້ງແລ້ງຂອງພື້ນທີ່ແມ່ນ້ຳຂອງຕອນລຸ່ມໄດ້.

ນອກຈາກນີ້, ທ່ານ ຫວັງ ອີ້ ຍັງຊີ້ແຈງຕື່ມວ່າ: ປະລິມານ້ຳໄຫຼຜ່ານຂອງແມ່ນ້ຳລ້ານຊ້າງ ມີອັດຕາສ່ວນພຽງ 13.5 ຂອງປະລິມານນ້ຳໄຫຼຜ່ານຂອງແມ່ນ້ຳຂອງ, ສ່ວນປະລິມານນ້ຳໃນລຸ່ມແມ່ນ້ຳຂອງ ໂດຍລວມນັ້ນໄດ້ຮັບຜົນກະທົບຈາກປະລິມານນ້ຳໄຫຼເຂົ້າຈາກແມ່ນ້ຳສາຂາຕອນລຸ່ມ ແລະ ປະລິມານນ້ຳຝົນທີ່ຫຼຸດໜ່ອຍລົງເປັນຫຼັກ.

ໂດຍທ່ານ ຫວັງ ອີ້ ໄດ້ກ່າວປິດທ້າຍວ່າ ບາງປະເທດທີ່ບໍ່ໄດ້ຢູ່ໃນພູມມິພາກນີ້ ບໍ່ເຂົ້າໃຈເຖິງສະພາບການທີ່ແທ້ຈິງ ແຕ່ຜັດກ່າວຫາໂດຍບໍ່ມີຄວາມຮັບຜິດຊອບ ເຊື່ອວ່າຈະບໍ່ໄດ້ຮັບການເຫັນດີເຫັນພ້ອມຈາກປະເທດໃນແຖບລຸ່ມແມ່ນ້ຳຂອງ.