ເກົາຫຼີໃຕ້-ຍີ່ປຸ່ນ ຕັດຂາດຄວາມເປັນເພື່ອນມິດ ຈາກບາດແຜສົງຄາມ ແລະ ຄວາມຂັດແຍ່ງທາງການຄ້າ

ລາຍງານ 3 ສິງຫາ 2019: ທ່ານ ມູນ ແຈ-ອິນ ປະທານປະເທດເກົາຫຼີໃຕ້ ຖະແຫຼງເມື່ອວັນສຸກ ທີ່ຜ່ານມາ ພາຍຫຼັງທີ່ກອງປະຊຸມຄະນະລັດຖະມົນຕີຍີ່ປຸ່ນ ມີມະຕິຖອນຊື່ເກົາຫຼີໃຕ້ອອກຈາກການເປັນໜຶ່ງໃນປະເທດຮ່ວມບັນຊີສີຂາວ ໃນການໄດ້ຮັບສິດທິພິເສດລະດັບສູງສຸດທາງການຄ້າຈາກລັດຖະບານຍີ່ປຸ່ນ ໃນການຄ້າຂາຍສິນຄ້າສຳຄັນ ເຊິ່ງລວມເຖິງອາວຸດຍຸດໂທປະກອນ ຫຼື ສິນຄ້າທີ່ອາດກ່ຽວຂ້ອງກັບການດຳເນີນງານທາງການທະຫານ, ໂດຍໃຫ້ມີຜົນໃນວັນທີ 28 ສິງຫານີ້ ວ່າເກົາຫຼີໃຕ້ຈະບໍ່ມີທາງເປັນຝ່າຍປະລາໄຊຕໍ່ຍີ່ປຸ່ນອີກ ໂດຍຍົກເອົາປະຫວັດສາດແຫຼມເກົາຫຼີທີ່ຢູ່ພາຍໃຕ້ການປົກຄອງຂອງຈັກກະພັດຍີ່ປຸ່ນ ກ່ອນສົງຄາມໂລກຄັ້ງທີ 2 ຂຶ້ນມາກ່າວ ແລະ ວິຈານວ່າຍີ່ປຸ່ນຍັງບໍ່ປ່ຽນແປງພຶດຕິກຳຄວາມເຫັນແກ່ຕົວ.

ຂະນະທີ່ທ່ານ ຄິມ ຮະຢອນ-ຊອງ ທີ່ປຶກສາດ້ານຄວາມໝັ້ນຄົງຂອງຜູ້ນຳເກົາຫຼີໃຕ້ ກ່າວວ່າຍີ່ປຸ່ນຄືອຸປະສັກຂອງຂະບວນການສ້າງຄວາມສັນຕິພາບຢູ່ແຫຼມເກົາຫຼີ ແລະ ລັດຖະບານເກົາຫຼີໃຕ້ຈະທົບທວນ ຂໍ້ຕົກລົງການແບ່ງປັນຂໍ້ມູນ ແລະ ການຮ່ວມມືດ້ານຂ່າວກອງກັບລັດຖະບານຍີ່ປຸ່ນ, ດ້ານກະຊວງການຕ່າງປະເທດເກົາຫຼີໃຕ້ອອກຖະແຫຼງການ ວ່າຍີ່ປຸ່ນບໍ່ແມ່ນປະເທດເພື່ອນມິດກັບເກົາຫຼີໃຕ້ອີກຕໍ່ໄປ, ສ່ວນກະຊວງການເງິນເກົາຫຼີໃຕ້ປະກາດກຽມຖອນຍີ່ປຸ່ນອອກຈາກບັນຊີສີຂາວຂອງລັດຖະບານເກົາຫຼີໃຕ້ເຊັ່ນກັນ.

ຂະນະໃນອີກດ້ານໜຶ່ງ, ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດສະຫະລັດ ອາເມຣິກາ ພະຍາຍາມເຮັດໜ້າທີ່ເປັນຄົນກາງໄກ່ເກ່ຍລະຫວ່າງທ່ານ ທາໂຣ ໂຄໂນະ ລັດຖະມົນຕີກະຊວງການຕ່າງປະເທດຍີ່ປຸ່ນ ແລະ ທ່ານ ນາງ ຄັງ ຄະຢອງ-ຮວາ ລັດຖະມົນຕີກະຊວງການຕ່າງປະເທດເກົາຫຼີໃຕ້ ໂດຍອາໄສເວທີກອງປະຊຸມອາຊຽນ ທີ່ບາງກອງ ປະເທດໄທ, ແຕ່ບໍ່ປະສົບຄວາມສຳເລັດ ໂດຍທ່ານ ທາໂຣ ໂຄໂນະ ຍັງຢືນຢັນວ່າເກົາຫຼີໃຕ້ຕ້ອງເປັນຝ່າຍແກ້ໄຂບັນຫານີ້ ຈາກການທີ່ຍົກເອົາບັນຫາໃນປະຫວັດສາດທີ່ຈົບລົງດົນແລ້ວຂຶ້ນມາເອງ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube