ພຽງອາທິດດຽວ ເກົາຫຼີເໜືອຍິງອາວຸດ 3 ຄັ້ງ ພ້ອມບອກວ່າເປັນອາວຸດພັດທະນາຂຶ້ນໃໝ່ຍິ່ງໄດ້ຫຼາຍລູກພ້ອມກັນ

ລາຍງານ 3 ສິງຫາ 2019: ສຳນັກຂ່າວກາງເກົາຫຼີ (KCNA) ລາຍງານເມື່ອວັນເສົາ ທີ່ຜ່າມາ ວ່າທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ຢ້ຽມຢາມທາງພາກຕາເວັນອອກຂອງປະເທດ ເມື່ອຕອນເຊົ້າມືດຂອງວັນສຸກ ທີ່່ຜານມາ ເພື່ອຕິດຕາມການທົດລອງປະສິດທິພາບຂອງລະບົບຍິງຂີປະນາວຸດນຳວິຖີແບບຫຼາຍລຳກ້ອງຮຸ້ນໃໝ່ ເຊິ່ງສາມາດຍິງຂີປະນາວຸດໄດ້ຫຼາຍລູກໃນເວລາດຽວກັນ ແລະ ມີພິໄສການຍິງໄກເຖິງຖານທັບສະຫະລັດ ອາເມຣິກາທີ່ຕັ້ງຢູ່ໃນປະເທດເກົາຫຼີໃຕ້.

ເຖິງແມ່ນວ່າຍັງບໍ່ເປັນທີ່ຊັດເຈນວ່າ ລະບົບດັ່ງກ່າວຄືລະບົບດຽວກັບທີ່ KCNA ລາຍງານວ່າ ການທົດລອງຄັ້ງທີ 2 ເມື່ອວັນພຸດ ທີ່ຜ່ານມານັ້ນບໍ່ແມ່ນການຍິງຂີປະນາວຸດ ແຕ່ເປັນການທົດລອງປະສິດທິພາບຂອງລະບົບຍິງຂີປນະາວຸດນຳວິຖີຂະໜາດໃຫຍ່ທີ່ພັດທະນາຂຶ້ນໃໝ່ ຫຼື ບໍ່, ເຖິງຢ່າງໃດກໍ່ຕາມ ການທີ່ລັດຖະບານເກົາຫຼີເໜືອທົດລອງອາວຸດຢ່າງຕໍ່ເນື່ອງ 3 ຄັ້ງພາຍໃນເວລາພຽງ 1 ອາທິດ ໂດຍເລີ່ມຕັ້ງແຕ່ວັນທີ 25 ກໍລະກົດ ທີ່ຜ່ານມານັ້ນ ໄດ້ສ້າງຄວາມເປັນຫ່ວງໃຫ້ກັບເກົາຫຼີໃຕ້ ເນື່ອງຈາກລາຍງານຂອງ KCNA ລະບຸຊັດເຈນວ່າ ຄືສັນຍານເຕືອນໄພ ເຖິງລັດຖະບານເກົາຫຼີໃຕ້ ທີ່ກຳລັງກຽມຊ້ອມຮົບຮ່ວມກັບ ສ.ອາເມຣິກາ ໃນທ້າຍເດືອນນີ້.

ຂະນະທີ່ທ່ານ ໂດໂນ ທຣຳ ປະທານປະເທດ ສ.ອາເມຣິກາ ຍັງສະແດງຄວາມເຊື່ອໝັ້ນໃນຄຳສັນຍາຂອງຜູ້ນຳເກົາຫຼີເໜືອ ແລະ ຢ້ຳວ່າການເຄື່ອນໄຫວທາງທະຫານຂອງລັດຖະບານເກົາຫຼີເໜືອນັ້ນ ຍັງບໍ່ໄດ້ລະເມີດຂໍ້ຕົກລົງທີ່ລົງນາມຮ່ວມກັນຢູ່ສິງກະໂປ ເມື່ອເດືອນມິຖຸນາ 2018 ເພາະຄວບຄຸມສະເພາະການທົດລອງຂີປະນາວຸດຂ້າມທະວີບ (ICBM).

ໃນອີກດ້ານໜຶ່ງ, ການທີ່ທ່ານ ຣີ ຢອງ-ໂຮ ລັດຖະມົນຕີກະຊວງການຕ່າງປະເທດເກົາຫຼີເໜືອ ບໍ່ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ທີ່ນະຄອນຫຼວງບາງກອກ ແຕ່ໄດ້ມອບໝາຍໃຫ້ທ່ານ ຄິມ ເຈ-ບົງ ເອກອັກຄະລັດຖະທູດເກົາຫຼີເໜືອປະຈຳປະເທດໄທເຂົ້າຮ່ວມແທນ ຈຶ່ງບໍ່ມີການພົບປະຫາລືລະຫວ່າງເຈົ້າໜ້າທີ່ລະດັບສູງຂອງ ສ.ອາເມຣິກາ ກັບ ເກົາຫຼີເໜືອ ແຕ່ທ່ານ ສະຕີເຟນ ບີກັນ ທູດພິເສດດ້ານວຽກງານເກົາຫຼີເໜືອຂອງ ສ.ອາເມຣິກາ ພົບປະຫາລືກັບເກົາຫຼີໃຕ້ ແລະ ຍີ່ປຸ່ນແທນ, ສ່ວນທ່ານ ຄິມ ເຈ-ບົງ ສົນທະນາພຽງດເລັກໜ້ອຍກັບທ່ານ ຫວັງ ອີ້ ລັດຖະມົນຕີກະຊວງການຕ່າງປະເທດຂອງຈີນ.