ສ.ອາເມຣິກາ ຕ້ອງການຕິດຕັ້ງຂີປະນາວຸດ ໃນທະວີບອາຊີ

ລາຍງານ 4 ສິງຫາ 2019: ທ່ານ ມາກ ເອສເປິ ລັດຖະມົນຕີກະຊວງປ້ອງກັນປະເທດສະຫະລັດ ອາເມຣິກາ ກ່າວໃນລະຫວ່າງການຢ້ຽມຢາມອົດສະຕຣາລີ ເມື່ອວັນເສົາ ທີ່ຜ່ານມາ ວ່າຕົນ ແລະ ຄະນະຢູ່ໃນລະຫວ່າງການພິຈາລະນາຫາແນວທາງ ແລະ ຄວາມເປັນໄປໄດ້ໃນການຕິດຕັ້ງຖານຍິງລະບົບຍິງຂີປະນາວຸດນຳວິຖີພິໄສກາງຈາກພື້ນດິນ ໃນພູມມິພາກໃດໜຶ່ງຂອງທະວີບອາຊີ ເພື່ອຖ່ວງດຸນການຂະຫຍາຍອິດທິພົນທາງທະຫານຂອງຈີນໃນອາຊີ ທີ່ແຜ່ຂະຫຍາຍຢ່າງໄວວາ, ເຊິ່ງທ່ານ ມາກ ເອສເປິ ກ່າວຕໍ່ວ່າ ໃນທາງທິດສະດີບັນຫານີ້ອາດຕ້ອງໃຊ້ເວລາໃນການກະກຽມຫຼາຍເດືອນ ແຕ່ຕອນນີ້ລັດຖະບານ ສ.ອາເມຣິກາ ຕ້ອງດຳເນີນການໃຫ້ໄວທີ່ສຸດ.

ທ່ານ ມາກ ເອສເປິ ລັດຖະມົນຕີກະຊວງປ້ອງກັນປະເທດ ສ.ອາເມຣິກາ

ການຖະແຫຼງດັ່ງກ່າວຂອງທ່ານ ມາກ ເອສເປິ ເກີດຂຶ້ນພຽງວັນດຽວ ພາຍຫຼັງສົນທິສັນຍາອາວຸດນິວເຄຼຍພິໄສກາງ (INF) ທີ່ ສ.ອາເມຣິກາ ລົງນາມຮ່ວມກັບລັດເຊຍ ເມື່ອປີ 1987 ໃນໄລຍະທ້າຍຂອງສົງຄາມເຢັນ ແລະ ທ້າຍສະໄໝສະຫະພາບໂຊວຽດ ສິ້ນສຸດລົງຢ່າງເປັນທາງການ ຈາກທີ່ພາຄີທັງສອງຝ່າຍປະກາດຢຸດຕິການຮ່ວມຂໍ້ຕົກລົງ ເຊິ່ງລັດເຊຍເຕືອນວ່າ ສ.ອາເມຣິກາ ຄິດຜິດຢ່າງຮ້າຍແຮງທີ່ເປັນຝ່າຍຍົກເລີກສົນທິສັນຍາສະບັບນີ້ກ່ອນ ແລະ ຢືນຢັນວ່າລັດເຊຍບໍ່ຕ້ອງການແຂ່ງຂັນສະສົມອາວຸດກັບສໃດປະເທດໃດ ຍົກເວັ້ນກໍລະນີທີ່ ສ.ອາເມຣິກາ ເປັນຝ່າຍເຄື່ອນໄຫວກ່ອນ.

ຂະນະທີ່ກ່ອນໜ້ານັ້ນ, ທ່ານ ໂດໂນ ທຣຳ ປະທານປະເທດ ສ.ອາເມຣິກາ ກ່າວເຖິງການຖອນຕົວອອກຈາກ INF ວ່າໃນສ່ວນຂອງລັດຖະບານ ສ.ອາເມຣິການັ້ນ ຕົນປາຖະໜາການໃຫ້ມີເຈລະຈາຂໍ້ຕົກລົງສະບັບໃໝ່ ໃຫ້ເປັນຂໍ້ຕົກລົງສາມຝ່າຍ ທີ່ມີຈີນເຂົ້າຮ່ວມນຳ, ເຖິງຢ່າງໃດກໍ່ຕາມ ລັດຖະບານຈີນ ວິຈານວ່າທ່ານ ໂດໂນ ທຣຳ ໃຊ້ຈີນເປັນຂໍ້ອ້າງ ໃນການຍົກເລີກສົນທິສັນຍາກັບລັດເຊຍ ເນື່ອງຈາກເປັນທີ່ຮັບຮູ້ກັນດີຢູ່ແລ້ວ່າ ຄວາມສາມາດຂອງຈີນໃນດ້ານການພັດທະນາຫົວຮົບນິວເຄຼຍ ຍັງຫ່າງໄກຈາກລັດເຊຍ ແລະ ສ.ອາເມຣິກາ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube