ທ່ານນາຍົກລົງຊຸກຍູ້ວຽກງານກະສິກຳ ເມືອງຫາດຊາຍຟອງ ພ້ອມແນະນຳປະຊາຊົນໃຫ້ປູກແບບປອດສານພິດ

ໜັງສືພິມວຽງຈັນທາມລາຍງານ 5 ສິງຫາ 2019 ວ່າ: ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ແນະນຳປະຊາຊົນເມືອງຫາດຊາຍຟອງ, ນະຄອນຫຼວງວຽງຈັນ ໃຫ້ຮັກສາມູນເຊື້ອໃນການປູກພືດທີ່ບໍ່ໃຊ້ສານພິດ ເພາະປັດຈຸບັນເຫັນວ່າມີການໃຊ້ສານເຄມີເພື່ອເລັ່ງຜົນຜະລິດ.

ທ່ານນາຍົກໄດ້ໄປຢ້ຽມຢາມ ແລະ ພົບປະໂອ້ລົມປະຊາຊົນ ເມືອງຫາດຊາຍຟອງ ໃນຕອນບ່າຍຂອງວັນຈັນນີ້ ເພື່ອຊຸກຍູ້ສົ່ງເສີມທາງດ້ານກະສິກຳ ແລະ ສະກັດກັ້ນການລະບາດຂອງໄຂ້ຍຸງລາຍ.

ພາຍຫຼັງທີ່ໄດ້ຮັບຟັງການລາຍງານສະພາບພົ້ນເດັ່ນຂອງເມືອງຈາກເຈົ້າເມືອງ ທ່ານ ທອງລຸນ ໄດ້ແນະນຳບາງບັນຫາຄື: ໃນເມື່ອກ່ອນກະສິກອນເມືອງຫາດຊາຍຟອງ ແມ່ນປູກພືດປອດສານພິດມາໂດຍຕະຫຼອດ, ແຕ່ໄລຍະມໍ່ໆນີ້ມີການໃຊ້ສານເຄມີເພື່ອເລັ່ງຜົນຜະລິດ ຈົນຜູ້ທີ່ປູກພືດກະສິກຳຈຳນວນໜຶ່ງແມ່ນບໍ່ຍາກກິນຮອດພືດທີ່ຕົນເອງປູກ. ສະນັ້ນ, ຈຶ່ງຮຽກຮ້ອງໃຫ້ປະຊາຊົນຊາວກະສິກອນເມືອງດັ່ງກ່າວໃຫ້ຮັກສາມູນເຊື້ອທີ່ເຄີຍເປັນມາໃນການປູກພືດຜັກປອດສານພິດ.

ທ່ານນາຍົກ ຍັງໄດ້ແນະນຳທຸກຄອບຄົວໃຫ້ເອົາຈິງເອົາຈັງໃນການສະກັດກັ້ນຕ້ານການລະບາດຂອງພະຍາດໄຂ້ຍຸງລາຍໂດຍປະຕິບັດ 5ປ ຕາມການແນະນຳຂອງກະຊວງສາທາລະນະສຸກ.