ເກົາຫຼີເໜືອປະກາດຈະເດີນໜ້າພັດທະນາອາວຸດຕໍ່ໄປ ຕາບໃດທີ່ ສ.ອາເມຣກາ-ເກົາຫຼີໃຕ້ ຍັງຊ້ອມຮົບ

ລາຍງານ 7 ສິງຫາ 2019: ສຳນັກຂ່າວກາງເກົາຫຼີ (KCNA) ກະບອກສຽງຂອງລັດຖະບານເກົາຫຼີເໜືອລາຍງານວ່າ ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ລົງຢ້ຽມຢາມທາງພາກຕາເວັນອອກຂອງປະເທດ ເມື່ອວັນອັງຄານ ທີ່ຜ່ານມາ ເພື່ອຕິດຕາມການເຝິກຊ້ອມຍິງ ແລະ ປະສິດທິພາບຂອງຂີປະນາວຸດນຳວິຖີແບບໃໝ່ ທີ່ຜົນອອກມາເປັນທີ່ໜ້າເພິ່ງພໍໃຈຢ່າງຍິ່ງ ໂດຍທ່ານຜູ້ນຳກ່າວວ່າ ການເຝິກຊ້ອມທາງທະຫານໃນໂອກາດນີ້ຄື ຄຳເຕືອນທີ່ເໝາະສົມໄປຍັງສະຫະລັດ ອາເມຣິກາ ແລະ ເກົາຫຼີໃຕ້ທີ່ກຳລັງເຝິກຊ້ອມຮົບຮ່ວມກັນຢູ່ໃນຕອນນີ້ ແລະ ເປັນການສົ່ງສັນຍານເຕືອນວ່າ ເກົາຫຼີເໜືອເລີ່ມບໍ່ມີຄວາມຕ້ອງການທີ່ຈະເຈລະຈາກັບ ສ.ອາເມຣິກາອີກແລ້ວ.

ຂະນະທີ່ມີການວິເຄາະວ່າ ການທີ່ຕ່າງຝ່າຍຕ່າງປີ້ນຄວາມ ຫັນມາດຳເນີນກິດຈະກຳທາງທະຫານ ຈະຍິ່ງສົ່ງຜົນກະທົບຕໍ່ການເຈລະຈາລະຫວ່າງເກົາຫຼີເໜືອ ກັບ ທັງ ສ.ອາເມຣິກາ ແລະ ເກົາຫຼີໃຕ້ ໂດຍສະເພາະກັບລັດຖະບານ ສ.ອາເມຣິກາ ທີ່ບໍ່ມີການພົບປະຫາລືກັນຢ່າງຈິງຈັງອີກເລີຍ ນັບຕັ້ງແຕ່ກອງປະຊຸມສຸດຍອດ ທີ່ນະຄອນຫຼວງຮ່າໂນ້ຍ ທີ່ຈົບລົງໂດຍບໍ່ມີໝາກຜົນຫຍັງ ເມື່ອເດືອນກຸມພາ ທີ່ຜ່ານມາ, ເຖິງແມ່ນວ່າທ່ານ ໂດໂນ ທຣຳ ຈະເດີນທາງມາເຖິງເຂດປອດທະຫານແຫຼມເກົາຫຼີ ເພື່ອພົບປະຫາລືກັບທ່ານ ຄິມ ຈອງ-ອຶນ ທີ່ຕໍ່ມາມີລາຍງານວ່າຜູ້ນຳທັງສອງປະເທດຕົກລົງຈັດຕັ້ງການພົບປະຫາລືລະດັບເຈົ້າໜ້າທີ່ ແຕ່ກໍ່ບໍ່ສາມາດເກີດຂຶ້ນໄດ້ຕາມແຜນການຄືພາຍໃນເດືອນກໍລະກົດ ທີ່ຜ່ານມາ.

ໃນດ້ານຂອງທ່ານ ຈອນ ໂບຕັ້ນ ທີ່ປຶກສາດ້ານຄວາມໝັ້ນຄົງແຫ່ງຊາດ ສ.ອາເມຣິກາ ກ່າວເຕືອນເກົາຫຼີເໜືອໃຫ້ຢຶດໝັ້ນຕາມຂໍ້ຕົກລົງ ທີ່ລົງນາມຮ່ວມກັນໃນກອງປະຊຸມສຸດຍອດ ທີ່ສິງກະໂປ ເຊິ່ງເປັນການພົບປະກັນຄັ້ງປະຫວັດສາດລະຫວ່າງຜູ້ນຳ ສ.ອາເມຣິກາ ກັບ ເກົາຫຼີເໜືອ ທີ່ໜຶ່ງໃນຂໍ້ຕົກລົງຄືການບໍ່ທົດສອບຂີປະນາວຸດຂ້າມທະວີບ ແຕ່ກະຊວງການຕ່າງປະເທດເກົາຫຼີເໜືອອກຖະແຫຼງການຕອບໂຕ້ຢ່າງທັນທີວ່າ ລັດຖະບານເກົາຫຼີເໜືອຈະເດີນໜ້າພັດທະນາໂຄງການອາວຸດ ຕາບໃດທີ່ລັດຖະບານ ສ.ອາເມຣິກາ ແລະ ເກົາຫຼີໃຕ້ ລະເມີດຂໍ້ຕົກລົງນັ້ນກໍ່ຄືການຊ້ອມຮົບ.